Khol dahalak hulin hu taom ông Thông Khói di tuk masa hu nao ngak bruk haong palei. Yaom lac hu umur 80 thun, min tapi jeng daok hadah akaok, sami saman, ông Thông Khói brei thau: “jeng hu urang sua tangi hulin lac taha paje njauk hagait oh padeih padei bo daok tame bruk palei pala ngak hagait? Drei sahaneng lac mik wa daok pang daok jia tui, drei daok buh brein. Ngak ye ngak ka abih rup, langiu di nan drei ngak camin brei ka anek taco pasang ieik”.
Hadei di thun peih paha taneh iar tame sa baoh nagar, tuk masa nan dang akaok Kapul sản xuất Lâm Thiện, ong ba abih hatai ndam gam hamu tanah ieik glang bruk ngak mbang. Tal thun 1979, Kapul sản xuất di ong silih tapa jeng Hợp tác xã (HTX) ngak nông Ma Lâm 3, ông Thong Khoi dang Chủ nhiệm HTX. Hadei di nan pok jeng po palei; blaoh ngak Akaok Kapul urang umur taha, Urang njauk hatai di dalam bangsa Chăm di khu phố 3, ban sit Ma Lâm meng thun 2014 mbiah tal ini. Khu phố ini hu ralo urang bangsa Chăm yau nan ye ieu lac palei Chăm.
Yam takai dang di labik halei ông Thông Khói jeng ba abih hatai jai tame bruk brei ka palei pala ngak ka mikwa bangsa anit ranam pok glaong jia tui. Ông jeng ieu lac sa urang nao akaok nao dahalau dalam jak ba mikwa urang bangsa yah kalak dom janih dom reing oh njauk oh lagaih haong ilamu adat cambat dalam bruk lakhah caga, matai lahik, yang mabang. Hadei di nan mboh lakhah, ndam matai lahik dak harei dak ngak tui adat cambat, oh mboh daok pataom gauk mbang mayum dui atah 2-3 harei bih jien padai yau dahalau. Jeng ye bruk tok adiuk pasang kurang urmur kurang thun.
Ông Khoi bui sambai lac: Palei pala karo, saron mbon, puk paga sampurna, ye mikwa meng sanang hatai ngak mbang. Yau nan ye, urak ini puk palei khu phố ndah padang dan haong ngak siam jalan khik karo sampurna di palei pala yau ye: Bruk ngak “Puk paga khu phố saron mbon siam makre karo kajap”, bruk ngak “Puk paga khu phố dang taeng caga bala taka ma túy”. Ong Khoi haong abih urang dalam kapul ba bruk, MBan ngak bruk Mặt trận khu phố, bhian jak ba dakwah mikwa urang bangsa Chăm ngak njauk ngak tui, ba abih hatai jai ka mikwa jammaah bhap bini pathau khan manuac bleik manuac dusa manuac chung hukum; padar anek kamuan ngak njauk ngak tui hukum nagar, palaih atah dusa, banasa yau ye main bia main đề, main aphen ma túy…
Ông Nguyễn Văn Tấn, Akaok Jabat Bangsa huyện Hàm Thuận Bắc brei thau : “lac sa urang thau cambac lac adat rukun urang bangsa Chăm, gam tui hatai jia hatai ranam di mikwa urang bangsa di palei pala, ông Thông Khói thau roh duah, thau bac magru, thau mahit thau pang hatai mikwa bangsa piah duah jalan jak ba mikwa ngak kanjauk ka lagaih. Meng hu yau nan, palei pala urang bangsa Cham di khu phố 3, ban Ma Lâm hu karo hu lagaih, raidiuk mikwa bhap bini sampurna kajap karo, ngak mbang siam makre patagok ekonomi kinh tế.
Njauk ndom mayai lac, labaih 50 thun ndam gam haong bruk palei pala jeng ieu lac hu labaih yau nan dom tuk wak masa haong ông Thông Khói ba abih hatai jai, prein yawa di drei ba tame bruk daong ka mikwa bangsa dak padang yak yum jum pataom khik ramik pachreih ilamu siam makre di bangsa Chăm./.
Viết bình luận