Menek tabiak saong praong tagok di Nghệ An, bhum palei hu ilamu cách mạng meng kan mai, urang likei angan Hoàng Ngọc Linh ndih tapui thun 1982, hadei di tuk bac tamat THPT, halan hatian ngak harak likau tagok jalan nao ngak lin. Tamat 2 thun nghĩa vụ quân sự, sa-ai patui bruk bac di sang bac Cao đẳng Quân y 2 TPHCM. Bac tamat haong blah bằng naih joi, sa-ai hu ba mai ngak bruk di Bộ đội Biên phòng tỉnh Gia Lai. Thun 2018, Hoàng Ngọc Linh hu ba mai ngak bruk di Đồn biên phòng Ia R'vê, huyện Ea Súp, tỉnh Đắk Lắk iek gah bilik iek ruak quân dân y pambuak gauk, peih bruk iek glang prein yava ka urang jakar, urang lin di đồn saong bhap bini dalam xã. Thượng úy Hoàng Ngọc Linh khan lac: "Bruk njauk biai di bhum tapen negar lac bilan hajan bhian hu ruak pandiak tabiak darah, daok bilan pandiak ye aih craoh, ruak jalan suak yava..., yaok harei hu meng 10 – 15 urang mai iek ruak saong jeng hu kol dahlak taong ruak thit abih. Yaom lac urang ruak rilo min hu daong iek prein yava ka rahra ye kol dahlak jeng bui sambai saong tuk halei jeng kham merat. Langiu di bruk iek ruak, kol dahlak daok hu pathau khan mikva bruk khik hacih sa-at sang danaok, mbang – menyum tasak… khik kajap karo prein yava."

Ong Vi Văn Ngút, daok di puk 5, xã Ia R'vê, huyện Ea Súp brei thau, puk daok atah di pasak huyện Ea Súp tal labaih 60 km, jalan mbak nao mai kan kandah, abih di nyu lac di bilan hajan. Meng tuk hu bilik iek ruak quân dân y Đồn biên phòng Ia R'vê, rahra oh daok nao atah piah iek ruak, taong ruak. Urang jakar quân y daok hu mai tal sang bhap bini piah iek ruak, taong ruak ka dom urang ruak taha, umo thun glaong, ruak trak..."Diuk kumei dahlak ruak daruai talang raong pakat puac di abih, sang iek ruak lac oh taong ruak thit abih hu, diuk dahlak oh nao mai hu. Dahlak mehit lac bilik iek ruak quân dân y hu bác sỹ Linh châm cứu meda thit ruak nan ye dahlak ba diuk dahlak mai iek ruak. Tapa châm cứu hu 18 harei, diuk dahlak cadu ruak, nao mai hu. Sang dahlak uan tabuan lo." 

Ia R'vê lac xã bhum tapen negar atah bayah abih di huyện Ea Súp, hu 6.800 menuac di 28 bangsa daok diukrai haong gauk. Ngak mbang kan kandah nan ye bruk iek glang prein yava di bhap bini jeng takik hu. Tui ong Lê Văn Hoàng Lâm – Chủ tịch UBND xã Ia R'vê, dom thun tapa, bilik iek ruak quân dân y pambuak gauk di Đồn Biên phòng Ia R'vê hu ngak siam bruk iek ruak, taong ruak ka bhap bini di labik tapen negar. Daok Thượng úy Hoàng Ngọc Linh taduan hu rilo hatai anit ranam di bhap bini dom bangsa. "Thượng úy Hoàng Ngọc Linh lac sa bác sỹ abih hatung hatian haong bruk iek ruak, taong ruak ka rahra. Tuk mikva ruak kik ye oh lac harei atau melam, oh lac jalan atah yau ahabr jeng abih drei nao daong. Langiu di nan, Thượng úy Hoàng Ngọc Linh daok hu pathau khan mikva khik hacih sa-at sang danaok, labik daok, mbang – menyum tasak, pathau khan bruk pacang caga jit covid – 19 padang hu hatai jia dalam bhap bini..." 

Meng dom kham merat dalam tuk ngak bruk, Thượng úy quân y Hoàng Ngọc Linh hu rilo pakat, rilo gah pok meyaom. Min ngan saong sa-ai, bruk bui sambai praong abih lac hu ayut sahabat, hu bhap bini dom bangsa anit ranam, jia tui, iek glang prein yava saong rik daong dak padang bhum tapen negar dak harei dak siam mekre jang, ginup meda jang./.

Urang lang: M. Phương