Oh lac kham merat yam tapa thar vak, jeng urang kumei  vận động viên jaoh jo janih caluai ia di đội tuyển taneh ia, bo Sa Ri daok hu peih tal pato bac brei saoh ka dom adei sit sang kan kandah. 

Ndom tal Nguyễn Thị Sa Ri, urang kumei hu pilih ruah tame kapul caluai ia urang jaoh jo Việt Nam, rilo menuac jeng thau saong pok meyaom bruk pakacah jak jeng di sa-ai. Meng thun 2007 tal ini, Sa Ri mek hu 13 medai pariak, 26 medai ameh di dom mbang pakacah dalam taneh ia. Hu mbaok tame dom mbang pakacah ASEAN Para Games, Sa Ri mek hu 7 medai pariak,  4 medai ameh, 1 medai ban. Min takik menuac thau lac, langiu di bruk thể thao, Sa Ri daok lac kreih camin kham merat bac megru saong daong ka dom uranaih kan kathaot dalam palei.

Sa Ri khan lac, langiu di bruk thể thao, sa-ai daok biak takre sap Anh meng di tuk daok lac anek saih di sang bac. Bac tamat THPT, Sa Ri pakacah gam tame hu 2 sang bac ĐH, Sa Ri pilih ruah tui bac gah sap negar langiu di sang bac ĐH Hùng Vương - TP Hồ Chí Minh.

Hadei di tuk bac tamat bloh, piah hu bruk ngak saong hu jien tame, Sa Ri nao ngak ka xưởng ngak takhaok kalik. Jeng dalam tukvak ini, Sa Ri peih tal bac sap Anh oh mek jien brei ka dom adei sit dalam palei, dalam nan rilo meng lac anek di dom sang urang ngak, sang kan kandah. Hu harei, rilo anek saih di dom pakat bac karei di gauk, nan ye Sa Ri njauk parabha jeng 3 tuk bac.

Meng tuk daok sit, Sa Ri hu hatai caong ngak gru pato. Sa Ri khan lac, kayua dua gah takai jaoh jo, nan ye jalan nao tal hatai caong di drei oh tuk halei hu samu, tapak, min meng bruk kan kandah nan, nyu pabak prein khang daong ka Sa Ri yam tagok.

Sa Ri jeng sahneng lac, bruk hu taduan raok dom adei sit mai haong tal bac, lac sa patuah jamo di drei. Kayua meng dom cambuai khim klao, bruk lễ phép, saong hatai takre bac di dom adei haong môn sap Anh hu pabak veik ka sa-ai prein khang piah duah thau dalam jang ka sap ndom panuac puac dunya. Bruk njauk biai nan lac dom adei sit mai haong tal bac di anai gru Sa Ri dak harei dak rilo saong hu bruk salih bahrau, takre bac jang. Meda lac meng thaot binguk anai gru jaoh jo hu pabak tame hatung hatian di dom uranaih hatai anit ranam saong iek praong, jeng yau hatai kham merat yam tagok.

Ong Nguyễn Văn Tuyền, Phaok akaok UB bhap bini xã Phước Đông (huyen Cần Đước, tinh Long An) brei thau: “Sa Ri lac anai kumei siam hatai, bak prein khang saong daong ka anek saih kan kathaot meng rilo thun ini mai. Kol dahlak mboh biak hadah mbaok meta kayua xã hu 1 kreih camin kham merat yam tapa kan kandah, yaom tapa thar vak saong ba siam mekre ka menuac sia meng hatung hatian anit ranam, klah rabha”.

Pandiak hadah tanjak di mangaok jalan nhựa atah di bhum taneran kraong Cửu Long ginup meda. Angaok jalan mboh yau atah bayah nan, Sa Ri daok pakhang hatai jia di drei dalam yaok mbang kham merat abih drei taglung radaih xe lăn nao mangaok jalan patau randaih. Yaom lac kan kandah min oh ka tuk halei Sa Ri klaak jalan bo drei pilih ruah bloh. Kayua lac, ngan saong Sa Ri, prein khang meng hatai sahneng, hatai anit ranam, lac asar jru tinh thần meda yam tapa hu abih janih dalam raidiuk ini./.