Kadha vak di Vũ Phượng di mangaok Báo Thanh niên yaih khan ka bruk ngak hu makna ini di sa-ai dalam dom harei jaik di ini.

Sa-ai Minh hu angan mangaok mạng xã hội kayua bhian alin hadiah yaok ratuh kg njam ka urang ngak di labik ngak kong Biên Hòa, tỉnh Đồng Nai. Sa-ai Minh Râu pablei njam angan biak lac Phạm Hồng Minh, umo 40 thun, daok di TP.Biên Hòa, tỉnh Đồng Nai. Sa-ai hu urang mangaok mạng caik angan lac Minh Râu. Bahrau ini, sa-ai caik anak sạp njam di drei talei akhar haroh lac “Labik alin hadiah njam brei saoh”. Piah khik caga alam môi trường, sa-ai caga pok talei piah urang mai mek njam kak veik salih brei kadung  nilong.

Sa-ai Minh brei thau: Yaok harei sa-ai alin hadiah 2 – 3 ratuh kg njam, kuhria ta-eng jien blei kadung jeng abih meng 120.000 – 150.000 đồng. Kadung nilong bo blei janih lap lo urang caik njam tame nyu tahak, njauk pandar kadung karei, nan ye sa-ai pachreih urang pandar talei piah kak veik.

Yaok harei pablei njam laba 10 đồng, sa-ai Minh caik tabiak 1 – 3 đồng piah blei njam alin hadiah brei saoh. Tui nan, yaok adit sạp njam di sa-ai hu meng 2 – 6 mbang alin hadiah njam. Sa-ai brei thau: 2 ratuh kg njam sa-ai blei dom harei jaik di ini lac 700.000 – 800.000 đồng, hu harei chiat jang, harei lap jang tui darak pasar. Hu urang mboh dahlak brei njam miat nan ye yar jien lac daong blei njam alin hadiah min dahlak oh mek. Prein dahlak ngak hu tal halei dahlak ngak tal nan, tui prein di drei.

Sap njam tapen jalan di sa-ai Minh dane angan haong menuac sia dalam palei jaik 9 thun tapa. Dalam nan, hu dom sinh viên dahlau daih mai mek njam brei saoh di sa-ai, urak ini bac tamat nao ngak min lavik lavik mai ravang, alin brei hasit pandap. Sa-ai Minh brei thau, bruk alin hadiah njam brei saoh ka urang ngak, ka sinh viên, nyu ngak ka sa-ai mboh bui sambai, mboh raidiuk takik kan kandah glaih glar saong pambak praong dom bruk siam mekre dalam raidiuk. Sa-ai khan lac, bruk alin hadiah njam jeng oh kandah hagait tal bruk pablei salih njam patam baoh kraoh di sa-ai yaok harei. Rilo menuac mai mek njam brei saoh jeng lac menuac bhian randap blei njam di sạp.

Ngan saong sa-ai Minh, diukrai yau nan bo bui sambai, sa-ai khan lac daok ngak mbiah tal tuk halei oh daok ngak hu meng padeih./.