Po paha Thlốt, đại đức Thanh Đa Ra tuk halei jeng sangka tal bruk paglaong ilamo saong jalan duah thau ka hukum, ka jalan ngak, ka sarak di Đảng saong Kanja. Yaok thun, langiu di bruk khik tani tanat dua tal bac magru Pali – Khmer, peih tal bac bổ túc sap Khmer tame bilan pandiak ka tăng sinh saong dom adei phật tử tui bac. Đại đức Thạch Đa Ra brei thau lac, bruk paatah di puk palei saong thành thị dak harei dak takik nao, pandap panda pabak ka raidiuk dak harei dak parilo jang, mayah ilamo di phật tử oh hu paglaong tagok, mbuan laik tame chak tachauk (sak tasauk), njauk jak ba tal bruk ngak suan adat hukum.“ Sư bhian pathau khan tal hukum nagar, pakakei tal dom amaik ame pato padar anek bik di drei plaih atah kanyah tachauk, plaih atah di dom bruk ngak chung jalan adat hukum, hukum nagar. Ngan haong dom anek kamuan bangsa Khmer mayah hu ngak man ibadat uak rupì, dom urang à-cha bac ilamu daok dang, pato padar brei thau tal tuk gilac tabiak raidiuk bhian harei ye hatai sahaneng hu siam jang. Kayua yau nan ye, Sư tuk halei jeng caga khan mayai padar tal abih gauk yaok mbang”. 

Oh lac sangka tal uranaih, urang dang akaok paha daok ba jalan ka phật tử sangka rilo jang ngan haong danak dak padang ngak palei pala bahrau, ngak jeng mbaok mata puk palei hadah hadai – hijao makre – cih saat… dalam nan hu rik tame bruk padang ngak jalan mbak palaei pala dan haong saong padang ngak sang jumpataom  hu jao alin ka sang kan kathaot.

Piah ka bruk jak ba, pathau khan peih ngak hu siam lagaih, ong gam haong Mbang khik ramik paha, urang hu angan je dalam paha peih ngak dahlau saong hu peih praong tabiak. Ngan haong jalan ngak ini, njauk dalam 5 thun tapa, đại đức Thạch Đa Ra hu jak ba padang ngak hu 8 baoh sang jumpataom, hu yaom 400 triệu đồng piah ka sang kan kathaot hu jien piah yam tagok kan kandah dalam raidiuk… langiu di nan, ong daok jak ba urang hu rik tame padang ngak 9 baoh tatua puk palei, hu yaom jaik 1,3 tỷ đồng. Ong Thạch Trần Giang, Phó akaok UBND xã Hiệp Hòa, huyện Cầu Ngang brei thau lac “Sư ba abih hatain dalam bruk daong ba ka rahra trun manieng kan kandah jang yau bruk padang ngak puk palei bahrau. Urak ini dom baoh tatua nduac tapa dhar sit ka oh hu Kanja buh jien tame tal, ye Sư jak ba gauk daong. Sư jeng hu mek dom paok pandap hadiah brei ka sang kathaot jang yau anek saih kan kathaot di dalam bhum palei. Sư lac urang angan je dalam bruk bac daa saong ngak tui kreih camin ilamu Hồ Chí Minh”.

Dalam 5 thun ini mai, ong jak ba ik pataom hu yaok ribau paok pandap daong ka sang urang kan kandah, anek saih kan kathaot yam tapa kan kandah; iek ruak, alin brei jru tavao oh mek jien saong alin harak bảo hiểm ka urang taha oh hu daok tian prein gauk gar, anek saih kan kathaot, hu labaih 2 tỷ đồng.

Bac magru saong ngak tui Wa Ho Chi Minh, đại  đức Thạch Đa Ra tacei tabiak dom bruk dreih gauk, tui Wa Ho ieu lac sa urang “luac rai ba rup brei ka rahra, ka taneh ia, bruk hagait jeng pamaong tal bruk daong pabak ka rahra”. Daok ugama Phật ye “paglaong halain daong ka manuac sia, di dunya, kakei anek manuac raidiuk tui jalan siam makre saong ngak tui jalan anit ranam”. Kayua yau nan ye, ong tuk halei jeng sahaneng tal jalan kham marat ngak hu rilo bruk daong kein lagaih ka raidiuk, ka puk palei. Bruk nan jeng ieu lac sa bruk siam makre dah krah haniem phul praong glong abih di urang nagk aman ibadat tui jalan Po Bhat pato.

Hiệp Hòa urak ini jalan hu peih thoan, phun kayau hijao hu cakak siam gheih, meng mboh raidiuk, mbang ngui, daok dang di mikva di pak ini hu salih mbaok mata. Dom jak jeng ini hu bruk rik tame oh sit di đại đức Thạch Đa Ra – lac ieu sa urang Sư cả, Sư Gru tuk halei jeng ba abih prein yawa ka raidiuk, ba akaok nao dahlau dalam bruk bac magru, ngak tui panuac pato di Wa Ho./.