Palei Sơn lac palei di urang J’rai daok pak ini meng kan mai. Dahlau deih, tuk jalan mbak, hạ tầng ka oh hu tagok, bruk taom gaok nao mai di palei haong bhum tapen negar daok takik, ye bruk rahra rahra dang anak dom bruk yau ye oh thau akhar haroh, oh hu bac ta-a, mê tín dị đoan, bruk ngak mbang takik cak rok lac bruk kan plaih hu. Taha palei Siu Bình lac urang ba akaok nao dahlau dalam bruk cak rok patagok kinh tế, ngan haong 1ha cà phê, labaih 2 ha cao su, 1 ha pa-aok blait. Kayua ong sahaneng lac, piah ka mikva ngak tui, jia tui, pang tui ye rup drei brei ngak dahlau: “Rahra boh drei ngak hagait dahlau ye ngak tui min. Di mala palei nan, dahlau deih oh hu thei pala cao su, dahlak pala, lavik lavik harei mboh cao su hu mbang  ye pala. Mboh drei ngak ye ngak tui”

Umo labaih 70 thun, min takai nao di taha palei Siu Bình jeng daok biak samar, pak halei di mangaok bhum taneh di palei Sơn jeng hu takai yam di ong nao tapa. Ong nao tal yaok baoh sang, tabiak tal hamu puh jak ba mikva, abih di nyu nan lac dom baoh sang kan kathaot khang hatai bac magru, pandar dom jalan ngak gheih, dom bruk ngak mbang hu kein laba piah pasiam raidiuk. Meng ilamo dalam bruk ngak, ong pato tacei, brei thau ilamo pala cà phê, cao su ka dom baoh sang rahra dalam palei. “hajan suai njaom lavik” saong “pan tangin tacei bruk”, lac dua jalan ngak bo luac 10 thun tapa ong hu pandar piah daong ka rahra. Sang saai Siu H’lan hu taha palei Siu Bình daong nan ye hu sron mbon, haniem phul, oh lac gah kinh te, bo taha palei daok hu langyah dom bruk mesao gauk, kandah gauk dalam sang: “Dua diuk pasang manyum alak mabuk, taha Bình tagok langyah. Ong pato pahadar, hadei di ini oh daok hu bruk hagait veik”

Meng dom bruk kandah gauk sit dalam palei, tal bruk jak ba rahra oh pang tui kol kanjak jhak, khik kajap sron mbon bhum tapen negar, bruk sarau kadau halei jeng hu taha palei Siu Bình langyah biak siam lagaih, thei jeng pang, jeng jia tui. Thiếu tá Nguyễn Đăng Duẩn, urang dalam kapul jak ba rahra đồn Biên phòng Ia Nan brei thau: “Taha palei bhian ndem mayai haong adei saai bol lin biên phòng jak ba pato tacei mikva cak rok patagok kinh tế sang, bhian pto tacei bruk ngak dalam ban tal yaok baoh sang, kakei mikva hu puh cakak jaik jalan tapen negar brei ngak njauk tui sarak 34 ka jalan tapen negar blaoh adat di puk palei, adat di xã.”

Daok taha palei Siu Bình toh sahaneng lac: mikva daok anit ranam, daok jia tame, ong daok buh prein nao gam haong rahra, ba palei Sơn jeng palei pala bahrau kiểu mẫu.

Jalan mai palei Sơn, xã tapen negar Ia Nan, huyện Đức Cơ, tỉnh Gia Lai harei ini hu bak sambo hijao di phun cao su, bein pa-aok blait, cà phê, brei mboh raidiuk saron mbon saong trei sil. Di pak nan hu taha Siu Bình daok harei melam pato tacei mikva padang talei jum pataom gauk, kayua bruk trei sil, saron mboh saong cak rok patagok di puk palei./.