Kadha “Menuac gheih bruk siam” harei ini, da-a mikva saong taong abih gauk taom gaok dom urang lac talei pambuak Đảng haong bhap bini di tỉnh Đắc Lắc tapa kadha vak di urang vak Hà Thảo:

Umo labaih 70 thun, min ong Ma An, taha palei Trí A, xã Krông Na, huyện Buôn Đôn, tỉnh Đắc Lắc jeng daok sami samar, bui sambai chreih chrai haong kalik jhuk, khang kajap yau  “phun xà nu” praong glaong dang tapak di kreh ceik glai Tây Nguyên.

Thun 2002, Tây Nguyên jeng sa labik pandiak gah chính trị haong bruk tamuh tagok di sa kapul phản động, ong Ma An jeng labik pambak tame di abih bhap bini dalam palei. Luac dalam sa tukvak atah, nao tal yaok baoh sang, ong kham merat pathau khan, jak ba, pato tacei mikva thau cambaih mbaoh meta biak di kol phản động piah ka mikva paglaong hatai sangka, oh pang tui panuac pacuh pajarak di kol kanjah jhak

" Drei daok pak ini jhui pang tui, tuk halei jeng thau cambaih bruk tacei pato di đảng, sarak di karja. Tuk halei jeng kak kajap haong jalan ngak di Đảng piah ngak habar siam ka menuac sia puk palei drei".

Tuk labik pandiak hu sron mbon veik, taha palei, urang hu angan je daok lac kreih camin dalam bruk ngak siam sarak di Đảng, hukum di Karja.

54 thun hu tame Đảng, ong  Y Thương K’Măn daok di xã Bông KRang, huyện Lắk, tỉnh Đắc Lắc bhian hu mbaok tame dom mbang pataom gauk ginum biai di puk palei, jak ba mikva dom bangsa ngak njauk tui sarak, hukum di Karja, kham merat padang bruk jum pataom abih bangsa, Ong Y Thương brei thau, yaom lac taneh ia dak harei dak tagok, min raidiuk di bhap bini dom bangsa takik jeng daok rilo kan kandah, kol khamang jeng daok pambak tame bruk ini piah pacuh pajarak mikva cagar veik cách mạng. nan ye dom urang đảng yau ong brei ngak kreih camin, lac labik pambak tame piah ka bhap bini drei jia tui.

Meng angan je di drei, rilo taha palei daok jak ba mikva pambuak bruk cakrok du lịch bhap bini haong khik ramik ilamu. Taha Y Nuel Niê, palei Akor Dhong, ban Buôn Ma Thuột,  tỉnh Đắc Lắc brei thau, bruk ini gam daong ka mikva mboh anit ranam jang, iek praong jang ilamu meng kan mai di bangsa, gam daong ka mikva hu jien mek tame piah hu raidiuk tani tanat, khang kajap:

" Khik ramik ilamu meng kan meda tamuh tabiak dom bruk ba jien tame piah brei ka anek taco bac ta-a, ba bruk hit ngak mbang ka anek kamuan dalam puk palei. Padang ngak veik, yaih khan ilamu urang Ê đê  drei, oh lac ka tuai dalam taneh ia saoh, bo daok hu tuai negar langiu. Patagok ilamu nao gam haong du lịch piah hu jien mek tame ka bhap bini".

Tây Nguyên urak ini hu labaih 3.700 taha palei, urang hu angan je, dom urang nan, oh lac brei mboh ka ilamu di puk palei, bo daok lac gah tangin pambuak atah di karja dalam pathau khan sarak, adat hukum, ba akaok nao dahlau dalam peih ngak dom sarak, jalan ba, rik daong tani tanat raidiuk saong sron mbon puk palei./.