Dalam baoh sang sit daok di labik 30D jalan Hiệp Thành 23, phường Hiệp Thành, quận 12, TPHCM, hu sa tal bac anit ranam

Tal bac anit ranam angan ieu lac Ngọc Việt kayua sa-ai Huỳnh Quang Khải (ndih tapui thun 1991), sa urang ba jalan du lịch, padang tagok. Sa-ai Khải khan lac, yaok harei dalam khu phố sa-ai mboh hu rilo adei sit sang kan kandah, hu dom adei umo pluh dom thun min oh ka thau akhar haroh. Nan ye sa-ai haong dom urang đoàn dam dara dalam phường khang hatai brei padang tal bac ini.

Peih pato tal thun 2013, min kayua jar var rilo haong bruk ba jalan du lịch, oh hu mon dang pato, Khải brei kreik pabah mbang tal bac sa tukvak. Thun 2015, diuk pasang sa-ai Khải ba gauk padang veik tal bac. Tukvak camereip, dua diuk pasang brei pablei dom ameh hu amaik ame brei tuk lakhah piah pataom jien blei bàn ghế, blei tapuk siphau brei ka dom adei sit. Piah hu labik peih tal bac, diuk pasang sa-ai Khải mek mblang bein anak sang pacang veik, tauk tabung tôn ngak tal bac. Sa baoh bảng sit, pluh bộ bàn ghế saong labik caik tapuk, tui nan tal bac hu mbaok jaik 10 thun. Harei pandiak jeng yau harei hajan, yaok adit 6 jala, dom adei ba gauk mai bac.

Sa-ai Khải brei thau, dahlau di tuk hu jit Covid-19, tal bac hu abih tih 40 adei daok dalam quận 12 mai bac yaok harei. Meng tuk hu jit, tal bac brei padeih lavik harei, hu dom adei klaak bac tui amaik ame nao palei. Tal urak ini, daok hu 29 adei, umo meng 8 tal 19 thun. Yaom lac daok kurang rilo janih gah pandap panda, labik bac, min dom adei biak tari taring, kham merat bac da-a. Di tal bac ini, dom adei sit hu pato brei saoh, oh mek jien 2 môn bac lac Toán haong sap Việt meng tal 1 tal tal 5, langiu di nan, dom adei daok hu bac sa môn đặc biệt ieu lac “Nhân cách sống”. Diuk pasang sa-ai Khải oh lac pato ka uranaih thau bac, thau vak, thau cộng trừ nhân chia bo daok pato brei dom adei thau bruk suan, bruk njauk, thau akaok, thau iku, thau jalan ndom puac daok dang, piah praong tagok jeng menuac siam, hu kein ka palei negar. Taong abih jien piah khik tal bac lac meng jien bilan di dua diuk pasang sa-ai Khải.

Urak ini, tal bac jeng taduan hu bruk daong di dom urang ngak pahla meng pandap mbang yaok harei tal pandap bac da-a, hu padang ngak siam mekre, khang kajap jang. Meng bilan 11/2021 tal urak ini, sa-ai Khải peih hu 4 radaih bánh mì angan “chàng Béo” piah pato bruk ngak ka dom adei praong, hadei di nan piah hu jien khik tal bac. Hadei di ini, dom adei oh daok bac di tal bac gac, meda eng drei blei radaih bánh mì pablei duah jien saong padang mbang ngui ka rup drei.

Sa-ai Khải brei thau, meng tuk padang tal bac tal urak ini, sa-ai oh kanal hadar abih anek saih di drei lac hadom, min oh takik jang 1.000 anek saih. Hu dom adei urak ini hu diuk, hu pasang blaoh. Maong iek veik dom jak jeng di rilo thun dang pato, sa-ai Khải pabiar rup lac drei oh ka ngak hu hagait rilo, tok caong “dom adei diukrai hu kein laba ka puk paga, palei negar”./.

Urang lang: Mousa Phương – 13/06