Thun 2013, nai gru Thạch Thị Ngọc Trân mai pato di Sang bac PT bangsa gam bac gam daok Pi Năng Tắc, huyen Bác Aí, tỉnh Ninh Thuan. Ini lac baoh sang bac pato pakai dua pakat THCS saong THPT di tỉnh Ninh Thuận, jeng lac labik gam bac gam daok di dom anek saih bangsa takik daok dalam dua huyen bhum ceik Ninh Sơn saong Bác Aí.
Camereip abih, tuk anai gru Ngọc Trân mai pato di labik ini, sang bac jeng yau dalam huyen daok rilo kan kandah, sang bac daok kurang rilo janih, pandap pato bac jeng kurang, anek saih oh hu labik ma-in…Gam haong nan, bruk daok atah di sang, atah di adei sa-ai amaik me, sang jeng hu rilo kan kandah nan ye anek saih khin padeih bac piah nao sang daong amaik ame saong mbuan tok diuk tok pasang tuk umo daok sit biak ralo. Kham merat oh caik ka anek saih klaak bac, meng hatai anit ka nek saih, takre bruk pato bac, gru Trân haong dom anai gru, cei gru bhum ceik kham jak ba anek saih gilac veik mai sang bac, pato ka dom adei ilamu piah harei hadei praong tagok khang kajap dalam raidiuk. Gru Thạch Thị Ngọc Trân khan lac: “Dahlak haong dom gru karei ba gauk daok veik pak sang bac, mboh hu kan kandah di dom adei daok atah sang. Khol dahlak tuk halei jeng sahaneng duah, peih ngak dom bruk ka dom adei hu bui sambai harei puac adit piah ka dom adei takre bac, anit ranam sang bac. Dom bruk ngak nan hu daong ka dom adei klak padeih bac”.
Jaik 10 thun pato di Sang bac PT bangsa gam bac gam daok Pi Năng Tắc, jeng lac du nan thun nai gru Thạch Thị Ngọc Trân ngak Bí thư Đoàn trường. Lac urang pan kok đoàn dam dara sang bac, gru Trân haong kapol urang jakar Ban Chấp hành Đoàn sang bac padang tabiak saong khik ramik hu siam dom kalup kapol Mã La, daoh hari Raglai; Kalup kapol taong võ Vovinam; Kalup kapol Pacang caga tok diuk pasang tuk umo daok sit dalam sang bac. Langiu di nan, nai gru daok ja ba dom urang ngak pahala rik daong peih ngak Danak dak Pahadah caong khin ka anek saih, pabak kaya bingi var mbang huak yaok harei ka dom adei.
Dalam kan kandah tuk pato bac di bhum ceik, ani gru Ngọc Trân tuk halei jeng kham merat, jak ba rilo anek saih di sang bac hu mbaok tame dom bruk pakacah ilamu – ky thuat , sahneng duah bahrau ka dam dara, uranaih , daong gah pato megru huyen Bac Ai gam gam mek hu giải glong dalam dom thun jaik ini. Dalam tukvak adei Trượng Nữ Hoàng Ngân, anek saih bac tal 10A1 peih ngak kadha “ dalikan meng rup cih hari bangsa Raglai”, gru Trân abih hatai tacei pato daong adei ngak hu salah kadha, tapa nan piah pato pakai dom anek saih ilamu daoh hari bangsa Raglai. Kadha nan mek hu giải 3 di Bruk pakacah sahneng duah bharau di dam dara, uranaih tỉnh Ninh Thuan thun 2021. Adei Trượng Nữ Hoàng Ngân, bac tal 10A1 – Sang bac Phổ thông Bangsa gam bac gam daok Pi Năng Tắc, Bác Ái, Ninh Thuận khan lac: “Gru Trân langiu di ngak Bí thư Đoàn ye gru daok daong ka dahlak dalam bruk sahneng duah ilamu ky thuat yau kadha dalikan meng rup cih urang Raglai. Tapa nan, anai gru hu daong ka dahlak cih thaot binguk tui dalikan. Kayua hari di urang Raglai biak atah, kan thau cambiac makna di nyu nan ye dom ayut biak takik hadar. Kadha ini dahlak caong khin urang thau cambiac jang ka hari di urang Raglai. Gru Trân biak abih hatai jai, oh huac glah glar daong ka dahlak”.
Oh padeih bac megru, paglong ilamu piah buh prein ka bruk pato megru, thun 2020, nai gru Thạch Thị Ngọc Trân bac tamat danak dak thạc sĩ Vật lý kỹ thuật, sang bac Đại học Đà Lạt. Ini lac jalan pabak prein khang piah anai gru paglong ilamu pato pakai di drei. Ong Nguyễn Văn Tường – Phaok akok Sang bac Phổ thông gam bac gam daok Pi Năng Tắc, Bác Ái, Ninh Thuận ndem ka gru Ngọc Trân yau ini: “ Gru Thạch Thị Ngọc Trân lac urang gru daok ranaih min biak abaih hatai saong kham merat bac megru, sahneng duah. Dalam dom thun tapa, anai Trân hu rik daong biak ralo ka bruk di kapul dam dara di sang bac, abih di nyu lac dom bruk pakacah ilamu ky thuat, pakacah sahneng duah bahrau di dam dara, daong dom anek saih kan kandah ba drei tame siam haong bruk bac da-a. Bruk pato bac ye gru Trân hu daong ba môn vật lý jeng môn pakacah mek hu tanut biak glong dalm dom mbang pakacah tamat THPT,jeng yau asar bac da-a yaok thun”
Meng dom kham merat nan anai gru Thạch Thị Ngọc Trân hadah mbaok meta hu taduan Giải thưởng “Gru patao ranaih umo hadah krah” pakat negar thun 2022, rilo thun gam mek hu angan gru pato ranaih umo naih gheih pakat tỉnh…Ngan haong nai gru Thạch Thị Ngọc Trân, bruk bui sambai di anai lac hu ba akhar haroh, ba ilamu tal dom adei bangsa takik, daong dom adei hu peih tabiak jalan siam mekre jang ka harei hadei./.
Urang lang: Ai Nghiem
Viết bình luận