Sa-ai Thị Mai kham merat tabiak truh kan kathaot
Meng tuk khin likei saong hu anek, sa-ai Thị Mai kham merat ngak mbang, min kinh tế sang jeng daok kan kandah. Anek daok sit, pasang likei ruak kik gam gam, sang sa-ai lac sang kathaot dalam xã. Sa-ai tuk halei jeng saneng duah jalan ngak habar piah sang di drei yam tapa kan kandah, anek bhik hu raong pato siam.
Piah hu jien cai pandar dalam sang, sa-ai nao mek asal pa-aok blait mai sang ngak. Yaok harei sa-ai ngak hu 15 kg, duah hu meng 100 tal 150 ribau đồng. Blaoh sa-ai likau tame ngak ghing gaok di hợp tác xã raong glang Xuân Phú haong jien bilan 3 triệu đồng sa bilan. Blaoh sa-ai Mai hu brei mesre phun jien baoh sang kathaot meng Gilang pariak sarak karja saong yaom jien labaih 20 triệu đồng. Meng phun jien ini, sa-ai nao blei 3 drei limo mai raong. Langiu di nan, sa-ai daok pala padai 2 vụ yaok thun, pambuak haong pala tangeiy, pala hareik piah ngak pandap mbang ka athur raong, pala phun mbang baoh yau chôm chôm, panat...
Piah raong glang hu laba rilo, sa-ai Mai hu mbaok tame dom tal pato pathram pandar ilamu kỹ thuật tame dalam bruk ngak, tal bac raong glang thú y kayua Ủy ban bhap bani xã Xuân Phú peih tabiak. Meng nan bo sa-ai thau ngak van ro piah raong glang ka nyu njauk haong ilamu, khang hatai blei pabe mai raong tui jalan trang trại…Tapa palak tangin tarieng ngak, tapol limo, pabe di sang sa-ai dak harei dak rilo, jien mek tame hu tani tanat jang, anek bhik hu mbang bac ginup abih.
Tuk mboh kinh tế sang hu tani tanat, sa-ai saneng tal bruk daong dom sang kan kandah jang. Meng labik lac urang dang akaok dhar kapul urang kamei ấp Bình Hòa, xã Xuân Phú, sa-ai oh lac tabiak panuac ieu saoh, bo daok ba tangin tame ngak gam haong dom adei sa-ai kamei meng raong glang, pala drak tal dom bruk iek glang anek bhik yaok harei. Sa-ai Thị Mai khan lac: “Dalam puk palei, drei hu tacei pato ka adei sa-ai kamei meng bruk sit, drei daong ka adei sa-ai kamei ngak mblah tui drei. Drei ngak dahlau blaoh adei sa-ai ngak tui. Pagap yau daong ka adei sa-ai kamei pala đậu bắp piah hu jien mek tame. Tacei pato adei sa-ai iek glang anek bhik. Urak ini drei daok daong ka sang jaik sang drei, sang nan gaok kan kandah nan ye taduan pajeng ba anek bhik di sang nan nao bac”.
Oh lac tok daong adei sa-ai kamei dalam ấp, sa-ai daok hu daong ka dom adei sa-ai kamei kan kandah dalam xã Xuân Phú, jak ba adei sa-ai daong gauk dak padang dom bruk ngak mbang kinh tế hu kein, laba. Dom sang halei hu manuac urang ruak kik pandik harao ye sa-ai jeng pok sap iew daong brei jien, brah, harei ngak. Urak ini yaom jien bo sa-ai Mai jak ba piah daong tagok tal labaih 30 triệu đồng saong labaih 800 kg brah.
Lac urang nao gam haong sa-ai Mai meng tuk sa-ai Mai daok kathaot, sa-ai Trương Thị Ngọc Hạnh, akaok papul urang kamei xã Xuân Phú khan lac, sa-ai Mai oh kadun likuk anak kan kandah, tuk halei jeng kham merat ba sang drei meng kathaot yam tagok tabiak truh kathaot: “Dahlau diah sa-ai Mai biak kan kandah, kapul urang kamei hu daong palagaih ka sa-ai Mai hu mesraiy jien di gilang pariak piah patagok kinh tế jang. Meng nan rai diuk sang sa-ai Mai dak harei dak ginup meda jang. Nan ye sa-ai Mai hu rilo tukvak hu mbaok tame bruk puk palei. sa-ai Mai njauk lac kareih camin sa urang jakar kapul urang kamei, urang jakar bangsa takik yam tagok meng kan kathaot”
Meng dom bruk ngak hu, sa-ai Thị Mai hu dom pakat Kapul urang kamei dalam tỉnh Đồng Nai pok brei harak meyaom. Sa-ai daok hu palih ruah lac kareih camin dalam bac megru saong ngak tui jalan hadah krah siam mekre di Wa./.
Urang lang: Jasi – 08/08
Viết bình luận