Dahlau daih, sang sa-ai Nguyễn Văn Thông diukrai meng bruk pala njam patam, phun mbang baoh min jien mek tame oh tani tanat. Atah di ini 5 thun, sa-ai mboh lac bruk pala phun si rô di sa urang nong daok di tỉnh Đồng Tháp meda tagok hu, abih di nyu nan lac baoh phun ini biak mekre, meda ngak phun cảnh, patagok du lịch sinh thái.

Nan ye, sa-ai nao tal bein si rô ini piah blei 100 phun pajaih mai pala angaok bein di drei. Meng kham merat iek glang nan ye phun tamuh siam, praong samar. Hadei di nan, sa-ai pandih pajaih pala tal urak ini hu 1.000 phun si rô bak abih 4.000 mét vuông taneh bein. Ini lac bruk ngak camereip abih, praong abih saong biak gheih mekre di tỉnh Tiền Giang.

Sa-ai Thông khan lac, phun si rô biak mbuan pala, abih takik phun jien, takik menuac iek glang, oh yau dom janih phun mbang baoh karei; khak buh, jru khik caga phun pala jeng pandar biak takik saong phun meda lac oh njaom ruak hagait. Abih di nyu lac baoh si rô biak mekre, tuk oh ka tasak nyu sambo ngu, baoh tasak sambo ngu jhuk, daok angaok dhar mboh biak mekre. Janih baoh ini tuk tasak nyu gam yamen gam mesam, pahe hasit, bhian hu pandar piah tram haong saradang ngak mật sirô, piah menyum tuk mehu ia atau ngak sambo, ngak gia vị dalam chế biến pandap mbang, biak hu yaom dalam chế biến jru tavao, ia menyum ... Ong Đoàn Văn Khanh, Yam ndok Cty TNHH Long Thuận (huyện Châu Thành, tỉnh Tiền Giang) hadei di tuk ravang iek bein si rô di urang nong ini, ndom lac: “Baoh si rô anak meta mboh mekre lo, sambo ngu biak mekre. Drei daok duah thau cambaih, meyah hu, drei pandar ngak ia iak, atau ba pabak dom janih  jru Nam tame lai srau piah ngak jeng janih jru menyum siam ka prein yava”.

Bein phun si rô di sa-ai Nguyễn Văn Thông urak ini biak hijao siam, hu baoh luac thun, dui pachreih hu rilo menuac sia atah jaik mai ravang iek, duah thau, blei baoh ngak ia menyum, blei phun pajaih mai pala saong blei phun si rô praong mai ngak phun cảnh dalam mblang bein di sang. Yaom lac bahrau 5 thun pala phun si rô, min sang sa-ai hu jien mek tame biak rilo, daong pabak parilo bruk ngak nong di palei. Ndom tal siam lagaih di phun si rô, sa-ai Nguyễn Văn Thông brei thau: “Phun ini biak mbuan pala, baoh mekre, pandar biak siam. Dahlak pablei phun pajaih saong phun ngak kiểng biak rilo, jien mek tame jeng glaong jang dom janih phun karei, pala biak bingi, tani tanat. Pala nyu mbuan jang phun kruac aik, phun kruac bhung, nyu tamuh siam dalam pandiak bhang, thu lagu, ia mbak, yaom lac oh pruh ia ka phun min phun oh metai. Anak tal meda pala rilo jang, pala pabak abih taneh, meyah hu thei caong ngak du lịch ye drei halan hatian pambuak bruk.”

Langiu di bruk iek glang bein phun si rô, sa-ai Nguyễn Văn Thông daok caik tukvak nao blei njam patam di mikva urang ngak nong dalam palei, pajeng nao pablei veik ka dom tuai, saong tapa nan yaok bilan mek jien tame hu jaik 20 triệu đồng. Tukvak tapa, sa-ai daok lac urang ba akaok nao dahlau dalam dom kapul ngak pahla di ban Mỹ Tho; rik daong pandap panda saong jak ba, ieu pataom pandap meng dom urang ngak pahla nao daong ka dom urang sang kan kandah daok dalam saong langiu tỉnh.

Sa-ai Nguyễn Văn Thông brei thau, urak ini, raidiuk sang drei hu tani tanat nan ye sa-ai hu lagaih piah nao daong ka dom urang kan kandah jang drei, bruk ngak pahla lac bruk biak takre di sa-ai, kayua "brei nao lac daok miat"./.