Urak ni, hu rilo kapul anek saih ngak bruk pahla 

Ngan song adei  Triệu Gia Hạnh, ngak pahla oh lac bruk ngak  phong trào bo lac hatai khin, bo adei hu caik dalam hatai meng lavik mai. Hatai khin ngak pahla nyu pambak tabiak meng amaik di adei. Adei Gia Hạnh khan lac: “Amaik di adei bhian rik pataom, daong ka dom urang kan kanhdah. Amaik ngak dalam kandang joa, min adei bac hu meng amaik bruk alin brei nao”.

Khan brei thau hatai sahneng ni haong amaik ame, anai gru, cei gru, ayuh sahbah, thei jeng pachreih tui Hạnh. Kayua yau nan ye, Kalup kapul pahla  YOUTH Sang bac THPT Võ Trường Toản hu tabiak rai di harei  31-12-2021. Hạnh khan lac: “Ngak pahla lac hatai khin di adei. Min, meng sit tal ni, adei oh ka hu mbaok tame sa Kalup kapul halei, yau nan ye, bruk eng drei padang tabiak song dang akaok Kalup kapul lac biak kan kandah ngan song adei. Adei patuah hu dom cei gru, anai gu dalam sang bac dong ba, dom adei saai nao dahlau dong ba”.

Tuk bahrau tabiak mbaok, Kalup kapul hu jiak  20 urang, dalam nan,  mBan chủ nhiệm kalup kapul jeng lac dom anek saih tal 12. Hadei di dom bruk ngak, Kalup kapul pachreih hu rilo anek saih di sang bac hu mbaok tame. Tal harei ni, kalup kapul hu tal 50 urang.

Tabiak mbaok Kalup kapul dalam tuk  mạng xã hội, menuac sia biak caik hatai tal bruk tantu, cambaih laih di bruk pandar cai jien pahla, kayua yau nan ye, dom urang dalam kalup kapul jeng biak tani tanat. Bahrau yam takai tame ngak bruk pahla , dom urang dalam kalup kapul halan hatain YOUTH patuah hu gru  Lê Quang Phong (gru pato môn Hóa, Sang bac THPT Võ Trường Toản) tacei ba. Tuk kalup kapul bahrau padang tabiak, gru  Phong hu brei ka dom adei nao alin brei pandap ka dom boh sang hu rai duik biak kan kandah dalam huyện. Dom mbang nao ni hu dong ka dom anek saih thau jang ka rai duik, mboh biak haniem phol, tuk lambaok ka dom urang ngak pahla ba bui sambai mai ka urang kan kathaot.

 Hadei di nan, Nyaom hu dom bruk ngak karei di drei yau: tabiak panuac ieu dong ka dom ayut sang kan kandah daok bac dalam sang bac. Bahrau ni, di bilan 4-2022, Kalup kapul  rik pataom hu jiak  25 triệu đồng dong ka adei  T.N. (tal bac  11, sang bac  THPT Võ Trường Toản). N. hu thar vak mboh biak anit: amaik metai avar, saai anek roak song N. jeng palăng lahik kayua ruak kan kandah. N. dok haong ame  song adei likei njauk ruak drah patih. Bilan 4 meng bloh, ame di N. njauk  đột quỵ song metai tuk dok nao sang iek ruak iek glang adei ni. Oh lac rik pataom jien piah dong ka ayuh gaok kan kandah, dom urang dalam kalup kapul dok pambuak pagam song  N. piah pachreih ba ayuh dalam rai duik . Hu thau, thun bac ni, N. mek hu angan anek saih tiên tiến.

  Ndom ka anai anek saih  Triệu Gia Hạnh, gru  Phong brei thau: “Hạnh lac anek saih naih joi, sami samar, abih hatai dong ka ayuh sahabat . Adei ngak hu tong abih bruk dalam nyaom, thau rami ramik, ngak siam bruk  tổ chức; jalan ngak bruk khoa học, cambaih laih… Hulin biak bui sambai, haniem phol tuk hu dom ayuh ranaih umo hu mbaok tame dom bruk ngak pahla. Dom adei oh hu pandap panda piah brei nao, min meda hu mbaok tame dom kapul nyaom halan hatain piah dong ka urang karei”.

Gru Lê Cảnh Thu, Hiệu trưởng sang bac THPT Võ Trường Toản brei thau: “Dom adei dong ngak brei pambak tabiak dom thoat binguk mekre di sang bac tal bol bhap, rahra. Ni jeng lac “mblang main” kein lagaih ka dom adei. Sang bac daok tacei ba jalan piah khik siam bruk ngak di kalup kapul”./.

Urang lang: Hanipha- 20/6