Harei 16 dalam bilan yaok thun, dokter Y Nham Niê, Akaok Bilai y tế xã Krông Na, huyện Buôn Đôn gam haong adei saai dalam Bilai nao tame buan Đrăng Phốk, xã Krông Na piah iek ruak, langyah gah prein yava saong ruak kik pandik harao saong dut klauk dom janih jru vắc xin pacaga ruak ka rahra bhap bini di bhum palei ini.

Bác sĩ Y Nham brei thau lac, yaok bilan Bilai y tế njauk tame tal puk palei buon bon Đrăng Phốk piah iek ruak brei ka mikva kayua pak labik ini lac puk daok dalam di bhum Bein pakat negar York Đôn, atah di Bilai y tế xã labaih 20 mbaik km. Jalan nao mai mada biak kan kandah atah bayah ngak ka mikva daok di ini alah matak mai tal Bilai y tế sa yau nan ye meda patakik pambuak haong dom janih sangka iek glang prein yava ruak kik panik harao yau ye janih klauk jru vắc xin pacaga ruak. Yaok mbang mai tal puk palei, dr. Y Nham jeng gam ba rilo binguk tame bruk mbang huak, daok dang brei ka haci hacih piah daong brei mik wa bangsa pathau paham jalan khik ramik prein yawa pasihat rup. “Di bhum palei atah biyah ini ye mikva gaok rilo ruak kik lo, abih di nyu nan lac ruak pandiak tabiak darah daok tamuh tabiak, bahrau ini lac dom jit ruak karei njom mbak meng dom labik karei jeng daok tamuh rilo. Akaok saneng di mikva pak ini jeng daok bier, mikva thau ruak meng nao gaok bác sĩ, daok bruk pacang caga ruak ye rahra daok iek bier”

Saai H’Thép Knul, daok di puk Đrăng phốk, brei thau lac:“Bác sĩ Nham tame pak ini iek ruak, langyah haong mikva di puk palei pak ini biak halain hatain, kayua tame bác sĩ ye mikva dalam puk palei hu thau jalan sangka iek glang prein yava.”

Ieu lac drei sa urang bangsa Êđê manek tabiak saong praong tagok di bhum taneh xã Ea Bar, huyện Buôn Đôn, hadei di tuk bac tamat gah Y khoa blaoh, thun 2002, saai Y Nham Niê mai ngak bruk ngak di Bilai Y tế xã Ea Bar. Labaih 20 thun kak gam kajap karo saong bruk ngak jeng ye hu labaih 7 thun ngak bruk atah di sang labaih 20km, yau nan ye saai Y Nham Niê paham thau cambaih laih raidiuk di mikva daok di bhum atah biyah, bhum tapen negar biak rilo kan daman; labik dhua jeng daok hu rilo adat cambat oh daok lagaih haong jaman urak ini, pacang jalan kan daman dalam ieik ruak, caga sihat prein yava di mikva.

Ngan haong bruk di Urang pan akaok Bilai y tế xã, bác sĩ Y Nham daok abih hatain pato tacei ka dom urang ngak dalam Bilai piah ka dom urang nan paglaong ilamo. Saai Y Sới Hwing, phó akaok Bilai y tế xã Krông Na brei thau lac:“Bác si Nham lac sa urang tuk halei jeng ba abih hatain tame ngak bruk. Yaok bilan, hadei di tuk nyaom biai chi bộ tuk halei saai Nham jeng hu ba tabiak sa jnih ruak halei piah khan, piah ba tabiak jalan caga ieik dahlau tuk bruk rah tabiak, bác si jeng hu pato tacei dahlau, ilamo di bac si hu halain hatain pathau khan ka dom adei saai di dalam Bilai, piah tuk bo bac si nao halei oh hu mbaok ye adei saai di dalam Bilai meda langyah hu ngak hu”

 Dom bruk rik prien tame di bác sĩ Y Nham Niê biak njauk iek praong, saai Y Nham oh lac sa janih lac sa urang bác sĩ naih joi ilamo, naik bruk ngak, hatai siam di gah ngak bruk bo daok ieu lac lac sa urang yau ye baoh kreih camin hadah krah gah y tế di bhum tapen negar. Kayua bruk padang ngak saong khik tani tanat hu hatai jia piah mikva anit ranam, hu daong ka bác sĩ Y Nham peih ngak jak jeng dom Danak dak y tế pakat negar ka puk palei biak hu siam lagaih./.