Mai tal mblang hamu pala măng tây xanh praong labaih 20 ha di HTX Châu Rế palei Thành Tín xã Phước Hải, huyện Ninh Phước (Ninh Thuận) jeng hu mehit mikva khan ka amuk Châu Thị Xéo, urang kumei Cam ngak Yam ndoc HTX dịch vụ ngak nong tổng hợp Châu Rế, urang tacei ba mikva dalam palei ba sambo màu hijao me-om bak mbon cuah patih, yam tagok ngak kaya meda…

Rilo thun dahlau, mikva dalam palei hu pala rilo janih phun min oh lagaih haong taneh riya nan ye năng suất biar. Tui nan, raidiuk bhap bini jeng gaok kan kandah. Oh taduan alah kan kandah, akaok thun 2018 muk Châu Thị Xéo duah tapuk bac duah thau ka dom pajaih phun pala birau di dom nông trại meng thành thị tal palei pala piah bac megru ilamu pala drak. Blaoh amuk patuah bac hu bruk pala phun măng tây xanh,  hu brei angan lac “ patao di dom janih njam” di palei Cam Tuấn Tú daok jaik taphia nan ba mai palei drei pala.

Biak tatuak drei haong bruk “ ngak ma-in min mbang biak” ngan haong phun măng tây xanh, pak dalam thun 2018 muk Châu Thị Xéo brei peih praong tagok  5 sào (lac 5.000 met vuong). Meng thau pandar dom ilamu iek glang tani tanat bo phun măng tây di amuk tuk nan mek hu jien tame meng 40 tal 50 trieu yaok bilan.

Jak jeng jang hatai caong ngan haong janih njam patao pala mangaok cuah, muk Châu Thị Xéo likau karja palei brei padang HTX. Meng di tuk HTX birau tabiak rai, yaok pluh urang nong ngak harak likau tame HTX. Tal urak ini, dak harei dak hu rilo sang urang Cam ba abih taneh pala dom phun karei tapa pala phun măng tây xanh. Urak ini HTX dich vụ ngak nong tổng hợp Châu Rế hu labaih 70 xã viên saong taong abih jeng lac urang bangsa Cam. 

Urak ini, HTX Châu Rế tblei veik abih măng tây xanh pala hu yaok harei di urang xã viên palei Cuah Patih saong dom palei Cam jaik taphia nan haong yaom tani tanat meng 40.000 tal 43.000 đồng/ kg. Abih tih măng tây xanh bo HTX Châu Rế  pablei yaok harei meng 300 tal 500 kg, ba jien tame ka urang pala măng tây hu tani tanat saong ba bruk ngak gam gam ka 10 urang ngak sdi HTX.

Tal urak ini, taong abih mblang hamu praong pala măng tây xanh di HTX jeng hu pala saong iek glang tui tanut chuan VietGAP, tok pandar khak hữu cơ piah khik brei hacih sa-at. Gam haong nan lac pruh ia patak pataom, trun jien buh tame ngak saong abih takik prein yawa iek glang, patak pataom ia pruh min ba mai kien laba ka baoh sang.

Langiu di bruk patagok kinh tế, muk Châu Thị Xéo daok kham merat rik daong saong jak ba urang rik jien tame Kadung jien daong urang kathaot, rik prein yawa tame saong pandap panda padang ngak 2 baoh sang jrum pataom ka urang kathaot, rik jien tame padang Camera an ninh, tổ an ninh xung kích, tổ bhap bini tự quản…Gam haong nan, daok hu tacei jalan, ba bruk ngak yaok harei ka 60 urang dalam palei saong jak ba 11 baoh sang alin hadiah brei labaih 3.000 met taneh piah ngak jalan nao dalam mblang hamu praong pala măng tây xanh, daong ngak brei mbaok meta palei Cuah Patih  jeng yau xã Phước Hại (huyện Ninh Phước) dak harei dak hu salih birau. Meng dom jak jeng dalam bruk ngak nong, rik daong ka bruk cak rok patagok palei pala, muk Châu Thị Xéo hadah mbaok meta taduan hu rilo harak meyaom di dom pakat, dom gah saong karja palei pok brei./.

Urang lang: Ai Nghiem -29/8/2022