Nao rah tui dom mblang hamu pala padai ndiuk hu ngak tui jalan hữu cơ, kol dahlak hu Nguyễn Trọng Nghĩa khan brei thau ka bruk sa-ai pambuak pagam haong phun padai, meng bruk glaih glar ba pajaih ndiuk cao sản meng miền Tây mai pala drak, tal bruk jak ba rahra tame ngak, pandar ilamu kỹ thuật, bloh daong ka rahra padang angan pablei salih, pablei tabiak negar langiu. Meng nan bo oh thau hadom menuac sia labik bhum ceik atah bayah hu yam tapa kan kathaot.

Ndih tapui tabiak saong praong tagok di xã bhum ceik Nam Chính di huyện Đức Linh, labik menuac sia luac thun glaih glar haong puh cakak nan ye dalam hatai di sa-ai Nghĩa tuk halei jeng caong khin mai palei ngak bruk hagait nan. Blaoh jeng ji mai tal, thun umo 30, sa-ai jeng diuk jeng pasang haong anai Duyên (urang palei Long An), dua diuk pasang ba gauk mai xã Nam Chính padang mbang ngui. Sa-ai Nghĩa khan lac: “Palei dahlak tuk nan mikva rilo meng ngak padai, min jien mek tame oh tani tanat kayua pajaih padai palei năng suất oh glaong, yaom kaom tuk trun tuk tagok, jit ruak rah tabiak gam gam. Dahlak hadar tal palei diuk dahlak daok di Long An, lac labik hu biak rilo pajaih padai hu năng suất glaong, meda duah thau bloh ba mai daong ka mikva palei drei yam tagok tabiak truh kan kathaot”. Kayua yau nan ye, yaom lac oh thau rilo ka bruk ngak hamu, min diuk pasang sa-ai khang hatai mai Long An duah thau bruk pala ndiuk.

Hadei di tuk duah thau bloh, sa-ai Nguyễn Trọng Nghĩa ba  2 janih pajaih padai ndiuk hu angan ieu lac Sáp bè haong Nếp chùm mai xã bhum ceik Nam Chính pala iek. Tuk camereip sa-ai Nghĩa jak ba dom mikva dalam xã pala min urang halei jeng oh khin. Piah ngak brei mikva hu mbaok tame pala, sa-ai Nghĩa sanya pabak brei pajaih, tacei pato ilamu brei saong blei veik abih ndiuk pala hu. “Tuk camereip bahrau pala hu jaik 7ha, biak tatuak drei lac pajaih ndiuk ini nyu tamuh biak siam, brei năng suất glaong, asar ndiuk mbong patih saong praong, njauk haong tanut pablei tabiak negar langiu. Mikva uan tabuan lo”, sa-ai Nghĩa hadar veik.

Meng dom jak jeng tuk camereip, sa-ai Nguyễn Trọng Nghĩa ieu da-a mikva tame ngak, peih praong taneh pala. Tal thun 2017, sa-ai Nghĩa jak ba gauk gar, ayut sahabat padang HTX Nông nghiệp Công Thành, ieu pataom hu labaih 4 tỷ đồng blei khak, jru, pajaih, buh brei dahlau ka urang nong peih praong bruk pala. Tal urak ini, HTX jak ba hu jaik 3.000 sang oh lac di huyện Đức Linh saoh bo daok hu rilo xã di dom huyện jaik taphia tame bruk pala padai ndiuk tui jalan hữu cơ, haong taneh praong labaih 2.000ha. “Tal urak ini, yaok thun kol dahlak hu blei jaik 40.000 tấn ndiuk di mikva, hadei di nan jao ka dom đơn vị karei chế biến bloh pablei abih tapa dom taneh ia yau Indonesia, Malaysia, Philippines...”, sa-ai Nghĩa brei thau yau nan. Ong Nguyễn Chí Dũng, 1 urang nong daok di huyện Đức Linh, tame bruk pala padai ndiuk chreih chrai khan lac: “Sang dahlak urak ini daok pala 9ha ndiuk hữu cơ. Dahlau daih, tuk oh ka pala padai ndiuk hữu cơ di sa-ai Nghĩa, năng suất padai tok hu 17 tấn sa ha yaok thun, yaom pablei oh tani tanat, jien laba takik; min urak ini năng suất tagok labaih 20 tấn sa ha yaok thun, yaom pablei tuk halei jeng tani tanat, yaok thun sang dahlak laba hu 500 triệu đồng”.

Ong Trương Quang Đến, akaok jabat ngak nong saong patagok palei pala  huyện Đức Linh brei thau: “Meng bruk daong brei dahlau tuk camereip khak drak, pajaih, hadei di nan blei veik abih padai ndiuk pala hu di mikva, bruk ngak di sa-ai Nghĩa hu daong patruh eik patrun kathaot ka mikva dalam palei, bo daok patagok hu angan padai ndiuk di huyện drei”./.

Urang lang: M.Phuong - 01/08/2022