Kadha manuac gheih bruk siam harei ini, kol dahlak likau khan ka urang Dang hadah krah ini tapa kadha vak di Nguyễn Thành hu ba tagok mblah web TTXVN, da-a mikva saong taong baih gauk tui pang:

Dalam baoh sang bahrau padang ngak biak mekre di palei Hành Rạc 2, xã Phước Bình, vil val lac bein kruac bhung, durian hijao, ong Katơr Quỳnh khan lac, tuk daok ngak bruk di xã Phước Bình, ong hu khan brei thau dom jalan ngak, sarak di Kanja ka bruk salih meng pala tangei, ngak padai di taneh puh takik kein laba tapa pala dom janih phun ngak kong, phun mbang baoh hu laba glaong. Meng thun 2016, ong pala iek phun kruac bhung kanduh hijao, durian saong jak ba adei saai, mikva dalam palei gam pala piah cak rok patagok mbang ngui.

Mboh lac taneh riya, langik tasik di Phước Bình biak lagaih haong phun kruac bhung kanduh hijao saong rilo janih phun karei, ong Katơr Quỳnh patui veik bac magru, khang hatai buh jien tame peih praong mblang taneh pala phun mbang baoh, ngak jalan pruh ia automatic, pandar ilamo tame bruk iek glang. Tal urak ini, bein phun mbang baoh praong 2ha dalam nan hu 300 phun kruac bhung kanduh hijao, 150 phun durain, gam haong pa-aok blait, chôm chôm thái, patei pala pablak di angaok taneh mbon ceik daok tamuh siam. Langiu di nan, ong daok hu raong pabui, manuk, pala bingu tapen jalan ngak gheih mekre, padang ngak sang tuan meng kan pabak ka bruk du lịch sinh thái rahra. Meng jalan ngak ini bo sang ong Katơr Quỳnh hu jien mek tame labaih 150 triệu đồng sa thun.

Maong mboh ini lac jalan meda ngak kaya mada, ong Katơr Quỳnh hu pato tacei rahra dalam palei pala 14 ha phun kruac bhung kanduh hijao salih ka phun tangei, phun padai pala di puh, jak ba mikva rik jien katung talei dien truac hadah mai palei saong kuac raok bingun, danao piah caga ia pruh ka phun. Ong Katơr Quỳnh jeng kham merat jak ba, gam haong mikva kuac rok danao ia, puh ramik jalan nao mai dalam palei, pala saong sangka iek glang phun bingu di dua gah jalan ngak gheih hijao – hacih – mekre.

Ong Katơr Quỳnh daok lac urang tuk halei jeng ba akaok nao dahlau saong jak ba hu mbaok tame peih ngak dom danak dak pakacah gauk yau ye padang ngak palei pala bahrau, pakacah gauk ngak mbang, pablei salih naih joi, daong gauk ngak kinh tế, daong ka dom baoh sang biak kan kandah. Akaok thun 2023, sang ong Katơr Quỳnh halain hatain brei labaih 330 m2 taneh piah peih mbaok jalan, cak rok patagok bruk du lich rahra.

Tui amuk Katơr Thị Gái, Phó akaok UBND xã Phước Bình, huyện Bác Ái, dahlau daih ngak akaok UBND xã, Phó Bí thư Đảng ủy xã Phước Bình tal tuk padeih huu, ong Katơr Quỳnh tuk halei jeng lac kreih camin hadah dalam bruk bac megru saong ngak tui jalan hadah krah siam mekre di Wa Ho, tuk halei jeng ba akaok nao dahlau dalam dom bruk ngak di xa, hu rahra anit ranam, jia tame saong ngak tui.

Mai tal xã Phước Bình dom harei ini, hu mboh dom bein kruac bhung hijao, durain, pa-aok blait, panat, patei bak hijao, dom baoh sang bahrau padang ngak, jalan mbak nao mai hacih saat siam gheih ngan haong dom janih bingu hadah mekre. Nan lac jak jeng di bruk kham marat oh padeih di dom urang dalam Đảng bộ, kanja palei saong dom manuac urang abih hatai jai ka bruk palei yau ong Katơr Quỳnh.

Meng dom jak jeng rik daong tame bruk cak rok patagok kinh tế - xã hội di palei, ong Katơr Quỳnh hadah mbaok mata hu Thủ tướng Rajaei alin Harak pok mayaom hu dom bruk ngak jak jeng dalam bruk bac megru saong ngak tui jalan hadah krah siam mekre di Hồ Chí Minh thun 2022; Akaok Mintri, Chủ nhiệm Ủy ban bangsa alin Kỷ niệm chương kayua bruk cak rok patagok dom bangsa thun 2009; Akaok UBND tỉnh Ninh Thuận alin harak mayaom urang nong ngak mbang naih joi hu dom bruk ngak biak gheih dalam bruk pakacah gauk “Jak ba gheih”…/.