Yaok adit, tal mon 4 biar harei suk, hadei di tuk salah bruk di sang bac  TP.HCM, sa-ai Lan nduac radaih mac nao labaih 100km mai tal bac anit ranam daok di làng bè (dalam ấp 5, xã Thanh Sơn) piah pato akhar haroh ka uraniah dalam 2 harei lac harei senecar saong harei adit. Tal mon 4 dah page harei som, sa-ai nduac radaih mai veik TP.HCM ngak bruk di sang bac.

Dalam 2 bilan padeih hè, sa-ai Lan daok veik tal bac anit ranam piah hu rilo tukvak sangka pato pakai ka uranaih daok di labik danao. Langiu di pato akhar haroh, sa-ai daok sangka tal bruk mbang huak, ndih daok di dom adei. Saai daok hu peih pablak tame dom bruk daoh tamia, ngak bui, me-in sambai. Nan ye, uranaih di làng bè biak takre mai bac.

Sa-ai Lan khan lac: thun 2011, sa-ai saong dom ayut mai ấp 5, xã Thanh Sơn piah ravang iek, gam ngak pahla. Ấp 5 lac bhum atah bayah di tỉnh Đồng Nai, jalan nao mai kan kandah, raidiuk di bhap bini daok pak ini biak kan kandah. Hadei di tuk mboh dom adei sit labik ini oh hu nao bac, thun 2012 sa-ai halan hatian nao tal labik ini piah pato akhar haroh ka dom uraniah di baha đạo tràng Liên Sơn.

Hadei di labaih 7 thun peih tal bac anit ranam di baha, sa-ai Lan haong Đại đức Thích Chơn Nguyên hu pato ka dom adei bac tamat THPT. Dalam nan, hu dom adei bac tamat đại học, cao đẳng saong duah hu bruk ngak, tani tanat raidiuk. Tal thun 2018, hadei di tuk tamat tal bac anit ranam di baha, sư thầy daok hu peih tal bac anit ranam di langiu danao Trị An. Kayua uranaih di danao rilo meng lac anek bhik di Việt kiều Campuchia mai ini daok, raidiuk biak kan kandah saong oh hu nao bac. Sa mbang tra sa-ai Lan nao gam haong sư thầy piah raong pato dom adei.

Meng nan, yaok harei puac adit, sa-ai nduac radaih nao labaih 100km piah mai pato akhar haroh ka uraniah làng bè. Taphia dom mbuan lagaih ye sa-ai Lan jeng gaok rilo kan kandah, meyah oh khang hatai yam tapa, lac biak kan piah ngak hu. Sa-ai Lan brei thau, jalan nao tal labik tal bac anit ranam biak atah bayah, abih di nyu lac labik jalan nao tapa dom xã: Mã Đà, Phú Lý huyện Vĩnh Cửu saong Thanh Sơn huyện Định Quán daok dalam glai, dua gah jalan biak joa. Abih di nyu lac harei hajan ngin, jalan dak joa lange jang, meyah phun kayau jaleih atau radaih khut ye oh hu thei daong. Hu tuk jeng mboh huac, khin kadun likuk, min tuk sahneng tal dom uraniah di lòng hồ ye sa-ai khang hatai nao.

Luac 12 thun kak kajap haong tal bac anit ranam, sa-ai Lan hu rilo bruk, ngak ka sa-ai kanal hadar miat. Sa-ai khan lac, bilan hè di 3 thun dahlau, dalam sa mbang sa-ai Lan daok pato di tal bac anit ranam ye mboh sa adei kumei dang gah langiu pabah mbang tal bac maong tame bo oh tame bac. Sa-ai duah thau ye thau lac adei ini umo 16 thun saong oh ka thau akhar haroh. Hadei di nan, sa-ai  Lan nao tal sang jak ba, daong ka adei khang hatai tame bac.

Đại đức Thích Chơn Nguyên di baha đạo tràng Liên Sơn ndom lac: “Sa-ai Lan pato di tal bac anit ranam dalam rilo thun tapa. Yaok adit, sa-ai jeng nduac radaih mac meng TP.HCM mai Đồng Nai piah pato bac ka uraniah kan kathaot bloh nao veik TP.HCM piah ngak bruk. Luac 12 thun tapa, yaom lac harei padeih lễ, Tết atau padeih hè, sa-ai jeng oh ka padeih sa harei pato halei. Kol dahlak biak iek praong sa-ai ka hatung hatai abih drei daong dalam joa kandang di sa-ai Lan”./.