Nao tal ấp Tắc Gồng, xã Tham Đôn, huyện Mỹ Xuyên sua tangi tal ong Lâm Văn Phấn thei thei jeng thau tal, kayua ong oh lac sa kareih camin hadah krah dalam bruk ngak mbang ngak huak bo daok lac sa urang hu angan je di puk palei, “labik pambak tame” di urang kathaot saong rik daong biak rilo dalam bruk dak padang phum sóc ka nyu siam gheih. Tal harei ini, ong Phấn hu jak ba sang drei saong dom urang ngak pahla rik daong jien padai padang ngak bahrau saong pasiam veik 4 jalan saong 6 mbaik tatua palei, daong ka bhap bani nao mai mbuan laghaih, blaoh daok jak ba mikva hu mbaok tame pala bingu 2 gah jalan ngak brei ka mbaok meta palei pala hu hijao – hacih – mekre. Ong daok hu daong yaok pluh tấn brah haong jien iek ruak ka dom urang ruak kan kathaot,...

Atau yau ong Trần Cang, daok di ấp Phú Thành, xã Phú Tâm, huyện Châu Thành, hu jak ba dom urang ngak pahla hu jaik 20 tỷ đồng piah daong ka yaok ribau urang hu rai diuk kan kandah. Langiu di nan, daok hu labaih 2.000 baoh sang kan kandah, hu manuac dalam sang metai lahik oh hu jien piah blei hòm ye hu ong daong; saong labaih 500 urang prong thun hu ong daong jien blac raih meta… Ong Trần Cang brei thau: “Hatai caong ngak pahla di dahlak hu meng sit mai, rilo labik hu rilo menuac gaok kan kandah, ruak kik dahlak thau ye dahlak daong. Tuk drei daong hu ka mikva ye drei mboh biak bui sambai, kayua drei ngak hu sa bruk biak hu makna. Urak ini yaok thun jeng hu urang ngak pahla dalam negar, langiu negar daong ka bruk ngak di dahlak. Dahlak biak bui sambai kayua thei jeng pachreih tui. Nan ye, dahlak njauk ngak ka nyu siam”.

Dalam 5 thun tapa, urang hu angan je di Sóc Trăng peih ngak hu jaik 3 ribau mbang pathau khan, jak ba ngan haong labaih 149 ribau mbang urang hu mbaok tame, tapa nan, rik daong biak prong tame bruk ba dom jalan ngak, sarak di Đảng, hukum di Kajar tal bol bhap rah ra di puk palei. Langiu di nan, daok kham merat pathau khan, jak ba bhap bani hu mbaok tame bruk alin hadaih taneh, rik daong jien padai, harei ngak, peih prong dom jalan nao mai dalam palei... haong yaom jien abih tih labaih 2 tỷ đồng sa thun, jak ba rik daong jien padai piah gam haong karja palei peih ngak dom danak dak an sinh xã hội labaih 127 tỷ đồng.  

Tui ong Lý Rotha, Akaok Mban Bangsa tỉnh Sóc Trăng, tỉnh biak sangka dalam bruk peih ngak ginup abih dom sarak ngan haong dom hu urang hu angan je, yau: Peih bruk brei thau, pabak khau tin; bhian nao rivang, alin hadiah pandap tuk Tết Nguyên đán saong dom harei rija, roya di dom bangsa takik; daong tuk kan kandah, ruak kik; pok meyaom drah samar urang hu angan je hu bruk ngak biak gheih, brei ka urang hu angan je nao rivang iek, bac megru ilamu di dom puk palei. Ong Lý Rotha daok brei thau lac:“Mban bangsa lac jabat khik iek gah karja ka bruk bangsa dalam tỉnh daok brei panuac rik daong ka uỷ ban hu peih dom tal yau tal pabak ilamu, pabak thong tin pambuak tal dom sarak, dom jalan ngak bahrau di Đảng, Karja daok peih ngak piah ka dom urang hu angan je thau saong hu mbaok tame haong karja palei pathau khan jak ba mikva ngak hu siam jang”.

Meda ndom lac, taphia bruk lac kapul ba akaok nao dahlau, lac talei pambuak bruk di pakat ủy, karja haong bhap bani, dom urang hu angan je daok lac “labik pambak tame” dalam bhum urang bangsa takaik./.