Amuk Thị Mương (umo 57 thun), urang hu angan je bangsa S’tiêng daok di palei Bù Dinh (xã Thanh An, huyện Hớn Quản) tuk halei jeng abih hatai haong bruk ngak, hu rilo menuac thau tal. Amuk Mương urak ini lac urang đảng, akaok dhar kapul urang kumei palei Bù Dinh. Amuk bhian kakei bhap bini ngak njauk tui dom adat di karja, jak ba bhap bini saong urang bangsa takik khik sron mbon puk palei… Abih di nyu lac, amuk pathau khan ka bhap bini ngak njauk adat hukum gah agama.

Tui panuac pato di Chủ tịch Hồ Chí Minh “urang đảng nao dahlau, menuac sia dalam palei tui hadei”, dalam dom thun 2020 - 2022, anak bruk COVID-19 rah tabiak khang, amuk Mương ba akaok nao dahlau, pambuak bruk tacei pato urang kumei dalam palei saong bhap bini ngak catang tui tacei pato di dom pakat karja dalam bruk pacang caga jit ruak, kham merat jak ba dom urang ngak pahla rik daong bhap bini kan kandah, urang daok dalam dom labik njauk pacang veik...

Piah patoa veik ka anek taco, amuk hu padang saong khik ramik sa kapul tamnia kong chiêng hu labaih 30 urang, amuk hu mbaok tapak tame tacei pato, langyah brei thau ka makna, jalan pandar, jalan nao mai tuk taong kong chiêng. Langiu di nan, amuk Mương hu jak ba adei sa-ai kumei ndih tapui tui sarak karja, paglaong hatai sahneng khik caga siam mekre, hacih sa-at labik daok, abih drei hu mbaok tame dom bruk pakacah gauk anit ranam taneh ia...

Ong Khằm Thanh Sơn (urang bangsa Nùng daok di palei 10, xã Đắk Ơ, huyện Bù Gia Mập) langiu di pathau khan, jak ba mikva ngak njauk tui dom sarak, jalan ngak di Đảng, hukum di Karja, daok kham merat pathau khan, jak ba mikva oh pablei pa-ok blat meda, oh padang, oh pablei taneh. Ong Khằm Thanh Sơn brei thau, di labik ini rilo meng lac urang S’tiêng. Raidiuk di mikva daok rilo kan kandah. Hadei di 4 thun lac urang hu angan je, ong hu pathau khan, jak ba mikva oh padang taneh,, oh pablei taneh. Tal urak ini, di palei 10 oh daok bruk pablei taneh atau padang taneh tra.

Sang sa-ai Điểu Xen lac sa dalam rilo sang salih jalan sahneng, jalan ngak tuk hu ong Khằm Thanh Sơn bhian kakei, pahadar. Tui sa-ai Xen,12 thun daok di labik ini, raidiuk sang sa-ai oh ka salih karei rilo kayua sang rilo anek, takik taneh pala drak. Meng bruk pachreih ba, pathau khan di ong Sơn bo sang sa-ai kham merat ngak, oh padang, oh pablei taneh.

Ong Điểu Kiêng, Akaok Jabat Bangsa - Agama huyện Bù Gia Mập brei thau, gam haong karja xã, dom urang hu angan je hu pathau khan, jak ba mikva ngak njauk tui sarak, jalan ngak di Đảng, hukum di Karja. Bruk peih ngak dom danak dak patagok KTXH hu urang hu angan je abih drei hu mbaok tame.

Dalam tỉnh Bình Phước urak ini hu 364 urang hu angan je saong 94 taha palei. Tapa bruk ngak brei mboh lac, dom urang hu angan je oh lac ngak siam bruk pathau khan, jak ba mikva, puk palei ngak siam dom sarak di Đảng, hukum di Karja, bo daok lac dom kreih camin hadah dalam cakrok patagok ngak mbang, pala drak, ngak kinh tế naih joi, rik daong patruh eik, patrun kathaot, paglaong raidiuk dalam bhum bhap bini bangsa takik./.