Quan mbang di amuk Kim Dung hu daong ka rilo urang kan kathaot hu bruk ngak

30 thun dahlau, amuk Kim Dung hu mbaok tame Kapul urang kumei ngak pahla di ban raya HCM. Hadei di sa tukvak, amuk mboh lac drei meda daong hu ka rilo urang, nan ye amuk padang kapul pahla Thu Dung. Kapul hu nao tal biak rilo labik dalam taneh ia, alin hadiah dom baoh sang anit ranam, padang ngak dom mbaik tatua piah ka anek saih nao tal sang bac hu salamat jang, brei pandap ka dom uranaih kan kathaot, jaoh jo di rilo baoh sang kan kathaot.

Tapa dom mbang nao, amuk Dung gaok oh takik urang ranaih umo hu hatai pachreih bac min kayua sang kan kandah nan je njauk klaak bac meteh dhi, nao ngak mbang duah jien. Meng tuk nan, amuk saneng tal bruk taduan raong dom uranaih kathaot hu hatai caong bac magru. Amuk Kim Dung brei thau veik: “Dalam sa mbang dahlak nao alin sang anit ranam, tame sang ging mboh sa ranaih likei tabiak langiu jalan labik ia harei hadah piah bac. Dahlak ndem mayai ye mboh ranaih nan biak takre bac, min kayua sang kan kathaot lo. Nan ye dahlak taduan raong ranaih likei nan tal praong hu mbang bac tal labik tal dhua, hu tame đại học, bac tamat blaoh hu nao ngak. Meng nan, dahlak raong sinh viên sang kan kanthaot nao bac”.

Dalam sa mbang nao ngak pahla di Tiền Giang, amuk mboh sang saai Tám biak kan kathaot, hu anek likei angan lac Phong biak salut but, bac naih joi. Hadei di rilo thun, adei ini hu  pacacah hu tame đại học Kiến Trúc TP.HCM min sang saai oh hu jien brei anek nao bac. Amuk Dung gam raong Phong, gam brei mbang, daok oh mek jien, gam daong ka saai Tám hu bruk ngak chip di quan lisei sang amuk.

Bác sĩ Nguyễn Thị Tuyết Anh, ngak bruk di sang iek ruak Củ Chi, dahlau daih lac sa dalam dom urang hu amuk Dung daong raong. Urang kumei bác sĩ ranaih umo ini brei thau lac, thun 2014, hadei di tuk hu tame Đại học Y TP.HCM, sang oh ginup jien brei ka saai tagok ban raya mbang bac. Patuah lac tuk nan amuk Dung nao alin paok jien bac di huyện Củ Chi hu thau tal bruk di sang saai saong taduan raong adei kumei sinh viên kathaot bak hatai pachreih bac ini. Tuk camriep, sang saai Tuyết Anh biak haduh hatai tuk jao anek kumei daok di umo bahrau praong tame tangin urang bo drei oh thau. Min meng bruk pachreih ba di karja palei, sang brei anek nao. Bác sĩ Tuyết Anh khan lac, saai biak thau dhar phol saong caong bac tui kreih camin di amaik raong piah daong ka urang gaok kan kandah: “Tuk bahrau gaok anai, adei ka oh saneng lac hu sa urang hu hatai siam yau nan. Tuk mai sang anai blaoh mboh anai biak salut but, pato pakai yaok bruk meng bruk sit tal bruk praong. Adei thau dhar phol anai biak rilo. Hadei ini, adei hu bruk ngak tani tanat blaoh, adei iek ruak ka dom urang kan kathaot, uranaih kan kathaot ye oh mek jien”.

Oh lac tok hu sinh viên Việt Nam, amuk Kim Dung daok hu daong ka sinh viên Lào. Thun 2018, TP.HCM hu peih danak dak sinh viên Lào saong sang urang Việt. Amuk Dung taduan raong 2 sinh viên Lào 3 bilan. Hadei di 3 bilan, 2 sinh viên negar langiu nan caong khin daok veik suai lavik haong sang amuk, nan ye likau daok veik tal 6 thun bac đại học saong daok jak 2 ayut saabat karei mai daok. Dalam tukvak daok dalam sang, amuk Dung bhian ndem mayai nao mai haong dom sinh viên Lào ka ilamo, pandap mbang Việt saong dom bruk pambuak talei rohim di dua taneh ia.   

Langiu di bruk taduan raong sinh viên, amuk daok daong ka dom urang praong thun gaok kan kandah. Dom sang jaik taphia thei jeng thau amuk Dung oh lac sa urang hu hatai siam bo daok tapak tapaiy, nghiêm khắc. Saai Lý Phong Quốc, sang daok anak mbaok sang amuk Dung brei thau: “Anai Dung lac sa urang hu tapak hatai, nghiêm khắc, bruk halei suan lac suan, daok njauk lac njauk. Min dalam bruk nghiêm khắc nan lac hatai anit ranam, tuk halei jeng daong ka menuac sia, thei gaok kan kandah ye anai halain hatain daong brei”.

Dahlau daih lac nai gru pato sap Anh, lac urang jakar di Thương nghiệp Hợp tác xã TP.HCM, urak ini amuk Dung padeih hưu saong peih quan lisei pahla. Quan mbang hu daong ka rilo urang kan kathaot hu bruk ngak. Jien laba meng bruk pablei lisei jeng hu pandar ka dom mbang nao ngak pahla, rik daong ka bruk ngak pahla. Langiu di nan, dalam mbang jit ruak Covid-19 bahrau blaoh, amuk tuk halei jeng kham merat hu mbaok tame alin lisei brei saoh ka dom labik daok karei, ka sang iek ruak dã chiến.    

Dom kham marat rik daong oh thau glaih glar di amuk hu karja palei taong yaom glaong. Bahrau ini amuk taduan hu harak mayaom di UBND ban raya ka “dom kreih camin kandang joa saong praong glaong”. Amuk caong dom bruk ngak di drei hu pambak praong, tapa nan rik daong dak padang palei negar dak harei dak siam makre jang./.

Urang lang: Thu Thao – 04/07