Sa-ai Thạch Thị Chanl Thi – Yam ndoc Công ty TNHH Trà Vinh SOKFARM (ndih tapui thun 1989, puk Cây Hẹ, xã Phú Cần, huyện Tiểu Cần) praong tagok meng sa baoh sang ngak nong, hu nao bac, nao ngak bruk rilo saong tamat Thạc sĩ gah Công nghệ thực phẩm di sang bac Đại học Bách khoa Ban raya Hồ Chí Minh min hu hatai anit ranam palei negar gam haong takre bruk ngak pandap meng kaya nong, sa-ai klaak ban raya saong padang bruk ngak mbang ngan haong dom pandap meng ia saradang bingu li-u di tỉnh Trà Vinh. 

Khan ka bruk kan kandah dom thun camereip pandang mbang ngui, anai kumei Khmer sahaneng blaoh khan lac: Thun 2018, dahlak bahrau sahaneng tal, tuk nan oh ka thei thau mek ia saradang meng bingu li-u. Dalam 6 bilan kaok thun oh mek hu ia saradang, kan kandah akok meti lac roh duah mek saradang meng bingu li-u, hadei di 6 bilan meng mek hu sara dang. Dalam sa thun akaok meti kan kandah kateik tagok gauk, baoh sang hu hadom sổ dỏ ye dahlak ba nao padang di gilang pariak  abih piah mesre jien padang sang xưởng, peih doanh nghiep, tuk nan khat lahik ralo jeng biak trak damak.

Hu dom harei Công ty tok pablei hu sa klaok sit, 1 thun camereip lac khat ralo. Min sa-ai oh klaak bruk bo kham merat yaok harei, labik halei hu nyaom darak atau danak dak padang bruk ngak mbang lac sa-ai kham merat nao tal piah yaih khan, brei ka urang thau rilo jang ka pandap panda.

Tui sa-ai Chanl Thi, tuk ngak pandap oh buh pandap karei tame ye meda gaok rilo kan kandah, pandap oh sumu gauk meng rilo gah. Sa-ai ba abih dom ilamu bac megru hu di drei tuk daok bac saong ngak bruk di Ban Gon tame ngak  tabiak pandap siam, sumu gauk, hu siam di abih.

Urak ini, D.N di sa-ai hu 5 pandap tamo meng saradang bingu li-u nan lac: Saradang bingu li-u riak thu, saradang bingu li-u that, saradang bingu li-u tagok men ( dreih yau cooktail), giấm ia bingu li-u. Yaok pandap brei pabak tui darak karei di nyu. Urak ini, jien mek tame meng pablei pandap yaok thun tagok  200%. Ta-eng thun 2021, pablei tabiak labaih 200.000 pandap, kuhria sumu 12 tỉ đồng.

Hadei di rilo thun padang tagok, tal urak ini sa-ai Chanl Thi hu ba bruk ngak ka 33 urang ngak, ralo meng lac bangsa Khmer, yaok bilan duah jien tame meng 8 meng 10 trieu đồng. Langiu di nan, D.N di sa-ai Chanl Thi hu pambuak bruk haong 30 baoh sang pala li-u, kham merat tal thun 2025 pambuak hu 100 baoh sang urang nong. Tapa dom jalan ngak saong bruk pamong tal hu ba tabiak, sa-ai caong khin daong ka rilo urang hu bruk ngak, raidiuk hu siam mekre jang./.

Urang lang: A.Nghiem – 12/9/2022