Manek tabiak di bhum ceik Đồng Văn dalam tỉnh Hà Giang, Lưu Thị Hòa, urang kumei hu dalam rup dua darah lac bangsa Cờ Lao saong bangsa Pu Péo. Hòa lac sa dalam dom urang patuah hu bac magru. Bac tamat khoa Quốc tế học, Sang bac Đại học Khoa học Xã hội saong Nhân văn, Đại học Quốc gia Hà Nội, hadei di 2 thun ngak bruk ka dom tập đoàn dalam saong langiu taneh ia, Hòa pilih ruah jalan nao ka drei lac mai gilac veik bhum ceik patau piah ngak bruk tui hatai caong khin di drei.

Hòa mboh lac langik tasik, taneh riya di Đồng Văn lagaih ka dom janih njam patam, baoh kraoh. Meng hu thau ka bruk pala drak, ngak mbang, pablei salih kaya nong hacih hadei di rilo thun bac magru di ban ine, Lưu Thị Hòa padang hợp tác xã piah peih bruk ngak mbang meng ngak nong:“Pak ini ngak ka drei pachreih hatai sahneng tal cak rok patagok bruk ngak pambuak haong dom yaom glaong ilamo di pak ini. Yaom glaong bo dahlak caong pamaong tal lac khik ramik hu ilamo di bangsa Pu Péo, gam haong nan jeng ngak tabiak bruk meda pambuak haong rahra, ba tabiak jalan ngak mbang duah jien ka bhap bini bangsa di drei”.

Hadei di sa tukvak kham marat ngak tal labik tal dhua, tal puac thun 2017, Hợp tác xã nông lâm nghiệp saong dịch vụ pablei salih tổng hợp Po Mỷ hu padang tabiak ngan haong 7 urang, kayua Lưu Thị Hòa ngak yam ndok. Hợp tác xã ngak bruk tui jalan pacang sre, pala, ngak, pablei salih dom kaya nong di pak ini yau ye danko bạc hà, phun mbang baoh lavik thun, njam patam baoh kraoh katut harei.

Urak ini hợp tác xã hu dui pachreih saong pambuak hu rilo baoh sang urang Mông saong Pu Péo hu mbaok tame pala ngak dom janih njam patam baoh kraoh di palei saong abih di nyu nan lac pala tui jalan hữu cơ salamat. Urak ini dom urang dalam HTX jeng biak chreih chrai, kayua lac meng di tuk pambuak haong Hợp tác xã, mikva hu jien mek tame tani tanat saong rik daong patagok, khik caga dom yaom glaong di puk palei. Ong Thào Mý Thò, urang daok di xã Sủng Là, huyện Đồng Văn khan lac: “Tuk pambuak haong HTX ye tuk nan diuk pasang drei meda paik chip di puh, bo HTX mai tal puh piah mek nao pablei”.

Patui jak jeng, Lưu Thị Hòa saong dom urang daong bruk hu mbaok tame pacacah danak dak padang mbang ngui ka 4. Danak dak pataom tame peih ngak bhum pala njam hacih saat saong phun katut harei di xã Phố Là, Sủng Là, tuk camriep pambuak haong mikva, ngak tui jalan hữu cơ saong pambuak dom pandap panda hu angan je di puk palei nao tal darak pasa: “Drei jeng biak caong taduan hu bruk rik tame jang yau bruk daong meng dom kapul, meng rajaei. Kayua danak dak bo drei daok peih ngak, tui kuhria tagok tal 5 tỷ, tok padang labik lưu trú saong brei ka bruk pathau khan. Daok abih tih dom bruk padang ngak gah pambuak bruk lac drei ngak salah paje.”

Piah ka danak dak hu jak jeng, Hòa nao tal sang mikva, tacei pato mikva pandar ilamo công nghệ tame bruk ngak, ngak habar piah hu dom pandap panda kaya nong hacih. Patui di nan lac pachreih hu tuai mai tal Farm stay di Phố Là saong Sủng Là tuk tagok Bhum ceik patau Đồng Văn. Ini jeng lac tukvak pataom tame peih ngak bruk ilamo haong du lịch. Dom bruk ngak di anai Lưu Thị Hòa daok ba hatai pachreih ka rilo dam dara bangsa takik di pak ini angaok jalan padang mbang ngui, ngak kaya mada pak di bhum taneh palei drei./.