Doanh nhân Thạch Thị Chal Thi, Yam ndok Công ty TNHH Trà Vinh FARM

Meng naih gheih, gam haong bruk sami samar dalam pablei salih, doanh nhân Thạch Thị Chal Thi, Yam ndok Công ty TNHH Trà Vinh FARM daok di ban sit Tiểu Cần lac urang kumei camriep peih bruk ngak mbang hu jeng meng ia danko bingu li-u di tỉnh, ngak brei paglaong yaom phun li-u saong ba pandap tal darak pasa Hà Lan, Nhật Bản.

Saai Chal Thi menek tabiak saong praong tagok di sang ngak nong, jien mek tame mbiah. Meng hatai khang di drei, Chal Thi kham merat yam tapa kan kandah tuk bac magru saong nao ngak pah di ban raya HCM. Hadei di 07 thun bac saong pasram ngak, Chal Thi mek hu bằng Thạc sĩ saong klaak ban roya chrieh chrai mai palei padang mbang ngui haong phun li-u, lac phun pala meng kan mai di sang.

Saai Chal Thi brei thau: peih mbaok ka jak jeng ini njauk ndom tal bruk camriep lac saai pandar 20 phun li-u di amaik ame piah roh duah ngak iek, sangka buh khak, pasiam bingu li-u piah mek ia danko. Hadei di tuk ngak iek hu jeng, saai meng iek glang viek 02ha li-u piah mek ia danko.

Meng hu bac da-a glaong gam haong bruk sami samar dalam pablei salih, saai Chal Thi hu ngak tabiak danko bingu li-u that ngan haong angan je di drei. Meng ia danko bingu li-u that (ia manyum ngak meng danko bingu li-u), Chal Thi khang hatai ba ia danko bingu li-u tame mbang pacacah cak rok patagok akaok saneng peih bruk pablei salih saong padang mbang ngui thun 2018 di Kapul urang kumei tỉnh peih tabiak saong mek hu jai Nhất. Patui di nan, Chal Thi roh duah ba tabiak danko bingu li-u cô đặc, asal ca cao danko bingu li-u, saradang danko bingu li-u saong mek hu tanut chuan OCOP tal 3 patuk, 4 patuk. Piah hu pandap pabak ka darak pasa, Chal Thi hu pah mblang taneh pala phun li-u daok tabiak baoh saong pambuak haong 10 baoh sang piah pala phun li-u mek danko labaih 04ha.

Bilan 6/2019, Chal Thi hu cak rok meng sang pablei salih tagok jeng doanh nghiệp. Saai hu Kapul dam dara CS Hồ Chí Minh pakat negar, UBND tỉnh Trà Vinh, Kapul urang kumei tỉnh alin harak hu dom bruk ngak biak gheih dalam danak dak peih bruk ngak mbang, dam dara padang mbang ngui dalam tỉnh saong pachreih tui bruk urang kumei peih bruk ngak mbang, urang kumei cak rok patagok kinh tế. Lac urang duah jalan nao bahrau ka phun li-u, ba bruk ngak saong patagok jien mek tame ka bhap bini pak ini, Chal Thi hu mbao Vietnamnet pilih ruah lac urang pabak brei hatai chreih chrai dalam thun 2020. Abih di nyu nan lac dalam bilan 6/2021, Thạch Thị Chal Thi hu Thủ tướng Rajaei alin harak  manyaom naih gheih dalam bruk bac magru saong ngak tui jalan hadah krah, siam mekre di Hồ Chí Minh tukvak 2016 – 2021./.

Urang lang: Thu Thao – 28/03