Hu mbang nao haong saai Hà Ngân Kim Tới tal dom puk palei bhum atah biyah, labik hu rilo mikva bangsa Khmer daok, khol dahlak biak tatuak drei tuk nao tal halei, thei jeng brei mboh hatai iek praong, anit ranam urang kumei jakar mặt trận ini. Saai Hà Ngân Kim Tới tame ngak bruk di UBND xã Liêu Tú meng  thun 2005 saong ngak rilo bruk. Urak ini,, saai lac akaok Ủy ban MT negar VN xã Liêu Tú. Yaom lac ngak bruk hagait, saai Kim Tới tuk halei jeng ngak siam bruk di urang jakar, duh ka bol bhap rahra. Saai bhian nao tal dom puk palei piah duah thau hatai caong, dom kan kandah di rahra, gam jak ba mikva hu mbaok tame dom bruk ngak di puk palei.  

Saai Kim Tới brei thau, Liêu Tú lac labik hu rilo urang bangsa Khmer daok, meblah labaih 75% menuac sia dalam xã. Dahlau deih, raidiuk daok rilo kan kandah, rilo sang dalam xã oh hu baoh sang piah daok, nan ye saai tuk halei jeng saneng lac njauk ngak hagait piah daong ka mikva:“Drei mboh rilo sang gaok kan kandah ka sang daok, tuk nan drei khik iek gah Kadung jien “kayua urang kan kathaot”. Kadung jien  tuk nan jak ba jeng ka oh hu rilo, xã kathaot, hu rilo urang bangsa takik, baoh sang kan kathaot tuk nan jeng biak rilo. Drei meng mai likau panuac di urang par akaok, Kadung jien “kayua urang kan kathaot”jak hu drei meng pataom tame padang ngak sang daok ka sang kan kathaot. Meng jalan ngak nan thun ini drei jak ba blaoh padang ngak, thun anak drei jak ba blaoh peih bruk padang ngak, yaok thun 1 tal 2 baoh sang, ngak gam yau nan”

Gam haong nan saai haong Mặt trận negar xã jeng brei thau cambaih asal dom mbang jak ba, abih di nyu nan lac danak dak pacacah gauk “padang ngak palei pala bahrau” saong taduan hu bruk pachreih tui biak khang di rahra. Tal urak ini xã hu 15 danak dak hu peih ngak ngan haong paok jien labaih 1,6 tỷ đồng, meng nan xã  mek hu 17/19 asal kadha ka bruk padang ngak palei pala bahrau.

 Abih di nyu nan lac, dalam tukvak jit ruak Covid-19 tamuh khang, saai Kim Tới haong Đảng uỷ ba tabiak danak dak “panuac jak ba” tal dom kapul nyaom, manuac urang sa hatung hatai saong gauk pacang caga jit ruak Covid-19”, tapa nan Liêu Tú hu taduan jaik 2 ribau paok pandap saong labaih 16 rabau pok lisei ka mikva dalam labik brei daok karei, ka kapul pacang caga jit ruak. Ong Nguyễn Văn Mẫm, Phó Bí thư Đảng ủy xã Liêu Tú taong yaom:“Saai Tới lac urang hu angan je dalam kapul urang jakar di xã. Tapa dom danak dak ye brei mboh, saai ngak biak siam, abih di nyu nan lac bruk jak ba rahra, dalam bruk patruh eik patrun kathaot, saai tuk halei jeng ba akaok nao dahlau, jak ba dom urang ngak pahla, daong urang kan kathaot, padang ngak sang daok,…”

Meda mboh lac, saai Hà Ngân Kim Tới ngak biak siam bruk ngak talei pambuak di Đảng, karja saong rahra, rik daong ngak brei njauk gauk, patagok, paknag bruk jum pataom gauk dalam rahra. Saai lac sa dalam dom urang hu angan je hu tỉnh pilih ruah nao hu mbaok di Nyaom biai pok mayaom Akaok MT negar Việt Nam pakat xã saong akaok Mban ngak bruk mặt trận angan je dalam taneh ia tukvak 2017-2022 saong taduan hu Harak mayaom di Thủ tướng Rajaei meng dom bruk ngak biak naih dalam bruk ngak Mặt trận dalam puk palei./.