Amuk Thạch Thị Thiêng thun ini umo 79 thun, lac akaok Kalup kapul Anit ranam gauk di Dhar kapul urang kumei daok di puk Thốt Lốt. Amuk brei thau lac, drei manek tabiak saong praong tagok di bhum palei mesuh metak pacang kol Mỹ nan ye samar hu mbaok tame ngak cách mạng. Meng ilamo ngak cách mạng meng kan di sang, hadei di tuk taneh ia hu peih paha, yaom lac raidiuk daok gaok rilo kan kandah, amuk jeng kham merat hu mbaok tame bruk ngak di kalup kapul, rik prein dak padang palei negar.

Puk Thốt Lốt hu labaih 520 baoh sang, gam haong 2.360 urang, dalam nan, urang Khmer meblah labaih 95% menuac sia dalam puk. Jien mek tame di rahra dalam palei rilo meng lac bruk pala drak, raong glang min bhum taneh ini bhian gaok kan kandah kayua biến đổi khí hậu, năng suất phun pala bier, jien mek tame oh tani tanat. Kayua bruk mbang ngui bo jaik abih dom urang ngak dalam rilo baoh sang njauk nao atah palei piah ngak mbang pah.

Thau hu bruk nan, thun 2011, tuk hu Đảng ủy xã Ngũ Lạc ba tabiak bruk bac megru saong ngak tui jalan hadah krah siam mekre di Hồ Chí Minh saong Kapul urang kumei xã jak ba, amuk Thiêng padang kapup kapul anit ranam gauk, hu mbaok di 15 urang lac urang kumei dalam puk. Dom harei bahrau padang Kalup kapul, hu dom harei, amuk nao takai yaok piluh kilomet tal yaok baoh sang rahra jak ba bruk rik pataom jien padai, dalam tuk jalan mbak nao mai tuk nan biak kan kandah, abih di nyu nan lac di bilan hajan.

Urak ini, Kalup kapul anit ranam gauk yaok bilan hu pataom gauk sa mbang di harei 16. Tui sang duah hu jien rilo atau takik, yaok urang rik tame meng 10.000-50.000 đồng. Hadei di nan, Kalup kapul hu brei menuac nao ravang dom baoh sang kan kandah, urang ruak kik. Thau hu bruk ngak siam di amuk Thiêng, mikva Khmer dalam phum, sóc thei jeng abih drei pachreih tui.

Meng 15 urang tuk camreip, tal urak ini, Kalup kapul hu 133 urang lac urang kumei Khmer. Hu thau, meng di tuk padang tagok tal urak ini, kalup kapul hu nao ravang jaik 200 urang, haong paok jien daong meng  1-3 triệu đồng sa urang. Paok jien ini yaom lac oh praong min jeng hu pachreih ba urang gaok kan kandah.

Di dom mbang pataom gauk di Kalup kapul Anit ranam gauk, mikva daok pablak tame pathau khan dom jalan ngak di Ndang, sarak, hukum di Kanja, abih di nyu nan lac sarak dalam bhum bangsa Khmer; jak ba adei saai hu mbaok tame puh ramik labik daok, ngak hacih salamat pandap mbang, pacang caga jit ruak. Gam tui di nan, Kalup kapul daok kuhria, jak ba yaok urang kham marat ngak mbang, yam tapa kan kandah piah tabiak truh kan kathaot khang kajap, rik daong haong kanja palei cak rok patagok kinh tế-xã hội.

Bruk ngak hu makna di amuk Thiêng taduan hu bruk pachreih tui biak glaong di kanja palei, rahra dalam puk. Abih di nyu nan lac, amuk daok lac kreih camin pakat bac megru saong ngak tui jalan hadah krah siam mekre di Hồ Chí Minh thun 2023, hu Mban Tuyên giáo Trung ương pok mayaom di Danak dak “Hồ Chí Minh- Hatai caong thun 2023.”

Amuk Huỳnh Thị A - Phó Bí thư Thường trực Đảng ủy xã Ngũ Lạc brei thau lac, meng hatai anit ranam gauk, daong ba gauk, amuk Thạch Thị Thiêng lac kreih camin hadah dalam bruk bac megru saong ngak tui jalan hadah krah siam mekre di Hồ Chí Minh piah ka rai ranaih dalam palei ngak tui. Bruk ngak di amuk Thiêng hu daong ka puk paga pambuak kajap talei rohim, pambak tabiak bruk jum pataom gauk, anit ranam gauk tal bol bhap rahra./.