Dalam labik parang kaya kan saong parang iek bruk ngak bhap bini bangsa Cam di bimong kalan Po Sah Ine (phuong Phú Thủy, tinh Lam Dong) di Harei Kate thun 2026, dua palak tangin di urang likei umo langiu 60 thun capat gluh, mbeik thaik thaot, mek gluh tamo jeng kaya hu thaik thaot ngak ka rilo tuai damuai chreih chrai. Nan lac ong Lâm Hùng Sổi daok di palei Ragaok Bình Đức, tinh Lam Dong – urang pambuak pagam haong taneh, haong sambo bar di apui saong arthak hu 32 thun.

Tapa dom bruk ngak nda lac mbuan, min gah likuk sa ndap nda kaya lan lac sa jalan patak pataom ilamo saong bruk kham merat di urang ngak lan. Urak ini, ong Lâm Hùng Sổi hu jao labik ngak lan di baoh sang ka anek kamei maong iek, kayua yau nan ye ong hu rilo tukvak piah pato, yaih khan bruk ngak, daong khik ramik saong pambak tabiak ilamo siam gheih di mikva bangsa Cam.

“Asal dahlak jeng yau dom urang ngak lan..."

Amuk Lâm Thị Thu Điệp, gru pato Sang bac Pho thong Bangsa gam daok gam bac Bắc Bình, tinh Lam Dong brei thau, thau ka danak dak pato megru 2018, sang bac ba ilamo dom bangsa tame mon bac langiu tukvak saong hu da-a ong Lâm Hùng Sổi ngak iek bruk ngak lan di urang bangsa Cam.

“Xa Bắc Bình ieu lac bhum palei hu rilo mikva urang bangsa Cam diukrai, na hu rilo yaom kaom ilamo gheih karei di bangsa Cam, rilo urang ngak lan, menyim jih dalah saong pato dom janih phling ragam bangsa nan bruk daong sang bac dalam dom tiet bac langiu tukvak biak lagaih. Dom adei sa-ai daong yaok labik yaok tukvak, tuk sang bac khin pato ilamo bhap bini bangsa”.

Bruk ngak lan Bình Đức hu meng lavik mai, hu dom baoh sang urang Cam di ini khik tani tanat tapa rilo rairah. Dom ragei nghe nhan Bình Đức meng dahlau main gak lan haong ilamo saong jalan ngak meng tangin bhap bini bangsa.

Dahlau diah palei ngak gaok glah lan am Bình Đức hu labaih 100 baoh sang rahra ngak lan, urak ini tok daok jaik 20 baoh sang daok pagam haong bruk ngak. Dom baoh sang salih tapa bruk ngak lan meng tangin, daok lac ngak lan pandar dalam sang, yau ye: trã, gaok, lò ging, gaok tuh bánh xèo, lu padang breh … Min, urak ini kayua pandap tamo ngak gluh, njuh cuh dak harei dak takik, yaom glaong nan dom baoh sang ngak lan jeng oh daok mbak sarak haong bruk ngak meng dahlau:

“Bruk ngak lan di palei Bình Đức kan kandah ka gluh. Gluh urak ini nao mek biak kan. Pok panuac ndom tagok ka habar piah hu labik taneh, meng nan meng khik hu bruk saong pato ka rairah sit umo harei hadei, khik framik palei ngak bruk di drei dak harei dak patagok jang”.

“Palei ngak lan am Bình Đức hu taduan lac palei ngak bruk bhap bini pakat Negar thun 2012, min, urak ini mikva nghe nhan biak duh hatai. Ngan haong hatai tian, caong takre di mikva ba tabiak asal kadha, pok panuac ka bruk quy hoach labik kaya tamo piah ngak lan ye mikva urang meng sahnang hatai, meng kham meratjak ba piah khik ramik palei ngak bruk di mukkei caik veik meng kal mai”.

Harei Kate di urang Cam Ahier thun 2026 di bimong kalan Po Sah Ine kareik gilac, min thaik thaot urang likei Cam dang ngak lan bhap bini gam haong asal kadha khik ramik bruk ngak di ong hu ngak jeng siam gheih dalam tung tian mikva urang bangsa Cam saong tuai damuai dalam negar saong dunya./.