Mai tal palei Phước Phong, xã Thuận Hòa, ban Cần Thơ, bruk dahlau di abih kol dahlak hulin hu pang di mikva lac dom panuac pok mayaom duh ka urang kumei akaok Mban Bhap bini palei ndih tapui thun 1990, nan hu saai Thạch Thị Diễm, lac sa urang kumei jakar ranaih umo biak naih, tuk halei jeng ba abih hatai daong brei ka rahra. Thei thei jeng anit ranam. Kayua mboh dom labik jalan mbaih mbaoh jeng hu urang kumei ini jak ba rami ramik ngak pasiam biak samar; atau dom uranaih caga mbuan klak bac jeng hu saai caik hatai, jak ba mai gilac veik sang bac. Amuk Nguyễn Thị Như, daok di puk Phước Phong, xã Thuận Hòa brei thau lac:

"M’Diễm biak sami samar, labik jalan halei hu ia ndauk gait jak ba rami ramik ngak pasiam chip. Urang praong thun jeng hu daong samar drah. Pak ini jaik abih thei thei jeng anit ranam Diễm, thei thei jeng ndem lac Diễm biak siam, biak naih joi."

Manek tabiak saong praong tagok di palei Phước Phong, saai Thạch Thị Diễm thau cambaih dom cuang kandah dalam raidiuk di mikva. Maong mboh dom salih bahrau yaok harei di bhum palei gam saong dom bruk sahaneng di urak ini, saai tuk halei jeng caong ba hatai rik prein tame dak padang palei dak harei dak cak rok patagok.

Palei Phước Phong, xã Thuận Hoà ieu lac sa baoh bhum palei hu labaih 80% mikva bangsa Khmer raidiuk. Lac urang Khmer, saai Diễm hu rilo kein lagaih dalam bruk pathau khan, jak ba. Kayua thau sap ndem panuac puac, adat cambat saong thau cambaih raidiuk di mikva, saai mbuan jang bruk pathau khan dom jalan ngak, dom sarak di Ndang saong Kanja tal yaok baoh sang hu jaik jang, mbuan thau, mbuan ngak. Saai Thạch Thị Diễm brei thau:

"Dahlak tuk halei jeng pambuak saong rahra, nao tal yaok baoh sang piah mayaih khan ka jalan ngak danak dak kế hoạch hóa baoh sang, sangka brei ka uranaih. Gam saong dom urang praong thun daok sa drei jar, dahlak jak ba dom urang ngak pahla ngak dhar phol daong ndap nda yaok bilan. Di tuk lễ, kalup kapul dalam puk jeng nao rivang, alin pandap. Kayua dahlak lac urang Khmer, mikva pak ini rilo meng lac mikva Khmer nan ye bruk pambuak gauk, pathau khan jeng biak mbuan lagaih."

Oh sa janih sangka tal raidiuk daok dang, mbang ngui saong bruk ngak mbang blei salih, saai Diễm daok sahaneng tal bruk bac daa di anek kamuan dalam bhum palei. Bhian lac urang hu bac gah pato magru, saai tuk halei jeng caong dom anek kamuan di bhum palei mikva urang bangsa Khmer hu nao tal sang bac ginup, hu bac tagok glaong piah hu kein laba salih mbaok mata raidiuk. Saai Thạch Thị Diễm daok brei thau lac:

"Ngan saong dom adei gaok kan kandah, dahlak akau tuk halei jeng jak ba sang dom adei nan kham marat brei ka dom adei bac tal takik abih di nyu abih tal 12, atau takik di abih jeng hu bac salah tal tal bac 9 piah hadei di ini hu kein lagaih piah duah bruk ngak hu siam sanang jang. Daok dom adei tapa umo nao bac, sang kan kathaot lo, oh thau akhar atau klak bac meng tal 1, tal 2, dahlak kuhria peih tabiak tal bac anit ranam di tukvak masa melam, labaih klau var yaok adit piah ka dom adei thau puac, thau cih vak akhar huruh."

Ngan saong bruk dang pato magru yau hatai caong tuk camriep, saai Diễm hu pilih ruah jalan pambuak saong labik, ba prein ranaih, bruk pambuak saong hatai ngak bruk piah pabak ka puk palei. Meng bruk sangka brei ka raidiuk di mikva, daong ka dom urang oh hu ilamo tal bruk kuhria peih tabiak tal bac anit ranam ka dom uranaih oh thau akhar tapak, saai dak harei dak rik tame ngak salih bahrau mbaok mata di palei Phước Phong. Saong meda ndem lac, saai Thạch Thị Diễm daok vak tabiak sa dalikan biak gheih ka urang jakar pak di labik abih hatai daong ka bhap bini rahra./.