Ndih tapui thun 1988, Kim Ngọc Hảo praong tagok dalam baoh sang kan daman di ban Châu Thành, tinh Vinh Long. Umur 19 thun, tuk daok di dalam kapul bon lin, saai hu tame daong brei alin hadiah darah di drei tui sap ieu di urang pan akaok kapul bon lin di drei. Dar tal mbang brei darah meng tuk camareip, saai Hảo khan mayai lac:

 “Dalam bon lin jeng hu danak dak daong brei darah alin hadiah, urang pan akaok lac mayah hu preih siam ye daong brei darah hadiah, mong ye daong ka bhap bini rahra. Akau nao ieik blaoh daongbrei alin hadiah darah. Alin blaoh mboh siam, yau nan ye mboh hu brei thau akau brei alin darah chip.”

 Mai meng akaok saneng bruk ngak pahhala siam makre jeng ye hu bui sambai mai pachreih rup drei brei hadiah darah daong urang. Hadei tabrak di bon lin, Hảo nao duah bruk jaik labaih 10 thun di Ban Raya Ho Chi Minh, gam ngak pah gam bac cakak mbuk. Raidiuk mada daok kan daman, saai oh padeih brei hadiah darah. Thun 2018, saai gilac mai palei, peih kadai cakak mbuk mapao akaok blaoh jeng lakhansaong sa urang tuai krein. Mda raidiuk oh ka labaih mbang angui yau urang, Hảo tuk halei jeng peih baoh hatai hadiah alin darah ngak dhan phol. Tui saai, daong brei darah ieu lac sa bruk ngak siam praong glaong jeng ye janih sambai bui dan saong prein yawa. Saai ndom mayai lac:

“Ndom mayai lac harei camareip daong brei darah mai, drei papah rup sa harei, mbang huak paganap, oh ngak bruk trak. Gam 4 harei hadei di nan ngak bruk biasa yau habhian. Brei daong hadiah darah ngak rup pabhap brei salih jao ia dalam rup siam gheih jang, kayua lac darah tabrak drei mbang huak hu prein brei hu darah barau tamuh.”

Pih hu preih khan siam ka dom mbang brei daong darah, cei Hảo tuk halei jeng kuria mbang huak ganap prein yawa, pasram rup saong main pahat padhit thể thao. Saai brei thau lac daok dam daok hu prein yawa oh dreih kanda di hagait. Yaok sa mbang brei darah, saai mboh akaok aku rup pabhap chreih srai siam makre bui sambai yau bhian kayua drei thau lac darah di drei mada daong pahadiuk urang ruak daok caong khin. Rup hatai anit ranam raidiuk di cei Hảo mada njom patambak tapa ralo urang vin taom dar, dalam nan ralo di abih tal dom dam dara palei.

Dom kham marat di cei Kim Ngọc Hảo hu taduan harak mayaom, harak brei angan di ban di huyen Châu Thành. Kapul Pahasa Chu thap do huyen daok pok harak tagok pakat tinh Tra Vinh brei mayaom piah pok angan siam di baoh kreih camin dah krah ini. Ong Lê Hoài Linh, Akaok Kapul Chu thap do ban Châu Thành, tinh Vinh Long mboh lac:

 “Adei Hảo urang biak hu hatai brei ka bhap bini, gam tui hatai anit ranam adei khin daong brei ka raidiuk. Sang danaok di adei mada daok kan kathaot, yaok sa mbang daong brei darah mboh adei brak bui sambai chreih rup tame, daong sa tangin brei ka ban saong huyen ganap siam dalam bruk brei jao.”

Bruk brei daong darah tui hatai di ban Châu Thành, tinh Vinh Long mada brak mboh chreih makre, min dom thun barau jaik di ini, tuk sarak karja daong jien brei ka urang brei darah trun, dom urang daong brei darah jeng trun takik tui. Dalam tuk nan, darah anit ranam dalam rup di Kim Ngọc Hảo mboh brak mayaom. Saai oh lac hu sa janih tuk halei jeng ba pachreih brei ka ban Châu Thành jeng sa labik nao dalau dalam bruk jak ba gauk daong darah hu angan di dalam huyen.

Kim Ngọc Hảo – sa urang jang cakak mbuk biasa yau urang bhian min hu baoh hatai anit ranam – brei thau lac, mayah hu hatai, anek manuac jeng brei hu baoh siam makre. Camin kreih hadah di saai daong ba pachreih urang daong alin hadiah darah di tinh Vinh Long jeng ye di dalam nagar dak harei dak ralo, kayua sa bhum jamaah bak dom anit ranam gauk./.