Amuk Chế Thị Lanh, daok di palei Phan Dũng, xa Tuy Phong, tinh Lam Dong brei thau, mikva di ini thei thei jeng iek praong amuk Hoàng Thị Sông. Amuk Sông tuk halei jeng nao dahlau, jak ba mikva daong prein padang palei pala bahrau, salih bruk randap, adat cambat oh daok lagaih. Amuk jeng rilo mbang pambuak haong kapul chuc nang jabat karja langyah dil samu dom gar tavak di mikva:

"Ngan haong amuk Sông lac urang hu angan je dalam palei, amuk Sông jeng dui ba palei pala ngak mbang hu patagok kinh te baoh sang, mikva dalam palei thei thei jeng anit ranam amuk, thau dhar phol amuk kayua hu daong prein gam haong karja palei ba dom that tiak, caong khin di mikva ngan haong Ndang, Karja, daong padang palei pala siam gheih jang, brei kein lagaih ka baoh sang kathaot, kan kandah dalam palei uak drei tagok dalam raidiuk."

Hadei tuk padeih ngak bruk, amuk Hoàng Thị Sông hu pakat uy, karja saong mikva daok di palei Phan Dũng pok amuk ngak Urang hu angan je. Tukvak akaok taduan bruk, amuk Sông hu kham merat bac tangi, pabak ilamo piah ngak siam bruk di drei.

Amuk Sông brei thau: Thau lac bruk hu makna di bruk pathau khan, kayua yau nan, amuk gam haong chi bo palei saong kapul,ngak bruk pagam, salih bahrau dom bruk pathau khan tapa dom var taom mbaok, loa papar sap, pathau khan meng pabah, mang xa hoi rahra... tapa nan ngak jeng bruk pambak tabiak bruk gak tui, ba drei tame di mikva.

"Hu Ndang, Karja sangka, mikva pok dahlak tagok ngak urang hu angan je, dahlak jeng njauk hatai ngak urang hu angan je piah daong mikva dalam palei, hadei ini anek taco mek nan bo ngak tui, piah mikva palei pala drei hu padaong, hu kan kandah hagait ye dang atbiak langayh ba pasiam brei ka mikva."

Langiu di nan, amuk daok pambuak haong mbang dui ba palei jak ba mikva ngak bruk kali kalih dalam ndang likhah, ndam matai lahik pacip padhi, tayah klak dom adat oh daok lagaih, bruk caik dahlau ka anek khin likei khin kamei saong khin gauk dalam but pajaih…Amuk Sông daok srap gap jak ba urang jakar, urang ndang, mikva raglai dalam palei Phan Dũng gul pataom, kham merat pandar dom ilamo ky thuat dalam bruk ngak mbang pala dom janih phun mbang baoh, njam patam, padai, athur raong piah parilo jien mek tame…

Sa-ai Mang Hiếu, Akaok palei Phan Dũng, xa Tuy Phong, tinh Lam Dong brei thau, yaom lac sa urang praong thun, min amuk Sông tuk halei jeng naih gheih dalam dom danak dak bruk ngak di bhum palei. Amuk Sông hu jak ba mikva dalam palei khik ramik adat cambat siam gheih di urang bangsa Raglai; padang dom danak dak ilamo piah pataom, jak ba kapul gul pataom; hu mbaok tame bruk ngak pasiam jak jeng rilo bruk srau kadau di dom urang dalam baoh sang, mikva bhap bini, oh luai rah tabiak bruk “pandiak”, tapa nan khik ramik bruk sron mbon dalam labik daok rahra.

"Gam saong bruk ngak urang akaok palei, dahlak hulin mboh anai gait lac sa urang biak buh abih hatai tian, tuk halei jeng ngak siam dom jalan di Ndang, sarak hukum di karja, tuk halei jeng jak ba dom baoh sang rahra jeng yau mikva Bhap bini je abih tame bruk dui ba di ndang jeng yau bruk dui ba, pasang iek di Karja, patagok hatai gul pataom bangsa di mikva dalam palei. Langiu di nan, tuk palei peih bruk nyaom biai, anai Hoàng Thị Sông ngak njauk ngak siam bruk ieu da-a nyaom biai di Mbang dui ba palei."

Meda mboh yaom lac taduan rilo bruk di rahra palei pala haong bruk di sang danaok, min amuk Hoàng Thị Sông oh huac kanda ka kan kandah, kham merat salah blaoh siam ka bruk hu jao. Tapa nan, brei mboh bruk di Urang hu angan je jeng yau labik dang di urang kamei raglai dalam rahra, daong gam haong karja, padang palei pala dak harei dak patagok./.