Dahlau diah, jalan mbak lac sa bruk duh hatai abih di rahra puk palei Trà Canh B. Jalan haluk biak sit ganik, tachak janal di bilan hajan, bruk nao mai, pablei salih, anek kamuan nao bac jeng gaok rilo kan kandah.

 Ngan haong bruk ngal lav Bi thu Chi bo, ong Lý Đông hu nao yaok jalan, khan yaok baoh sang, pang panuac ndom meyai, hatai caong takre di rahra piah duah thau jalan taoh talaih. Ong hu kham merat jak ba rahra kaoh taneh, rik prein, rik jien, saong hu bruk daong di gah ngak ngak pahla piah gam haong karja padang tatua, ngak jalan. Ong Lý Đông, Bi thu Chi bo puk palei Trà Canh B, brei thau: "Dahlau diah, bruk ngak mbang di mikva daok rilo kan kandah kayua jalan mbak oh ka hu lagaih. Taphia nan, bruk pala drah, raong glang jang oh ka hu ginup ilamo. Meng nan, dahlau ieu pataom rahra nyaom biai, jak ba mikva jum tangin padang jalan mbak, tatua palei pala piah bruk nao mai, pajeng ba hu lagaih. Gam haong nan, paglaong bruk ngak mbang".

Oh tok lac jak ba meng panuac ndom, ong Lý Đông tuk halei jeng lac urang ba drei nao dahlau dalam grauk danak dak. Meng bruk rik daong jien padai tal harei ngak bruk, ong jeng tapak ba drei tame, brei hatai je piah mikva gam haong gauk ngak. Meng nan, rilo jalan, tatua palei pala hu padang. Ong Thạch Al, rahra daok rilo thun di puk palei Trà Canh B, brei thau: "Urak ini nao darak meng radaih abih paje, dahlau diah nao tabal takai di angaok taneh haluk biak atah. Blaoh ong Đông daok jak ba mikva gam haong gauk jah hareik di dua tapen jalan ka praong laneing lanoi".

Oh lac duh hatai di bruk tatua, jalan, Bi thu Chi bo Lý Đông daok sangka iek praong tal dom baoh sang kathaot, baoh sang kan kandah di bhum palei. Tui ong, “hu labik daok tani tanat” lac kein lagaih hu makna piah mikva sahnang hatai ngak bruk, uak drei tagok dalam raidiuk. Yau ye baoh sang sa-ai kamei Thạch Thị Linh Đa, kayua baoh sang kan kandah nan brei daok dalam baoh sang tadai taik tahak. Mboh yau nan, thun 2021, ong Lý Đông hu jak ba gah ngak pahla daong padang baoh sang bahrau karo kajap, gam haong rilo ndap nda kaya pandar dalam sang. Meng nan, baoh sang sa-ai kamei Linh Đa dak harei dak tani tanat raidiuk.

"Dahlak bui sambai lo. Tuk mboh ndap nda kaya padang sang hu pajeng tame, dahlak uan haok ia meta. Tok sa drei pasang dahlak lac nao ngak duah jien, dahlak ye raong dua anek sit nao bac nan oh thau tuk halei ka meng padang hu sa baoh sang yau nan. Urak ini ye hu sang daok karo paje, baoh sang dahlak brei kham merat ngak mbang piah samar uak drei tagok, patruh bruk eik lipa".

Dalam luac labaih dua pluh thun ngak Bi thu Chi bo puk palei Trà Canh B, ong Lý Đông jeng sa labik pambak hu angan je, lac sa talei pambuak karo kajap di Ndang saong rahra, abih di nyu nan lac mikva bangsa Khmer di bhum palei. Ngan haong buh abih hatai tian saong hatai thau ka bruk di drei, ong oh tok jaik taphia rahra, jaik jabat karja blaoh daok samar chip pathau khan dom jalan ngak, sarak, hukum di Ndang saong Karja tal yaok baoh sang. Ndom ka Bi thu Chi bo buh abih hatai tian, amuk bà Trần Thuỵ Trúc Thanh, Phaok Bi thu Thuong truc Ndang uy xa Thuận Hòa, ban raya Can Tho, brei thau: “Dong chi Lý Đông hu rilo bruk ngak hu srap gap dahlau, hadah krah dalam bruk jak ba rik daong jien, rilo meng lac jak ba padang jalan mbak tatua palei pala. Dong chi hu jak ba padang rilo tatua, danak dak hu yaom kaom praong, rik daong pambuak jalan mbak saong daong prein hu makna ka bruk patagok kinh te – xa hoi di bhum palei.”

Labaih 20 thun pagam haong bruk ngak Bi thu Chi bo, ong Lý Đông hu caik veik inem di drei meng baoh tatua khang kajap, dom jalan brei patagok phum soc saong dom baoh sang anit ranam…Meng bruk buh abih hatai tian, jaik taphia rahra, thau ka rahra di urang jakar jabat karja nan, hu jum tangin ba puk palei Trà Canh B harei ini daok dak harei dak salih bahrau, trei sir jang./.