Ndih tapuk jak jeng tagok di sa baoh sang hu angak kham marat bac magru, meng harei daok di dalam kik di sang bac, nai Văn Thị Kim Nương caong khin jeng nai gru pao bac. Tamat sang bac sakolah mateh Su pham Ninh Thuận (klak) thun 1993, nai gru hu brei nao pato di pho thong co so Phan Thanh, hadei di nan nai hu brei nao pato di ralo sang bac di bhum xa Bắc Bình. Thun 2013 nai hu brei pok ngak Phaok Akaok sang bac Tieu hoc Phan Hiệp.

30 thun dalam pato bac, labaih 10 thun ngak urang pan akaok iek glang pato magru, nai Kim Nương tuk halei jeng bac magru mbeik pachram pilih panuac ruah mayai ndom puac daok dang manuh maneng saron mbon tani tanat ilamu bac magru. Tui hatai “Pato bac yau ye truac hadah tagok dalah apui caong takre”, nai Nương tuk halei jeng ba hatai kham marat peih ralo cara gigah pato bahrau, peih pachreih bac magru, cambaih cakeih ilamu dah krah di anek saih. 

Gam pato sap Viet, gam pato sap Cam oh lac mbuan, tui nai gru Nương, kan abih di nyu hu lac panuac ndom mayai palei karei tui baoh panuac tame dalam tauk bac magru. Kayua yau nan ye, nai oh padeih roh duah, bac magru ilamu urang gru di drei.

Nai gru Nương khan brei thaulac: Ilamu bangsa Cam pachreih urang jirah atah jaik kayua hu ralo janih kadha krei karei di nyu, kayua yau nan ye dalam dah krah ilamu piah pato huruh akhar Cam nai gru khin caong brei ka anek saih ilamu rak ring janih gah huruh akhar ilamu bangsa di drei. Pato glo akaok khik ramik ilamu bangsa tui tapa raidiuk harei harei di dom adei. Pagam pambuak saong baoh sang anek saih ramik caga ilamu bangsa, pambuak pagam tui pato padar ilamu bhum palei. Meng di nan anek saih hu bruk ngak njauk, hu thau cara jalan khik caga ramik ilamu bangsa:

“Dalam luac jalan pato megru sap Cam…”

Dang di kakai Phaok Akaok Sang bac Tieu hoc Phan Hiệp, nai gru Nương hu gam saong Ban Iek glang sang bac tuk halei jeng pahadah krah bahrau, ba rup nao dahlau, jaik taphia adei sa-ai sahabat ayut cuai bac pato, pato tacei pandar ralo cara bahrau dalam pato magru piah patagok yaom kaom pato magru.

Nai gru tuk halei jeng pangik tangi pang dom baoh panuac pathau padar ndom mayai biai yah pato kakei di adei sa-ai gru, jeng ye brei javap chalei layah truh gah hadah krah cambaic laic lagaih.  Nai Lâm Thị Hải Lý, urang pato di sang bac Tieu hoc Phan Hiệp, xa Bắc Bình, tinh Lam Dong taong yaom lac:

“Di dalam bruk ngak pato magru, nai gru Nuong tuk halei jeng kham marat, jiak taphia, gheih ghang anit ranam daong ba adei sa-ai dalam bac pato jeng ye di dalam rai diuk, dalam nan hu lac di dalam bac magru sap bangsa Cam. Njauk ndom mayai lac, nai gru Nuong ieu lac sa urang pan bruk siam, khin sahneng khin ngak, hu ralo adei saai urang pato magru jeng ye anek saih di ini anit ranam.”

Gam tui hatai kham marat oh padeih di drei, nai gru Văn Thị Kim Nương njauk yau baoh kreih camin hadah brei ka gah pato magru bhum palei jeng ye hu angan njauk brei ka urang bangsa Cam tinh Lam Dong mboh hadah mbaok mata./.