Ong Nguyễn Hồng Dân, angan bhian ieu lac Ba Dân, umo 55 thun, daok di  quận Bình Thủy, ban Cần Thơ. Yaom lac takai jaoh min oh kuhria pandiak atau hajan, harei harei ong nao ngak pasiam dom labik jalan mbaih mbaoh bo ong hu mboh di mangaok jalan.

Ong Ba Dân khan lac, dahlau daih dua diuk pasang nao Bình Dương pablei vé số. Dalam tuk nao pablei, ong rilo mbang hu mboh urang labuh radaih kayua jalan mbaih mbaoh. Meng nan, jien laba pablei vé số labaih hu, ong nao blei pandap piah pasiam dom mbaih mbaoh mangaok jalan. Hadei ini, kayua raidiuk kan kandah, nan ye sang ong mai Cần Thơ daok.

 Ong hu 3 urang anek ye abih 3 urang jeng nao ngak mbang pah duah jien diukrai tapa harei. Yaom lac yau nan, min abih gauk dalam sang tuk halei jeng pachreih gauk ngak bruk pahla daong ka urang. Thun 2021, diuk di ong metai kayua Covid-19. Meng nan, ong Ba Dân caik hatai jang ka bruk pasiam jalan ngak pahla. 

 "Oh kanal abih lac hadom labik, meng jalan Nông trường Sông Hậu mai trun An Thới tame tal 91B, tapa Thới An Đông, meda lac labik halei jeng hu plak tangin di dahlak ngak abih".

Di mangaok radaih ngak eng, ong Ba Dân nao grauk dom jalan dalam ban Cần Thơ duah labik mbaih mbaoh piah ngak pasiam. Dom thun dahlau, ong nao likau “nhựa đường” pacah tabiak blaoh ba mai sang, mek kapac jan ka nyu sit tabiak piah ngak nguyên liệu pasiam jalan. Urak ini, ong ngak hu mac đầm nhựa, lagaih pandar saong ngak hu rilo jang, abih dom pluh triệu đồng. Meng hu sruh mac bo ong Ba Dân oh daok jan yaok candaih nhựa yau dahlau daih. 

 Thau hu bruk ngak siam mekre nan, rilo menuac nao jalan hu daong ka ong piah ong hu jien blei pandap ngak. Sa-ai Nguyễn Kim Dung, daok di phường Trà Nóc, quận Bình Thủy lac: "Drei ginup tangin takai bo oh ngak hu bruk siam yau cei, cei jaoh jo min ngak hu bruk nan ye drei daong. Mboh cai ngak bruk siam thei jeng anit, cei duah jien patak pataom yaok harei 20 rabau, atau 50 rabau, blei xi măng piah ngak".

Thun 2021, ong Nguyễn Hồng Dân hu taduan Harak meyaom di Akaok Mintri jalan mbak pajeng ba ka bruk ngak dalam bruk pakacah khik kajap siam mekre salamat bruk nao mai mangaok jalan vaktu 2016-2020. Ong Mai Minh Ngoan, Chánh văn phòng mBan salamat jalan mbak ban Cần Thơ brei thau: "Ini lac sa bruk ngak biak siam, njauk pambak praong saong taduan hu bruk pachreih tui di dom kapul nyaom, menuac urang piah jak ba bhap bini hu mbaok tame, rik daong".   

Di mangaok radaih ngak eng, ong Ba Dân tuk halei jeng bui sambai, chreih chrai. Urak ini, ong tok caong hu ginup prein yava piah nao duah, piah pasiam veik dom mbaih mbaoh mangaok jalan, piah oh daok rah tabiak dom bala pandik harao./.