Umo bahrau 35 thun, Đặng Dương Minh Hoàng hu ngak po Nông trại Thiên Nông praong labaih 50ha di huyện Bù Gia Mập, tỉnh Bình Phước, dalam nan hu 12ha pala bơ Mã Dưỡng (lac janih baoh angan je di Bình Phước), daok veik lac cao su saong amaraik kalu. Meng năng suất 100 tấn sa thun, yaom pablei meng 70.000-90.000 đồng/kg, yaok thun bein bơ ba mai ka Hoàng jien mek tame labaih 6 tỷ đồng hadei di tuk kaoh abih phun jien buh tame.

Baoh bơ Mã Dưỡng di Nông trại Thiên Nông oh lac hu pablei di darak pasa dalam taneh ia bo daok hu pablei tapa Lào, Campuchia, Đài Loan, Trung Quốc, Nhật Bản. Urak ini, Hoàng daok pambuak bruk, peih praong darak pasa tapa châu Âu.

Ndem ka jalan ba baoh bơ Việt tapa dom taneh ia, mek hu hatai takre di dom darak pasar kan tame, Hoàng brei thau lac, bein bơ di sang hu pandar công nghệ Blockchain piah duah thau hu asal di nyu. Mangaok dom sàn giao dịch điện tử, urang blei tok quét mã QR meda thau hu labik bein, jalan pala bơ, janih khak drak, harei paik baoh saong harei kakei blei. “Mayah ngak nong hữu cơ bo oh thau jalan ngak nong số, atau ka oh thau jalan ngak nong so ye kol drei lahik nao jalan lagaih pambuak haong urang blei. Bruk pambuak ngak nong so saong ngak nong hữu cơ hu daong ka urang blei pasang iek hu meng atah, cambaih laih bruk ngak, jalan pala drak, praong tagok di phun, khik caga angan je, dak padang angan je”

Tuk ngak nong, Hoàng pandar abih công nghệ, salih ka prein manuac ngak. Taong abih  labik dalam bein hu caik hệ thống cảm biến, pambuak haong bruk pruh ia sit sit saong pruh khak tự động hu ramik caik tal yaok gha phun bơ. Urak ini, hu biak rilo rahra di Bình Phước gam hu mbaok tame peih praong mblang taneh pala bơ Mã Dưỡng tagok labaih 200ha. Hoàng sahaneng lac, dalam bruk ngak nong “caong nao atah ye brei nao haong gauk” nan ye saai tuk halei jeng caong klah rabha jalan ngak ka yaok urang.   

Piah ka bruk ngak hu siam lagaih, Hoàng hu padang tabiak app AutoAgri. Yaom bruk sangka iek glang kaya nong hu ba tame app ini. Nan ye chất lượng kaya nong oh hu bruk glaong bier jang gauk, meng nan bruk pablei tabiak darak pasa hu mbuan lagaih jang. Urak ini saai Hoàng daok klah raba oh mek jien app AutoAgri tal 1.500 baoh sang urang nong dalam tỉnh. Tal urak ini, rilo sang bein daok ngak tui jalan di Hoàng saong tuk camereip mboh hu dom jak jeng.

Ong Trần Quốc Duy, Yam ndok Pasak pachreih bruk đau tư, pablei salih saong du lịch tỉnh Bình Phước brei thau lac, bein pala bơ di Hoàng hu daong, tacei pato ilamo ka dam dara puk palei peih bruk ngak mbang, duah jien: “Tal urak ini, kol dahlak daok pambuak tabiak dom asal kadha anit ranam tal rai ranaih, daong ka urang nong dalam bhum, gam rik prein ka hệ sinh thái salih bahrau meng dom jalan ngak cambaih laih. Pagap yau bruk pambuak haong dom urang ilamo pato gilac veik dom jalan sahaneng, atau ba brei ilamo công nghệ. Meng nan ngak habar piah ka bruk ngak nong di Bình Phước hu cak rok patagok saong ndung bak thaot binguk kaya nong Việt tal dom taneh ia di mangaok dunya saong dalam bhum”

Urak ini, Hoàng daok lac Chu nhiem mạng lưới Lương Định Của dalam taneh ia. Meng bruk ngak ini, Hoàng bhian gam haong dom "kreih camin Lương Định Của" pambuak gauk, daong ka dam dara palei pala peih bruk ngak mbang duah jien tui jalan công nghệ 4.0, daong ba kaya nong Việt Nam nao atah./.