Akaok bilan 9, dalam baoh sang praong siam, ong Nguyễn Văn Hòa, umo 58 thun, sa urang dalam kapul rik phun jien palei Đuôi Tôm brei thau, tuk daok sit sang kan kandah, oh hu taneh oh hu sang. Rilo thun kham merat ngak mbang, patak pataom, ong jeng oh ka padang hu sa baoh sang siam mekre. Nan ye tuk hu jak ba tame kapul rik phun jien, ong pachreih tui chip. Ong Hòa khan lac: "Tuk nan kapul bahrau hu 10 urang, rik 5 triệu đồng sa bilan padai".

Tuk camereip, ong Hòa mek jien payeng pavil piah ngak mbang, blei taneh, oh sahneng tal bruk padang ngak sang praong, siam. Atah di ini 3 thun, ong khang hatai padang ngak sang bahrau tuk sang klak jaik jaleih, hu dom urang dalam kapul njauk hatai pabak brei phun jien dahlau oh cang bốc thăm.

Tui nan, hadei di bilan padai, 16 urang dalam kapul rik jien palei Đuôi Tôm pilih sa harei pataom gauk. Dahlau di abih, urang ba gauk rik jien tame kapul, hadei di nan ginum biai pilih ruah urang patui di nan, meyah oh hu urang halei kan kandah di abih, ye brei bốc thăm. Salah bruk, sang bahrau hu  daong phun jien ngak sa talam salao lisei da-a dom urang dalam kapul.

Bruk padang kapul rik jien hu tabiak meng xã Tân Hộ Cơ, huyện Tân Hồng, atah di ini 27 thun. Tuk nan raidiuk urang nong daok kan kandah, piah padang ngak sang khang kajap, bhian nao nyim sraiy biak glaih glar. Meng hatai sahneng di urang dahlau daih pan akaok xã, rilo kapul rik phun jien hu padang tagok meng bruk dom urang dalam kapul ba gauk rik tame sa pok jien yau gauk, hadei di nan peih bruk bốc thăm, pilih ruah sang taduan mek jien, hu karja "đỡ đầu". Karei jang me-ini hụi, jien ngak sang oh kuhria laba bo makna lac piah daong gauk, bruk rik jien hu kuhria tui bilan padai.

Jeng bhian hu mbaok tame kapul rik jien, ong Nguyễn Tri Phương, umo 53 thun, oh lac padang ngak sang ka drei bo daok ngak gam ka 2 urang anek likei. Dahlau daih lac gru pato bac, min ong klaak meteh dhi piah ngak hamu, gam la-ua taneh mbang pah kayua jien bilan oh ginup mbang cai. Jaik 20 thun dahlau, ong padang sang, hu daong 50 triệu đồng.

Abih sa mbang payeng pavil 16 urang, ong hu mbaok tame mbang ka 2, padang sang ka 2 urang anek likei di thun 2017 saong thun 2022. Tuk ini, yaom  jien rik tame jeng tagok 10 triệu đồng sa mbang. Mboh siam lagaih, dalam tuk pandap panda tagok yaom, oh ginup piah blei pandap ngak mekre dalam sang, urang ba gauk rik jien payeng pavil piah ngak paga, blei pandap.

Thun blaoh, ong Phương bốc hu thăm padang sang 150 triệu. Adei sa-ai dalam kapul brei daong gam jien ngak paga 60 triệu, daong ka baoh sang hu mekre jang.

Tok kuhria ta-eng xã Tân Hộ Cơ, 27 thun tapa hu 14 kapul rik jien hu padang tagok haong 85 urang, abih tih yaom jien payeng pavil lac labaih 15 tỷ đồng, ngak hu 127 baoh sang khang kajap. Bruk ini hadei di nan pambak praong tabiak rilo labik dalam tỉnh Đồng Tháp.

Ong Nguyễn Minh Ngọc, Bí thư huyện Tân Hồng, tỉnh Đồng Tháp khan lac, bruk rik jien di urang nong ndung bak bruk anit ranam gauk, daong gauk ngak pasiam sang taik tahak, tani tanat raidiuk di palei pala. Bruk ini jeng daong ngak hu tiêu chí sang daok tui danak dak bruk ngak negar ka padang ngak palei pala bahrau. Gam haong nan, ngak jeng talei rohim jum pataom gauk dalam bhap bini, dui pachreih hu rilo rahra di palei pala pataom mbaok tame”./.