Ngak po 60 ha taneh pala pajaih manaih Queen pambuak pagam haong raong ikan, urak ini sang ong Sáu yaok thun laba hu labaih 3,7 tỷ đồng. Ong Nguyễn Văn Sáu khan lac, urang nong Phước Bình hu jien mek tame meng bruk ngak nong. Dahlau diah, sang ong hu 10 ha taneh ngak 2 vụ padai sa thun. Kayua taneh njaom lakhun, phun padai bhian tamuh suai, năng suất biar, laba hu oh hadom.

Saneng duah jalan ngak bahrau, meng bruk tacei pato, daong ba di kapul urang nong, Balai Pachreih nong ban sit Trảng Bàng, thun 2017, ong Sáu khang hatai ba 10 ha taneh ngak padai tapa pala manaih. Mboh hu jalan cak rok patagok di ong, dom pakat karja, kapul urang nong, gah ngak nong saong patagok palei pala tỉnh Tây Ninh hu daong palaghaih ka ong Sáu nao rivang iek dom bruk ngak, bac megru ilamu, ngak ar pacang aia sua. Meng hu yau nan, hamu manaih di sang ong Sáu dak harei dak tamuh siam, brei baoh yamen, mek tame hu labaih 100 triệu đồng/ha dalam thun akaok mereip.

Mboh hu kein laba, ong Sáu gam haong sang di drei buh jien tame ngak, blei 20 ha taneh saong pah 30 ha di dom baoh sang jaik taphia piah pala manaih. Ong pandar aia pruh hu mek tapak meng kraong, dalam bilan aia ndik pambuak haong bruk dui pachreih ikan dalam kraong nduac tame hamu manaih, ngak jeng bruk raong – pala, mek hu kein laba glaong. Dalam tukvak pala, ong tuk halei jeng ngak tui jalan VietGap, khik siam ka môi trường, pren yava urang ngak saong urang blei mbang.

Patagok bruk pala manaih pambuak haong raong ikan, bahrau ini lac hu ngak sang raong yến, pala ndiuk, ong Sáu oh lac tok paglaong jien mek tame ka sang drei, bo daok ba bruk ngak brei ka jaik 40 urang ngak gam gam saong rilo urang ngak tui bilan di puk palei. Sahneng dalam hatai rilo jalan ngak bahrau dalam cak rok patagok bruk ngak mbang pala drak, urang nong ngak ka taneh phèn brei baoh yamen ini brei thau: "Ngak nong biak mbuan gaok khat lahik. Dahlau diah thei jeng lac dahlak liều min dahlak liều “hu cơ sở”, nan lac drei brei thau cambaih ka darak pasar, thau cambaih ka asal di phun pala, langik tasik, taneh riya nyu yau habar nan ka meng jak jeng hu."

Tui bruk urang nong ba tangin tame padang ngak palei pala bahrau, ong Sáu daok hu ramik pasiam, ngak 8km jalan palei, daong brei taneh saong sang daok ka jaik 11 baoh sang, rik daong danak dak “Truac hadah jalan palei”, rik daong ka bruk ba điện mai ka 20 baoh sang urang nong di bhum atah bayah dalam xã. Langiu di nan, ong daok hu daong 50 urang nong phun jien piah ngak mbang pablei salih, tacei pato, pandar ilamu tame dalam bruk ngak mbang pala drak.

Dom kareih camin urang nong ngak mbang pablei salih naih jioy saong abih hatai hu mbaok tame dom bruk ngak daong ka bhap bani, jak gauk padang ngak palei pala bahrau yau ong Nguyễn Văn Sáu daok rik daong tame bruk dak padang palei pala Tây Ninh jeng dom puk palei dak harei dak kaya meda, gheih mekre./.

Urang lang: Jasi