Ong Nguyễn Anh Dũng kham merat roh duah saong ngak hu rilo janih pajaih padai siam

Lac anek di baoh sang urang ngak nong, thun 2000, hadei di tuk xuất ngũ mai palei, ong Dũng patui bruk pala padai mangaok 6.500 m2 taneh di amaik ame caik veik. Min kayua ngak padai tui jalan meng kan nan ye kein laba takik. Meng ini, ong bac megru ayut sahabat, bac megru gauk gar bloh likau tame tal pato pasram jalan pala padai, pacang caga halak halin ruak kik kayua Viện Padai bhum taneran kraong CL haong Sang bac ĐH Cần Thơ peih tabiak.

Meng ilamu bac megru hu, ong Dũng khang hatai brei klaak meneing jalan pala ngak meng kan, salih tapa jalan nao bahrau. Hu sa mbang, ong mboh sa pajaih padai sambo bhong meriah, brah nyuak, pahe yau hala dứa nan ye ba mai pala iek. Ini lac janih padai hu asar atah, tukvak tamuh meng 90 - 95 harei, phun glaong, hu prein pacang rầy nâu saong đạo ôn biak siam, oh cang buh rilo khak min mek hu năng suất glaong, meng 6 - 7 tấn/ha. Pajaih padai ini hu taong yaom lac hu rilo dinh dưỡng dalam brah saong hu ong Dũng caik angan lac “Ngọc đỏ hương dứa”.

Piah hu brah siam ka prein yava pablei ka urang blei mbang, dalam tuk pala, ong Dũng tok pandar khak vi sinh, oh pandar jru khik caga phun pala. Mala hamu, ong daok brei palao raong dom janih ikan. Dalam 3 thun pala ngak, pablei salih padai brah, ong laba hu jaik 2 tỉ đồng, ba bruk ngak gam gam ka 12 urang ngak saong tacei pato, daong ka 24 urang. Ong daok hu tacei pato, brei thau ilamu pala - ngak yaok thun ka yaok ratuh urang ngak nong.

Tal urak ini, ong Dũng ngak hu 7 pajaih padai daok hu darak pasar takre, yau ye LD2012, Ngọc đỏ hương dứa, Tím sen, 384, Huyền ngọc Định An, Nhũ hồng, LD2012-1. Bahrau ini, Ngọc đỏ hương dứa hu pablei yaom tal 7.500 đồng sa kg padai that, ba mai kein laba glaong ka mikva urang ngak nong di Lấp Vò saong hu Cty Hồng Tân mbaoh tangin pambuak bruk blei veik abih dalam 5 thun, kuhria meng thun 2018.

Thun 2012, gam haong dom urang nong padang HTX ngak nong Định An, ong hu pok ngak Yam ndok. Urak ini, dom janih pajaih padai hu ong ngak tabiak yaok thun pablei tabiak darak pasar jaik sa rituh tấn.

Jaik 20 thun ngak hamu, ong hu Viện roh duah padai Dunya IRRI pok brei angan lac "urang nong khik ramik đa dạng sinh học janih padai bhum taneran kraong Cửu Long". Dom bruk pakacah urang nong pala padai naih joi bhum palei miền Tây, ngak padai thông minh, lagaih haong biến đổi khí hậu, ong jeng mek hu giải nhất; hu pok brei angan lac "urang ilamu di urang ngak nong" atah di ini 2 thun. Ong daok hu Kapul urang ngak nong pakat negar pok angan lac urang nong naih gheih di abih dalam thun./.

Lang sap: Mousa Phương – 16/05