Dalam baoh sang praong, siam daok di mbaok jalan Roya 1A, ong Chamaléa Ninh khan brei thau ka jalan tabiak truh kan kathaot, yam tagok ngak kaya meda di sang drei. Thun 1988, ong khin kumei, ong tok diuk. Yau rilo diuk pasang daok ranaih bangsa Raglai dalam bhum, diuk pasang ong jah puh pala tangei. Thun 1992, karja palei jak ba dom sang urang Raglai peih taneh bilau ngak hamu ia. Tuk camereip, bhum ini daok joa lange. Hadei di dom bilan kham merat, dua diuk pasang tacaoh, li-ua, mek limo kubao dui dom gha phun praong piah ngak pasamu mbaok taneh hu 1 ha meteh hamu piah pala dom janih tangei, ratak.

Tuk hu ia meng binek Sông Trâu ba mai, ong Chamaléa Ninh salih tapa ngak padai 3 vụ yaok thun. Ong bac megru paglaong ilamu saong pala sa janih padai ia haong pajaih bahrau mek hu meng 6-7 tạ/sào. Gam haong nan, daok hu pala phun njam patam, ngak var ro raong pabui jhuk, menuk palao bein, raong lamo, mek pandap klaak meng bruk ngak nong piah ngak pandap mbang raong glang.

Thun 2015 - 2016 di palei rah tabiak bhang pandiak, thu lagu, ong pah jamriak kuac bingun piah hu ia pruh, ngak hệ thống máy bơm piah duh ka bruk raong glang saong pala drak, pandar ilamu pruh ia patak pataom daong ka phun pala hijao siam di kreh bilan pandiak. Rilo sang dalam bhum bac megru ilamu saong ngak tui. Meng kham merat ngak mbang, tok dalam dom thun, ong Chamaléa Ninh hu jaik 3 ha taneh pala drak. Tuk halei jeng sahneng duah piah ka raidiuk hu glaong jang, ong Chamaléa Ninh daok brei ngak điện ia harei di tabung sang.

Meng dua plak tangin saoh, tal urak ini, ong Chamaléa Ninh hu jien mek tame tani tanat. Yaok thun, ong pablei tabiak 200 drei manuk ralow, labaih 100 drei pabui ralow, pablei dom janih njam patam, baoh kayau, padai, mbang pah chai padai... mek jien tame hu labaih 250 triệu đồng sa thun. Ong padang hu baoh sang praong, siam, blei hu ginup pandap pandar dalam sang, jeng sa dalam dom sang kaya meda abih dalam bhum bhap bini Raglai di xã Lợi Hải.

Oh lac ngak kaya meda ka sang drei, ong Chamaléa Ninh daok abih drei ka bruk ngak pahla, daong ka mikva, lac urang hu angan je dalam palei. Ong urak ini lac Akaok mban Ngak bruk Mặt trận palei Kiền Kiền 2, gam lac Phaok akaok Dhar kapul bruk raong pabui Thuận Bắc tui chuỗi giá trị xã Lợi Hải. Ong bhian tacei pato ilamu pala drak, raong glang, jak ba urang nong hu mbaok tame dom bruk salih phun pala, janih raong, pandar ilamu kỹ thuật bahrau, daong phun jien piah daong ka rilo sang patagok bruk raong glang, pala drak, piah ba gauk yam tagok tabiak truh kan kathaot.

Ong Nguyễn Hữu Hợp, Akaok kapul urang ngak nong xã Lợi Hải brei thau, ong Chamaléa Ninh lac kreih camin hadah yam tapa kan kandah, yam tagok dalam cakrok bruk ngak mbang di sang, ngak kaya meda piah ka dom urang karei dalam palei bac megru saong ngak tui. Tapa nan, daong jhul khang bruk urang nong pakacah gauk patagok bruk ngak mbang, kinh tế, padang ngak palei pala bahrau.

Meng dom jak jeng dalam bruk ngak saong rik daong patagok KTXH di palei, ong Chamaléa Ninh hu UBND tỉnh pok brei Harak meyaom kayua ngak hu rilo bruk praong dalam bruk pakacah urang nong Ninh Thuận jum pataom daong gauk ngak mbang, pablei salih naih joi, ngak kaya meda saong patrun kathaot khang kajap tukvak 2016 - 2020; UBND tỉnh brei Harak meyaom urang nong naih gheih dalam bruk pakacah gauk anit ranam taneh ia. Kapuk urang nong alin harak meyaom "Urang nong ngak mbang, pablei salih naih joi" thun 2022./.