Ong padang ngak tatua ka bhap bini nao mai mbuan lagaih 

Dalam langik pandiak bhang di bhum kreh negar dom harei kreh bilan 7, mangaok dom canah jalan di dom bhum palei kan kathaot di tỉnh Quảng Nam, rilo menuac bhian mboh thaot binguk ong taha umo labaih 70 thun haong sruh radaih juak  nao pasang iek, palih labik padang tatua ka bhap bini. Ong lac  Nguyễn Đình Phùng,  thương binh 2/4, haong tangin hanuak njauk thương tật, biak kan piah megei nao mao. Tuk mboh hu labik padang tatua, ong thaot veik, payua ka anek likei  piah ginum bruk thiết kế, padang ngak. Ong Nguyễn Đình Phùng brei thau, bui sambai prong abih lac, dom mbaik tatua hu ba tame pandar, dong ka bruk nao mai di bhap bini mbuan lagaih, mbaok meta palei pala hadah hadai.

“Yaok thun, sang hulin kham merat padang hu takik di abih 4 mbaik tatua. Dahlau di tuk tame Đảng, drei sanya kham merat tal abih umo, urak ini yaom lac taha ye song dalam rup hu rilo thương tật, min kham merat yam tapa. Dahlak hu sinya song dom anek di dahlak, dom ayut sahabat di drei lac, tuk halei dok pren yava, dok jien ndua, drap ar, ye daok ngak tatua brei ka bhap bini”

Tui nan, labaih 5 thun tapa, boh sang thương binh Nguyễn Đình Phùng eng drei joa kandang buh jien tabiak padang jiak  30 mbaik tatua dân sinh. Jiak di abih lac, mbaik tatua  Phùng Hiệp 28, daok di xã Tam Phú, ban Tam Kỳ, ba tame pandar njauk di tuk pahadar 132 thun, harei menek Wa Hồ. Muk Dương Thị Nhân haong bhap bini khu phố Ngọc Nam, phường An Phú, bui sambai tuk bilan hajan thun  ni, nao mai mbuan lagaih jang:

“Dahlau deih oh hu tatua ni, nao mai biak kan kandah, tuk ia nduac khang ye nao mai oh hu. Urak ni, hu tatua ye, hulin nao mai biak mbuan, biak bingi.”

Langiu di bruk buh jien kadung tabiak padang tatua dong ka bhap bini, meng thun 2014 tal ni, ong Nguyễn Đình Phùng dok hu mbaok tame rilo bruk xã hội, dong ka rilo menuac kan kandah di palei. Ong Nguyễn Quang Vinh, akaok palei  Ngọc Mỹ, xã Tam Phú, ban  Tam Kỳ brei thau, karja song bhap bini biak iek prong hatung hatai  di ong Nguyễn Đình Phùng:

“Tuk camereip cei Phùng khin buh jien tabiak ngak tatua di pak ni, dahlak tangi sua cei  likau jien di dom doanh nghiệp halei, ye cei lac sang cei buh jien tabiak ngak. Dahlak biak drut droi anak hatung hatai siam mekre di sa urang lin wa Hồ, umo taha ye min daok kham merat ieu jeing, eng drei pasang iek chất lượng, piah khik  ka bruk nao mai di bhap bini.”

Muk Huỳnh Thị Thu, duik di thương binh Nguyễn Đình Phùng brei thau, 2 duik pasang  yam tapa bloh oh thau hadom kan kandah dalam thun bilan mesruh metak catang, nan ye tuk halei jeng iek prong yaom glaong di hòa bình song thau dar phol dom urang ndih trun ka taneh ia. Muk  Thu ndom lac, duik pasang muk, yaok bilan hu labaih  15 triệu đồng jien lương hưu, min kham patak pataom, piah gam song dom anek ngak tatua ka bhap bini:

“Pasang dahlak dak harei dak prong thun, pren yava oh daok khang, nan ye, yaok mbang nao pasang iek padang tatua lac , hulin suh sah lo, hu tuk ong ginuh tame radaih. Hulin huac lo min  sahneng lac kayua bruk kein laba ka rahra, nan ye, tuk  ngak salah bloh boh tatua lac sang dahlak biak bui sambai.”

Tuk umo bahrau 19 thun, ong Nguyễn Đình Phùng pal phao nao mesruh pacang Mỹ, tuk mblang mesruh Quảng Nam dok dalam tukvak biak jhak. Luai ngak lin di thun 1977 haong mangaok rup hu rilo thương tật, ong Phùng ngak bruk di Tòa án bhap bini ban Tam Kỳ Meng tuk padeih hưu mbiah tal ni, ong daok hu mbaok tame ngak di Chi bộ khối phố song Kapul urang dahlau deih ngak bol lin  phường An Xuân, ban  Tam Kỳ. Ong Đỗ Văn Thương, Akaok kapul urang dahlau deih ngak bol lin phường An Xuân, pok meyaom bruk abih drei ka bruk ngak, abih drei ka bruk di đồng đội:

“Ong  Phùng ngak hagait jeng tabiak meng hatung hatai di drei, ngak dalam joa kandang, oh khin hei thau, meng dahlau mai tal harei ini, tuk halei jeng yau nan.”

Umo jiak 80 thun, pren yava oh daok yau dahlau, min thương binh Nguyễn Đình Phùng dok caik dalam hatai dom sahneng kuhria ngak tatua ka bhap bini di dom bhum palei kan kathaot xứ Quảng. Ong Phùng uan tabuan tuk bahrau tal kreh bilan 7, min hu ngak salah bruk batabiak dalam thun ni, lac padang 4 mbaik tatua. Hu 28 boh tatua kayua  ong Phùng padang hu angan meng  Phùng Hiệp 1 tal Phùng Hiệp 28. Langyah ka angan Phùng Hiệp, ong Nguyễn Đình Phùng brei thau, Phùng lac angan di ong , dok Hiệp lac angan di sa ayut sahabat palang lahik bloh, jeng lac urang camereip rik pataom jien hong ong padang ngak tatua. Ong Phùng daok caik dalam hatai lac, daok rik dong pren yava sit sot di sa urang lin Wa  Hồ ka bruk patagok di puk paga, palei negar./.

Urang lang: Hanipha -25/7