Ong Nguyễn Văn Mum dang gah iu dalam thaot ini

Khaol dahlak nao tal puk Đắc Lực piah duah thau ka bruk cak rok patagok kinh tế meng bruk ngak nong di ong Nguyễn Văn Mum, urang dahlau diah ngak bol lin. Meng sap ndom puac bingi pang, ong Mum chreih chrai ba khaol dahlak nao rivang bein panat prong yaok ribau phun. Bahrau pala jaik 2 thun bo bein panat daok hu paik baoh.  Tui ong ini lac phun pala hu rilo kein laba.

Vụ akaok mereip duah hu labaih 100 triệu. Vụ akaok mereip jeng oh ka hu rilo. Meyah pandar ilamu kỹ thuật meda mek hu rilo baoh siam mekre jang, daok meyah oh ngak yau nan, hu rilo baoh min oh siam, nan ye njauk pandar ilamu kỹ thuật tame baoh meng siam jang.

Hu thau, ong Nguyễn Văn Mum nao ngak cách mạng dom thun 1970, hadei di tuk taneh aia peih paha, ong mai veik palei padang mbang angui saong cak rok patagok bruk ngak mbang kinh tế meng nan mai. Ong hu mikva taong yaom lac urang dahlau diah ngak bol lin tari tareng, takre bac megru saong khang hatai pandar dom kadha bahrau tame dalam bruk ngak mbang.

Atah di bein panat oh hadom lac van raong limo labaih pluh drei. Van hu padang ngak biak laneng lanoi saong hacih sa-at. Ong Mum pambuak haong bruk raong limo hu labaih pluh thun ini mai, tukvak tapol limo rilo di abih jeng tagok tal labaih dua pluh drei. Kayua palih ruah raong limo menek nan ye kein laba jeng hu khang kajap. Yaok thun ong pablei dom drei jeng hu jien mek tame meng dom pluh triệu tal 100 triệu đồng.

Piah ka bruk raong limo mek hu kein laba, ong Mum pala hareik saong blei mac kacaoh hareik, nan ye tapol limo di ong tuk halei jeng lamek trak. Langiu di nan, ong daok buh jien tame ngak lubang bio-gas saong ủ khak limo piah ngak khak hữu cơ, meng nan bo khak limo hu khik iek siam. Khak hữu cơ hu pandar piah buh ka bein panat daong patrun jien blei khak.   

Langiu di bruk pala panat haong raong limo, ong Mum daok hu jien mek tame meng danao raong ikan saong ngak hamu. Tapa ilamu ngak padai, gam haong duah thau ka darak pasar, dom thun jaik di ini, ong Mum palih ruah ngak pajaih  chất lượng glaong yau OM, ST, brei jien mek tame glaong jang. Jaik 3 ha taneh ngak padai di  ong hu tame hợp tác xã, tổ pambuak bruk, atau mboh tangin sanya blei abih kaya nong ngak hu… nan ye oh daok duh hatai ka labik pablei tabiak. Bilan Hè Thu meng blaoh, yaom lac gaok kan kandah di jit ruak Covid-19, min padai di ong jeng pablei hu saong hu laba. Ong Lê Quốc Nghị, akaok Kapul urang dahlau diah ngak bol lin xã Hồ Đắc Kiện, huyện Châu Thành brei thau: “Oh lac ngak mbang kinh tế naih jioy, ong Hai Mum daok lac menuac siam hatai,  adei sa-ai, ayut sahabat mboh jalan ngak mbang di ong hu kein laba nan ye mai bac megru, ong abih hatai tacei pato. Oh ta-eng hagait ong Mum bo dom hội viên karei jeng yau nan. Dom hội viên daok klah rabha tal bhap bani piah ba gauk tame bac megru cak rok patagok kinh tế baoh sang”.

Meng jalan ngak mbang pataom rilo janih, daong ka urang dahlau diah ngak bol lin Nguyễn Văn Mum yam tagok ngak kaya meda. Ong Mum daok abih hatai tacei pato ilamu kỹ thuật, jak ba mikva, gam haong hội viên urang dahlau diah ngak bol lin di palei kham merat cak rok patagok bruk ngak mbang pala drak, ba gauk tapa truh kan kathaot yam tagok ngak kaya meda./.

Urang lang: JASI - 25/10/2021