Hop tac xa (HTX) Ngak nong Láng Lớn, xa Láng Lớn, huyen Châu Đức ba tame pandar meng puac thun 2023, urak ini hu 7 urang jakar xa pala phun mbe di 40 ha taneh. Ong Phùng Văn Hoà, Yam ndok HTX Ngak nong Láng Lớn brei thau, bruk ruah phun mbe ngak phun pala rilo dalam bhum kayua phun brei baoh rilo, pablei tabiak hu tani tanat. Bilan 1 thun 2025, HTX hu daong jamraik par pruh jru pacang khik ka phun duh ka bruk pala mbe hadah krah. Tui ong Hoà, meng tuk pandar jamraik pruh jru tame pala phun salih ka bruk pruh jru meng tangin, jien buh tame ngak hu patrun rilo, taki halak haling palai pajua, baoh dak harei dak praong siam, pabak hu hatai caong di darak pasar:

 “ Urak ini dom rahra pruh jru meng tangin, meng tuk salih tapa pruh meng jamraik ye ia jru pruh tok daok 1 phuy, jru ye trun 50%. Karei di meng dahlau pruh meng tangin lahik tal 2 mon/ha, urak ini daok 40 minit. Pandar ahaok par meda pruh hu 20 ha/harei, bruk pruh ia hu praong, bruk pametai halak haling hu samar drah jang, siam lagaih jang biak rilo”

 11 baoh sang ngak sara di huyen Long Đất jeng bahrau hu daong labaih 20 ribau m2 tamra katak saong jamraik njuk ia piah duh ka bruk ngak saralang tamra haong jien buh tabiak labaih 800 trieu dong. Bruk ini hu daong ka dom baoh sang ngak sara, kein lagaih jang, daong ngak hu rilo sara. Ong Nguyễn Văn Gia, urang ngak sara daok di xa Tam An, brei thau:

“ Asar siam di sara lang tamra saong sara haluk yau gauk, min sara ngak tui jalan meng kal ye meng harei jeng asar sara tal harei kua kuac lac 14-15 harei, daok sara lang tamra labaih 10 harei lac kua kuac hu paje. Makna lac kayua ia hu ba tame danao rilo, khik hu 10 harei meng thu kaoh, ngak jeng asar sara. Langik pandiak thu njak, sara lang tamra meda hu kua kuac samar drah jang meng 5-7 harei”.

Piah brei kein lagaih ka urang ngak nong hu pandar dom jamraik, bruk salih bahrau dalam bruk ngak mbang, meng thun 2024, tinh Ba Ria Vung Tau hu daong ngak 10 bruk ngak meng jamraik dalam bruk ngak nong saong pandar ilamo kong nghe hadei tuk yuak kuak haong abih tih jien buh tabiak jaik 7,4 ty dong. Tal ini, tinh hu labaih 400 janih jamraik duh ka bruk ngak nong haong labiah 120 ribau sruh.

Dom bruk ini hu daong patagok bruk ngak nong tui jalan ilamo kong nghe glaong, patagok karo kajap. Gam haong nan pakaro kajap pamaong tal bruk ngak tabiak ndap nda, ngak jak jeng jalan pamedeih bruk pasiam gah ngak nong pagam haong padang palei pala bahrau karo kajap.

Ong Vũ Ngọc Đăng, Phaok Chánh Jabat ngak bruk Palei pala bahrau tinh Ba Ria – Vung Tau brei thau, bruk hu pandar jamraik dalam bruk ngak mbang daong patagok bruk pambuak ngak mbang, paglaong yaom kaom, asar siam ka ndap nda, ngak tabiak ndap nda pablei tabiak siam glaong, paglaong yaom kaom ka ndap nda dalam darak pasar, ngak tabiak bruk ngak siam lagaih ka rahra…

“ Pandar jamraik dalam bruk ngak nong lac jalan patagok bruk ngak nong di Trung uong, ngan haong tinh Ba Ria – Vung Tau, jalan pandar jamraik tame bruk ngak nong pamaong tal bruk patakik palai lahik hadei tuk yuak kuak, pamaong tal bruk ngak ndap nda dalam bruk ngak mbang. Ini lac bruk padang ndap nda OCOP saong ngak tabiak yaom kaom ka ndap nda ngak nong”.

Pandar jamraik tame bruk ngak nong di Ba Ria – Vung Tau daok patagok khang samar, daong mek hu rilo asar kaya nong siam glaong di bhum palei. Ngan haong bruk daong meng karja saong gah ngak mbang pablei salih gam haong bruk kham merat di urang ngak nong, gah ngak nong tinh Ba Ria – Vung Tau daok kham merat pasamar jeng sa dalam dom bhum ngak nong pandar mac moc jamraih bahrau dalam harei anak tal./.