Di xã Xà Bang, huyện Châu Đức, langiu bộ tiêu chí di palei pala bahrau paglaong, xã brei ngak hu 1 dalam 7 kadha praong abih piah mek hu angan palei pala bahrau kiểu mẫu. Tui jalan ngak, tal thun 2025 xã kham merat mek hu angan palei pala bahrau kiểu mẫu, min meng sahneng duah, khang hatai ngak, xa ini mek hu angan dahlau jang 2 thun.

Tui nan, dalam xã hu 5 labik pato megru ye hu tal 4 labik mek hu tanut 1 pakat negar, Sang bac mầm non Sao Sáng mek hu tanut 2 pakat negar. Amuk Lương Thị Đoan Trang, Hiệu trưởng Sang bac mầm non Sao Sáng brei thau, meng thun 2019 tal ini, yaok thun dom uraniah mai bac dak harei dak rilo jang, tal urak ini, sang bac jak ba hu 320 kamuan dalam umo nao bac hu tame bac, taong abih gru pato jeng hu bằng cấp sư phạm:

"Piah padang hatai jia ka amik ame di anek saih, dom gru pato oh padeih kham merat, patagok ilamu pato pakai, buh jien padang ngak labik bac ta-a. Ini lac sa mbuan lagaih saong jeng lac prein khang ka dom urang khik ramik, dom gru pato hu sa labik ngak bruk siam merkre, salamat, mbuan lagaih, lac bruk chreih chrai ka amaik ame di anek saih sahnang hatai payua anek tame sang bac mầm non Sao Sáng."

Tal harei ini, dalam tỉnh Bà Rịa – Vũng Tàu hu 8 xã mek hu angan palei pala bahrau kiểu mẫu, dalam nan huyện Châu Đức lac labik hu rilo abih duk haong dom labik daok veik, haong 4 xã. Meda mboh lac, tuk nao tal dom xã palei pala bahrau kiểu mẫu di huyện Châu Đức nan lac jalan mbak haci hacih, bak halui phun hijao. Duah gah jalan hu pala rilo janih bingu hadah mekre, ngak jeng thaot binguk puk palei sron mbon, gheih mekre, an ninh trật tự hu sangka dang akaok, dom jalan praong di xã, di palei jeng hu camera an ninh.

 Ong Nguyễn Tấn Bản, Chủ tịch UB bhap bini huyện Châu Đức khan lac, tal tuk ini, dom kadha praong abih dalam bộ tiêu chí kiểu mẫu hu khik ramik, nao tame raidiuk di bhap bini, rik daong paglaong tanut mbang tui gah ilamu, pato pakai di bhap bini dalam huyen, bruk siam mekre, sron mbon di dom xã palei pala bahrau hu khik kajap:

 " Anak tal, huyện tacei pato dom xã palei pala bahrau patui bruk khik ramik saong patagok rilo jang dom tiêu chí dalam 7 janih praong gah môi trường, salih số, khik kajap siam mekre, sron mbon saong cakrok yu lit. yau nan, dom xã meng biak lac xã kiểu mẫu, pabak bruk cakrok di xã palei pala bahrau kiểu mẫu, ba mai yaom glaong raidiuk sron mbon siam mekre ka bhap bini"

Tui panuac khan di ong Vũ Ngọc Đăng, Phaok Jabat rami ramik danak dak bruk ngak negar padang ngak palei pala bahrau tỉnh Bà Rịa – Vũng Tàu, tal urak ini, hu taong abih dom xã dalam tinh mek hu tanut chuẩn palei pala bahrau, 37/47 xã mek hu chuẩn palei pala bahrau paglaong. Lac 1 dalam 19 tỉnh, thành di taneh ia ngak hu bruk palei pala bahrau, dalam nan hu 2 huyện (Long Điền saong Đất Đỏ) hu pok brei angan lac huyện palei pala bahrau paglaong. Bruk ngak lac tal thun 2025, tỉnh kham merat hu 18/47 xã mek hu angan palei pala bahrau kiểu mẫu, paglaong jien mek tame di rahra meng 80-90 triệu đồng sa thun.

Piah ngak hu bruk nan, tỉnh brei pataom tame langyah dom sarak pambuak tal piah daong dom xã, daong palagaih ka bhap bini thau kong nghe bahrau ba tame pandar, patagok bruk Hợp tác xã piah ngak tabiak chuỗi pambuak gauk dalam sản xuất, paglaong yaom pandap panda, kaya nong:

" Kol dahlak pataom tame paglaong jien mek tame ka bhap bini, yau ye hu mabok tame taong yaom pandap OCOP, hu dom sarak daong cakrok bruk ngak. Gam haong nan, lac sarak pambuak gauk ngak pandap, ba bruk ngak ka xã, ka urang nong. Abih di nyu lac pandar jamriak dalam bruk ngak nong, jhul patagok dom sang, dom labik ngak pandap OCOP, pandap meng kan hu pandar jamriak, mac moc."

Dalam dom thun anak tal, Bà Rịa – Vũng Tàu daok brei pataom tame buh jien padang ngak pasiam saong paglaong jalan mbak palei pala, kraong ribaong thủy lợi, điện, sang bac dom pakat… Gam haong nan, tỉnh brei ramik veik gah ngak nong, patagok kinh tế palei pala, peih ngak khang Danak dak yaok xã sa pandap (OCOP) piah paglaong yaom, lagaih haong salih số, njauk haong bruk patagok di taneh ia./.