Dom harei ini, khol hulin dahlak hu gilac mai bhum palei Dốc Đá, xa Phan Lâm, huyen Bắc Bình, tinh Binh Thuan, salabik taneh tui Sarak 04 di pakat Tỉnh uỷ Bình Thuận hu daong brei ka mikwa urang bangsa Cham kathaot daok di 3 xa: Phan Thanh, Phan Hoà, Phan Hiệp, huyen Bắc Bình meng thun 2004. Dốc Đá harei ini mboh biak uak rup bleih drei jeng sa palei pala bui sambai ottanot, di dua tapen jalan, rahra ralo manuac urang, kadai tadaituan tamuh dak harei dak ralo. Raidiuk urang bangsa Cam di bhum palei Dốc Đá mboh siam karei dak ralo oh lac ka janih ngak mbang blaoh daok hu rai diuk di mikwa jeng hu salih barau.

Baoh sang sa-ai Bá Thị Thanh Thuý daok di xa Phan Hoà, huyen Bắc Bình mai daok di bhum taneh Dốc Đá, xa Phan Lâm meng di thun 2006, sang di sa-ai hu karja daong brei taneh ngak mbang, taneh daok dan haong daong jien padang sang di taneh ini. Hadei labaih di 20 thun ngak mbang daok dang di labik barau, sang di saai Thuý hu blaoh raidiuk karo, sang danaok hadah hadai siam makre, ndap nda di dalam sang jeng hu tani tanat dak harei dak sampura jang. Sa-ai Bá Thị Thanh Thuý, daok di Dốc Đá, xa Phan Lâm, huyen Bắc Bình, tinh Binh Thuan khan mayai lac:  “Hu ia tani tanat, mikva ngak hagait jang siam lagaih, nao blei kaya pandap oh nao atah, hu urang pablei pak ini paje”

Abih tih urang Cam tuk mbang camereip mai tal labik Dốc Đá ini dalam tukvak 20 thun dahlau jeng hadar tanat thaik thaot Dốc Đá dahlau daih. Tuk nan, Dốc Đá lac bhum taneh mbuan ceik saong dom patau tali me-om vil taom dal. Meng hu tangin, hatai tari taring kham merat di urang Cam, Dốc Đá hu salih bahrau haong dom janih phun pala katut harei ba mai jien mek tame hu tani tanat ka mikva.

Meng di thun 2016, jalan ribaong kraong hu brei padang ngak, halau ia hu ba mai, nduac tapa taneh di mikwa ngak mbang. Hu ia pala drak, mikwa di ini buh jien tabaaiak blei jamariak njuk ia tagok, blei raok dui ia meng ribaong kraong mai tal taneh ngak di sang drei. Hu ia blaoh, mikwa ba abih hatai kham marat tame pala phun kayau mbang baoh, oh daok pala dom janih phun pala panak harei blaoh salih tapa pala phun mbang baoh pagam haong raong glang mek hu yaom kom raba glaong jang.

Sang ong Nguyễn Hớn haong muk Đào Thị Mai Ngữ, daok di xa Phan Thanh ieu lac sa sang yau baoh keih camin hadah dalam bruk ngak mbang. Di taneh 1,5ha karja brei, diuk pasang di ong muk brei pasahamu taneh jeng hamu, taneh daok weik gait brei pala phun mbang baoh gam haong brei raong anek athur dalam sang, diuk pasang di gait kham marat khik kajap dang di bhum taneh Dốc Đá ini meng di harei akaok meti kan daman di abih, mbiah tal harei ini mboh hu dom jak jeng yau hatai caong takre. Ong Nguyễn Hớn, daok di bhum Dốc Đá, xa Phan Lâm, huyen Bắc Bình, tinh Binh Thuan khan lac: “Meng 2004 mai jah tuk ini oh hu ia, brei nao pak kraong di takai ceik piah mek ia. Tal 2005 pala ritak saong tamekai blaoh salih tapa phun suai lavik thun. Meng nan tal ini jeng daok bambak di taneh ini. Caong khin karja ngak ribaong piah hu ia pandar ka rahra takik rambah jang”

Thun 2020, di xa Phan Lâm hu brei padang sa tổ kapul pasang eng di Dốc Đá, ieu lac tổ tự quản ka 5, kayua sa-ai angan Lư Hồng Quân, sa urang Cam pan akaok iek glang. Hu kapul iek ka 5 yau nan ye gah daok dang siam makre saron mbon, rai diuk ngak mbang bhum taneh Dốc Đá hu tani tanat jeng ye ieik caga siam makre jang. Mikwa bangsa Chăm jeng sanang hatai ngak mbang daok dang di taneh barau ini. Sa-ai Lư Hồng Quân, Akaok Tổ trưởng kapul ieik glang taeng bhum Dốc Đá, xa Phan Lâm, huyen Bắc Bình, tinh Binh Thuan khan lac: “Xa Phan Lâm urak ini hu padang ngak Kapul eng pasang iek meng thun 2020 tal ini lac nao jak ba, nao maong iek mikva ngak hamu taneh. Hu dom mikva ngak hamu taneh hu ia pandar, daok hu dom mikva oh ka hu, nan ye caong khin karja brei kein lagaih, ngak ribaong ka palei pala hu ginup ia piah pala drak”

Dốc Đá ieu lac sa labik mblang taneh praong, nyu atah di pasak, glai cek wil taom dal tuk balau padang, labik dhua jeng oh karo, ralo janih mariak gauk, blah gauk mek taneh bhian tamuh tabiak, min tapi hu dom urang di kapul ieik glang taeng maong mboh jeng ye sangka ieik glang ye jeng hu rami ramik siam makre jang karon mbon jang meng dalau.

Mai meng di sa labik bhum taneh thu lagu glai klo kayau patau daok balau yau meng dalau, Dốc Đá urak ini hu brei cuk tame rup drei khan ao barau siam makre hadah hijau, dom dom labik ngak mbang hu blaoh sagait ia ba tame ka phun pala, anek athur raong, daong ka ralo baoh sang urang Cam duah hu jien mek tame sang dak harei dak mboh siam jang. Hu yau nan, mikwa urang bangsa Cam dak harei dak ndam gam haong bhum palei taneh riya Yok Ndak ini./.