Padang tabiak di bilan 10-2017 meng phun jien di 11 urang haong mblang taneh praong 100 ha phun mbang baoh dom janih, dalam nan rilo meng lac durian, tal urak ini, hadei di 7 thun padang tabiak saong tame bruk ngak, Hợp tác xã (HTX) phun mbang baoh Bàu Nghé (ban sit Phước Long) dui pachreih hu 47 urang pala 244 ha durian dom janih. Durian di HTX hu pala saong iek glang tui jalan VietGAP saong hu Tổng cục Hải quan Trung Quốc pabak brei mã bhum pala. Durian hadei di paik baoh hu tame paok tani tanat piah pablei tapa Trung Quốc. Kuhria rah tapa, yaok héc-ta durian hu meng 15-20 tấn baoh.

Meng kein lagaih gah taneh riya, langik tasik, labik saong kein laba praong gah kinh tế nan ye HTX phun mbang baoh Bàu Nghé daok hu peih praong taneh pala. Ong Trương Văn Đào, Chủ tịch Hội đồng quản trị HTX phun mbang baoh Bàu Nghé brei thau, “bilan thu meng blaoh, pandiak bhang dui atah nan ye rilo labik durian daok tabiak baoh ye kurang ia pruh ba tal jruh baoh, khut baoh. Yau nan min, di Bàu Nghé ia pruh hu ginup, ia danao jeng hu, ia bingun jeng hu. Taneh Bàu Nghé hu labaih 400 ha nan ye jalan ngak anak tal di Bàu Nghé lac daok brei peih praong taneh pala durian.

Bruk ngak mbang cakrok, raidiuk di rahra hu glaong tagok, rilo baoh sang praong rilo tal di dom labik dalam xã Phước Tín ba gauk tamuh tagok. Gam haong nan, jalan điện, jalan radaih, bilai iek ruak, sang ilamu, jalan gom truac hadah, jalan ia thủy lợi hu buh jien tame ngak siam, ngak samu gauk,  daong ba xã Phước Tín mek hu angan palei pala bahrau di thun 2017 saong palei pala bahrau paglaong di thun 2020. Abih di nyu nan lac, urak ini Phước Tín oh daok sang kan kathaot, jien mek tame kuhria tui akaok menuac thun 2023 hu 88 triệu đồng. Ini lac jalan peih tabiak praong ka Phước Tín kham merat mek hu angan palei pala bahrau kiểu mẫu thun 2024.

Urak ini, langiu 3/4 sang bac mek hu tanut chuẩn pakat negar, Phước Tín hu buh jien ngak Sang pakacah rilo janih, praong, siam, daong ka rahra hu labik pasram, pahat, pakacah dom janih thể thao paglaong prein yava. Piah ba jalan tagok khang ka xã, Phước Tín hu pok panuac tagok UBND ban sit Phước Long likau buh jien peih praong jalan Thống Nhất pambuak xã Phước Tín jaik haong xã Phước Tân, huyện Phú Riềng, atah 2km. Gam haong nan, brei buh jien ngak takai jalan, pala phun kayau hijao rah tui jalan Điện Biên Phủ (labik pasak xã), meng canah klau Phước Quả tal canah klau Phước Lộc atah jaik 2km.

Ong Văn Đình Trung - Akaok UBND xã Phước Tín brei thau, hu pilih ruah buh jien padang ngak saong mek hu angan palei pala bahrau kiểu mẫu thun 2024 lac bruk hadah mbaok mata, nan ye Đảng bộ, karja saong bhap bini xã daok kham merat ngak ka nyu salah bruk ba tabiak. UBND xã brei bruk cambaih laih ka  yaok urang dalam mBan khik ramik padang ngak palei pala bahrau saong daok peih ngak 3 tiêu chí palei pala bahrau kiểu mẫu. Nan lac ilamu, siam mekre sron mbon saong salih số. Urak ini bruk salih số hu Phước Tín ba tabiak ngak khang saong mek hu rilo jak jeng haong abih tih 6 palei hu padang kapul công nghệ số bhap bini angaok Zalo. Kapul nan hu khan brei thau praong dalam dom sarak, jalan ngak di Đảng, hukum di Karja ka salih số tal dom sang, tal bol bhap rahra. Gam haong nan, pathau khan, tacei pato bhap bini cài đặt, thau cambaih bruk pandar dom nền tảng số, pablei salih điện tử, bruk ngak harak gar hành chính công, pandar số cơ bản.

Caong lac dom kan kandah samar hu lang talaih saong yam tapa. Bruk praong urak ini, lac Đảng bộ, karja saong bhap bini Phước Tín daok kham merat yaok harei piah ba xã nao tal palei pala bahrau kiểu mẫu camereip abih di tỉnh./.