Jaik 8.000 ribau urang Cam diukrai di 3 palei, dalam nan hu: Yang Mau, Craoh Tang saong hamu Kam, ban sit Ma Lâm. Yaok palei yau sa asar intan sit pagam haong gauk meng hatai anit ranam bhum palei saong hatai uak drei tagok. Meng labik rup thei thei ngak, rilo meng lac piah ta-eng ngak ta-eng pabak, urak ini mikva thau ngak mbang paje, ngak nong tui jalan ngak tabiak ndap nda. Phun padai ia hu pagam suai lavik haong urang bangsa Cam, urak ini lac bruk piah duah jien mek tame. Meng halau ia meng danak dak bineik kraong Quao saong halau ia pabak meng ribaong 812 – Châu Tá meng bineik padang ia kraong Lũy hu ba ia mai tal yaok alaok hamu, taneh riya pruh tuh ia ka dom janih phun pala ngak jeng sambo bar hijao luac thun.

Palei Craoh Tang mada hu tuk kurang ia piah pala drak ngak mbang, tal tuk hu bineik ia kraong Quao hu salah blaoh, ia la-an bangi meng bineik hu nduac mai tal yaok mblang hamu padai. Mblang hamu padai Craoh Tang hu salih mbaok meta. Ngak sa mbang sa thun blaoh dua mbang pala drak, tal halau ia tani tanat blaoh mikva patagok jeng klau mbang pala drak tani tanat, oh daok bruk hamu klak balau kayua thu lagu, oh daok cang tame hajan langik. Urang Cam Craoh Tang kuhria ramik hu tukvak pala drak, dak harei dak paglaong bruk padai yuak kuak hu saong jien mek tame. Ong Thông Tiến – Akaok palei Craoh Tang, xa Hàm Phú, huyen Hàm Thuận Bắc brei thau: “Dahlau diah binek ia Kraong Quao oh hu ia, mikva ngak mbang rambah lo, sa thun ngak hu sa bilan, pambak tame cang ia langik…Hu Ndang saong Karja daong, ba ia mai mikva ngak padai, pala drak hu 3 mbang dalam sa thun. ”

Dom salih bahrau hu rah tabiak yaok harei, meng baoh sang daneing meng kiak, meng simang, tal sap jamraik li-ua salih ka kabao dui langan. Di hamu, phun padai chraoh nerang, dalam palei, sap ndom klao ndaoh ndaih. Uranaih hu nao bac megru ginup, urang praong umo ye sangka bruk ngak mbang, rilo baoh sang hu patruh kathaot, jeng sa kreih camin ka bruk ngak mbang naih joi. Meng bruk hu mbaok tame di karja palei saong hatai kham merat meng yaok baoh sang, raidiuk di palei Craoh Tang hu tani tanat jang, trei sir jang.

Jeng yau palei Craoh Tang, palei Yang Mau, xa Hàm Trí lac sa bruk naih gheih dalam bruk padang palei pala bahrau. Jaik 600 baoh sang rahra di ini hu gam haong gauk khik karo kajap angan palei ilamo rilo thun danak. Labaih 95% baoh sang rahra hu mbaoh tangin lac baoh sang hu ilamo. Bruk sa hatai nan mai meng kadha sit yau ye khik hacih sa-at alam langik, ngak tui hukum nagar, raong ba anek bik mai tal sang bac saong ginum prein haong gauk, sa hatai padang palei pala bahrau.

Dom jalan betong pambuak dom labik daok dang di bhap bini rahra. Dom gom ndien jamraik truac hu pasang hadah grauk dom jalan nao. Dom baoh sang hu padang khang kajap haong thaik thaot gheih ghang jang, dalam baoh sang hu ginup ndap nda duh ka raidiuk yau ye tivi, radaih patuh, garaong tu la-an, jamraik papah khan ao, hu baoh sang daok blei pandar jamraik pagap makre pandiak la-an, dom ndap nda jamraik yau ye daok atah bayah saong dom baoh sang di palei pala, urak ini jeng bruk mboh bhian randap.

Dalam raidiuk hu salih yaok harei, urang Cam di ini jeng khik ramik tani tanat ilamo saong raidiuk duh po duh yang di drei. Dom ragu ragam bhap bini, dom khan ao bangsa jeng hu ngui cuk dalam dom harei raya adat cambat bhap bini bangsa. Bruk pagam gheih ghang di bruk ngak mbang patagok kinh te saong khik ramik ilamo ieu lac sa bruk karo kajap ka bruk patagok rakrai di bhap bini. Ong Thông Văn Trinh, Phaok Bi thu Ndang uy xa Hàm Trí, huyen Hàm Thuận Bắc brei thau: “Yaok thun hu peih ngak dom bruk dalam bhum palei, dalam nan hu khik ramik saong patagok ilamo bangsa tapa dom raya adat. Abih di nyu nan lac, hadei 21 thun peih harei raya gul pataom gauk taong abih bangsa adei sa-ai tui sarak 04 di Trung uong Mat tran Negar Viet Nam. Tapa dom danak dak ini hu pamedeih hatai kham merat di bhap bini rahra.”

Sa bhum taneh palei ngak nong bahrau oh lac dut meng dom tanut taka so atau asal kadha thu lagu, bo dut meng raidiuk siam glaong saong bruk njauk hatai di rahra. Meng dom jalan hacih sa-at, tal cambuai klao di rahra dalam bilan yuak kuak hu rilo… Taong abih lac bruk kuhria hu di sa mbang salih bahrau bo di nan hu bruk sangka di Ndang, Karja, saong rahra hu ngak saong daok ngak urang hu makna.

Urang Cam daok di Hàm Thuận Bắc harei ini oh lac sa janih khik kajap dom jak jeng hu dahlau, blaoh daok mboh dak harei dak tagok glaong siam makre, iek nao tal sa palei pala bahrau patagok glaong, tuk nan kinh te mikva hu salih bahrau saong ilamo meng kal hu khik ramik saong paglaong, piah khik miat miat sambo bar hijao meng danak dak palei ngak nong bahrau./.