Phật tử, urang halar hatian medeih ndih piah sap gap kuhria caga saong tahanek yaok ribau pok lisei pandiak

Tal maong 3 page mesup yaok harei, Ðại đức Thích Minh Tịnh, urang dang akaok Tịnh xá Ngọc Trung Tăng (labik Long Thạnh 1, quận Thốt Nốt) haong dom phật tử, urang halar hatian medeih ndih piah sap gap kuhria caga saong tahanek yaok ribau pok lisei pandiak. Bruk ngak ini hu Ðại đức Thích Minh Tịnh peih ngak saong khik ramik dalam labaih 3 bilan tapa.

Dalam mblang sang ghing sit di Tịnh xá, yaok urang sa bruk: patuc apui, rao brah tahanek lisei, laok kanduh baoh kraoh, rao njam patam... Daok nyaom karei ye rami ramik, parabha dom pok pandap. Hadei di ngak salah blaoh, dom pok lisei, pok pandap hu ba nao tal dom labik caong khin. Ðại đức Thích Minh Tịnh brei thau: “Dalam mbang jit ka sa, khaol dahlak haong dom urang ngak pah hala hu jhik labaih 30.000 blah siuk pabang mbaok. Dalam mbang jit ini, khaol dahlak oh dang langiu hu tuk mboh dom kan kandah di mikva saong manuac urang labik pacang caga jit. Bruk biak haniem phol lac hu rilo menuac ngak pahla hu rik daong brei yaok rituh tấn brah haong rilo pandap panda kaya mbang piah duh ka sang iek ruak dã chiến, “siêu thị 0 đồng”, dom labik pacang veik, labik brei daok karei…”.

Nao gam haong Ðại đức hu labaih 40 urang halar hatian ngak pahla dalam nan hu urang peih radaih, công nhân, doanh nhân… kak kajap haong gauk tui jalan “anit ranam gauk, daong ba gauk”. Sa-ai Trần Ngọc Thắng taduan bruk pajeng ba pandap panda kaya nong blei di rilo labik, ba mai parabha saong payua tal tangin urang sang kan kandah. Taphia di nan, sa-ai jeng lac urang ba lisei nao tal sang iek ruak Dã chiến Thốt Nốt. Ngan haong sa-ai, bruk ini lac jalan piah ka sa-ai rik daong hasit pren yava di drei piah pacang caga jit. Sa-ai mboh sahanang hatai jang tuk hu Tịnh xá brei khan ao pacang caga jit ruak, siuk pabang mbaok, dut iek samar 3 harei sa mbang,…

Mboh bruk ngak pahla hu ba mai rilo siam gheih, rilo urang ngak pahla halar hatian daong pren haong Tịnh xá. Piah hu var mbang ginup dinh dưỡng daong ka bác sĩ hu pren yava piah taong ruak saong duh ka urang ruak COVID-19, sa-ai Huỳnh Thị Bích Huyền, Yam ndok Cty Cổ phần Xuất Nhập khẩu Ngọc Quang Phát pambuak bruk haong nhà hàng Hoàng Gia Quán peih labik ngak pandap mbang hu ralow, ikan. Bruk ngak di ghing ini hu peih tabiak meng harei 5-9 tal harei ini. Gam haong lisei mbong, lisei chay kayua Tịnh xá tahanek, yaok harei ghing mbang duh ka jaik 1.200 pok lisei ikan, ralow saong pandap mbang hu salih yaok harei. Ngan haong urang taha, uranaih sit njauk ruak kik, sa-ai Huyền daok hu brei pabak dom kaya mbang karei, yau bu, yến chưng…

Tui kuhria tal tuk ini, Ðại đức Thích Minh Tịnh hu jak ba, alin brei labaih 50.308 pok lisei, labaih 3.063 pok pandap, jaik 89 tấn brah haong rilo janih pandap panda kaya mbang ka bhap bani kan kandah, dom urang ngak bruk pacang jit dalam saong langiu ban. Bahrau ini, Tịnh xá Ngọc Trung Tăng hu brei labaih 1.200 pok pandap piah “daong pren” ka urang ngak meng atah mai veik palei. Ðại đức Thích Minh Tịnh ndom lac: “Dahlak caong khin dom bruk ngak siam mekre meda hu pambak prong piah ka khaol drei ba gauk jhul kadul likuk jit ruak”. /.

Urang lang: Jasi – 08/11