Taha palei dok ginum biai song urang pak di jalan tapen negar 

A Blong ndih tapui thun 1955, lac urang naih gheih di bangsa Rơ Măm. Samar hu thau ka cách mạng, ong hu mbaok tame bruk mesruh pacang Mỹ meng tuk dok sit.Taneh ia sron mbon salamad, ong ngak gru pato di bhum  tapen negar Mô Rai, Sa Thầy, Kon Tum. Luac dom  thun bilan ranaih umo mbiah tal tuk padeih hưu, A Blong tuk halei jeng cong khin ka bangsa Rơ Măm oh dok kan kathaot iek lipa.Ong lac urang ba akaok nao dahlau song tacei pato dong ka mik va ngak tui. Dalam bruk patagok kinh tế, sang taha palei hu 4ha cao su dok mek katak, 3.000m2 hamu padai ia, danao rong ikan, rong tapon kubao song rilo menuk ada. Taha A Blong jeng lac menuac padang bruk pachreih bac ka anek kamuan dalam palei; tacei pato rahra klaak adat cambat klak, khik ramik ilamu  meng kang. Ong A Yer, phaok akaok  UBND xã Mô Rai brei thau, taha A Blong hu bhap bini anit ranam , iek prong iek glong meng bruk ba akaok nao dahlau,hadah krah yau kreih camin.

“Ong ba akaok ngak njauk tui dom sarak di Đảng, karja. Ong pathau khan, jak ba mik va dalam palei di ong jeng yau dalam xã peih ngak dom sarak.Patagok  kinh tế ye ong jeng lac menuac nao dahlau yau rong kubao, limo, pabui song pala dom phun công nghiệp yau phun cao su, phun paoak blait”.

Meng angan je gam song tari tarieng jak ba, langyah suan, njauk di taha  A Blong, urang  Rơ Măm di tapen negar  Mô Rai urak ni patrun hu bruk tok duik tok pasang dalam umo sit song klaak nao bruk tok gauk dalam but pajaih; pasiam veik bruk menyim khan bai; khik ramik hu dom adat cambat gheih mekre, yau adat yuk tanye, peih gilang padai, uan padai bahrau, uan sang rông bahrau…Bruk njauk biai di abih lac, yaom lac tok  hu 149 boh sang gam song  487 urang dok dalam palei Le,  min urang  Rơ Măm dok khik hu 34 bộ cồng chiêng quý piah pandar dalam dom tuk rija roya . Saai A Thái, urang di palei Le, brei thau, tuk rup drei, urang dalam palei hu bruk hagait kan kandah, tavak tavaiy, jeng duah tal taha A Blong piah tangi sua duah jalan langyah

“Dahlak mboh taha  A Blong lc sa urang biak siam. Ong ngak bruk biak siam, ong biak hadah krah meng bruk dalam sang song bruk dalam palei, bui sambai song mik va, biak jiak haong mik va. Dom bruk hagait ong langyah lac abih hatung hatai. Hulin njauk bac megru tui ong  rilo”.

Meng angan je di drei, taha A Blong lac labik pambak tame di karja, kapul nyaom xã Mô Rai song gah biên phòng dok di pak nan. Taha palei jeng lac menuac rik panuac ka phun padai ia, phun  cao su, rong limo… patagok di bhum taneh tapen negar  Mô Rai, ba mai rai duik dak harei dak trei sir ka bhap bini palei  Le song 7 palei bangsa takik. Thun ni umo 65 thun, taha palei g A Blong dok kham merat dalam bruk ngak song hatai cong khin dom bruk siam mekre ka bhap bini:

“Cong khin di abih lac mik va patruh iek patrun kathaot. Ka dua lac ngak tui sarak di Đảng, hukum di karja. Ngak suan jalan di  Đảng, karja lac oh hu .Jhui nao ban glai ban glo, eik lipa, rambah rambeip lac oh jeng .Nan lac bruk taha palei cong khin di abih” 

Thun  2020, taha palei  A Blong hadah mbaok meta lac sa dalam  25 urang di  tỉnh Kon Tum hu mbaok di Nyaom roya dom bangsa takik  Việt Nam mbang ka II. Bruk ni lac pren khang piah ka ong dak kham merat patagok bruk ba akaok nao dahlau, dong ka mik va palei Rơ Măm mangaok bhum taneh tapen negar dak harei dak trei si haniem phol./.

Urang lang: Hanipha- 6/12