Chreih chai pathram chat plaong gam saong dom ayut di Sang ilamo dam dara uranaih tinh Dak lak, adei Nguyễn Thục Quyên, umo 13 thun daok di phuong Ea Tam, ban Buôn Ma Thuột brei thau, tuk tamat bac thun blaoh, adei hu tagok danak bruk ka drei piah hu dom harei padeih biak chreih chai saong hu kein laba. Urak ini, adei Quyên hu mboh tangin tame 2 tal bac gheih di sang ilamo:

“Dalam bilan ini anek meda nao ma-in cau long (badminton) saong ma-in bui di labik ini, daok 2 bilan hadei ye anek meda hu nao bac he, bac Patih saong sap Anh. Tal bilan 8 anek meda nao ma-in di Gia Lai. Thun ini anek hu amaik mboh tangin bruk duah thau 5 harei 4 melam di baha Liên Trì pak di tinh Gia Lai, daong ka anek trun laneng bruk glaih glar hadei di sa luac thun bac”.

Piah ka anek bik hu sa bilan padeih pandiak kein laba, rilo urang ngak amaik ame jeng hu roh duah saong daong tut angan tame dom bruk ma-in sambai. Bruk ngak bilan padeih pandiak di Dak Lak oh lac sa janih ba kadha bui sambai, pathram ilamu blaoh daok daong ngak ka uranaih patrun patakik jang bruk taom gaok saong dom ndap nda kaya jamraik ndien tu saong caga atah bruk mbuan njauk bala. Sa-ai H Duyệt Niê, daok di phuong Tan Lap, ban Buon Ma Thuot, tinh Dak Lak brei thau:

“He padeih pandiak jeng caong khin palaghaih ka anek sit nyu hu ma-in bui sambai, khang kajap jang, hu rilo jang ayut sahabat saong bac megru hu rilo kahda. Anek sit di drei urak ini daong bac tal Dance-kids, bac chat meng thun dahlau mai, kamuan nyu jeng takre chat yau nan ye drei jeng brei ka anek drei nyu nao bac chat”.

Di sang ilamo dam dara uranaih Đak Lak, hu labaih 2.000 dam dara uranaih daok hu mbaok tame dom tal bac ngak gheih yau tamia, daoh, cih, ba danak dak, padhih, taong bio…, Ralo abih di dalam nan, danak dak “Bac megru saong ngak bol lin” kayua kapul Dam dara pakat Tinh, Sang ilamo, So Pato megru saong Kapul pan akaok Bol lin tinh pambuak gauk peih ngak, hu patui khik luac 15 thun tapa, daong ka yaok rituh uranaih umo meng 8 tal 15 thun hu vaktu bac magru roh duah, pathram rup saik, oh sa janih eik mong tivi, oh ma-in di jamraik phone. Sa-ai Nguyễn Thị Thúy Hiền, Phaok akaok phu trach Sang ilamo Dam dara uranaih Đak Lak khan brei thau:

“He padeih pandiak nan ieu lac bilan blaoh sang uranaih mboh biak chreih chai. Labaih 30 janih ma-in hu peih tabiak meng 5h30 tal 21h, laghaih saong rilo anek ranaih umo meng 2 thun tagok. Thun ini, langiu di bruk patui khik dom kadha ma-in bhian mboh yau dahlau diah yau gah ilamo, nghệ thuật, ma-in padhih, ilamo jalan diuk rai ye khaol dahlak daok caik hatai tal bruk oh mek jien ka dom mblang ma-in sáng tạo, roh duah tui gah glo akaok, caik hatai tal bruk pacang caga mblung aia saong bala brei ka uranaih”.

Tui sa-ai Phan Thị Trinh, Phaok bi thu kapul dam dara pakat Tinh, Akaok kapul nyaom uranaih tinh Dak Lak, gam saong jalan ngak ba mai sa bilan padeih pandiak bui sambai, siam mekre saong kein laghaih brei ka uranaih, kapul Doan - Hoi - Doi dom pakat dalam tinh patagok peih ngak dom bruk ma-in bui, dom bruk ngak brei duah thau, paglaong bruk ngak so, ba brei mblang ma-in khang kadang, kein laghaih ka uranaih, abih di nyu lac dom adei bhum atah bayah.

“Patagok pambuak bruk saong dom gah dahan piah peih ngak duah thau saong langyah dom bruk ngak pambuak pagam tal uranaih. Patgaok bruk pacang caga di pak ala piah ka dom adei hu dom bruk ma-in bui dalam dom harei padeih he habar ka nyu siam mekre saong grap tanat. Patui veik peih ngak mbang jak ba Brei ka uranaih anit ranam, pataom tame dom bruk ngak yau pok brei pok jien bac atau padang ngak saong pasiam veik dom danak dak ma-in bui brei ka uranaih, abih di nyu lac dom labik atah bayah dom labik kan daman”.

Gam saong bruk sa tangin tame ngak saong gauk di dom pakat, dom gah dom dahan, saong meng bruk ngak di dom urang ngak amaik ngak ame, uranaih di tinh Dak Lak daok hu sa bilan padeih pandiak biak bui sambai, siam mekre saong hu makna. Yaok bruk ngak, yaok mblang ma-in oh njauk lac tok ba mai kadha bui sambai, bo daok lac ilamu piah dom adei jia tame rup drei jang, jeng manuac jeng urang jang hadei di yaok harei padeih pandiak he./.