Di pulao Long Hòa soang Hòa Minh, huyen Châu Thành, tinh Tra Vinh, urang ngak nong pasalih kan kandah meng bruk langik salih karei jeng kein lagaih kinh te haong bruk pala padai huu co pambuak haong raong hadang giraong hijao, yaok thun jien mek tame labaih 200 trieu dong/ha.

Dalam mbang pala padai – hadang meng thun 2024-2025, xa Long Hòa saong Hòa Minh peih labaih 600 ha taneh ngak padai huu co, rilo di dalam nan hu meng lac pandar pajaih ST24, pambuak gam saong raong hadang giraong hijao. Padai yuak hu kuhria rah tapa 5,2 tan/ha, ba mai labaih 70 trieu dong/ha, glaong jang 30-35% dut saong ngak padai karei. Gam tui di nan, hadang giraong hijao, aring saong dom janih kaya dalam ia karei ba mai jien mek tame meng 170-190 trieu dong/ha. Ong Nguyễn Thành Thưởng, Phaok akaok UB Bhap bini xa Long Hòa, bhum palei ngak dahlau bruk ini, bri thau:

“Dahlau daih ngak padai huu co mikva tok pablei tapa gah urang blei salih dang di kreih, urang HTX. Daok hu pabak angan mbaoh tangin, ye rahra hu ta-eng tut angan piah pabak angan ka urang menuac, baoh sang. Tuk nan urang hu ta-eng ruah labik piah pablei atau ta-eng drei duah labik piah pablei ndap nda oh cang tapa urang blei salih dang kreih.”

Bruk ini daong brei oh lac sajanih daong tagok yaom kaom bruk ngak mbang blei salih blaoh nyu daok brei mboh jalan patagok karo kajap dalam bruk langik salih karei. Tui So Ngak nong saong Alam langik Tra Vinh, ini lac 01 dalam 13 bruk ngak siam lagaih ka ngak mbang kinh te, xa hoi saong moi truong alam. Ong Trương Văn Mười Một, sa urang ngak nong di xa Long Hòa ngan haong 10 thun ilamo, brei thau:

“Di ini 6 bilan mbak, 6 bilan ia taba. 6 bilan ia taba ye drei pala padai – hadang; 6 bilan ia mbak ye drei palao raong aring. Padai pandar taong abih meng khak huu co, oh brei pandar jru pacang khik phun kayau saong ngak tui jalan di gah ngak nong brei khan, rilo meng di nyu ieu lac pandar pajaih ST24. Padai ini mbau pahe, bangi, yaom glaong jang dut haong padai karei nan jien laba jeng glaong jang.”

Gah ngak nong Tra Vinh daok jhul khang bruk patagok dom bhum pala padai yaom asar siam glaong. Meng bilan He Thu thun ini, tinh ba tabiak jalan peih praong taneh ngak padai huu co tagok ralo praong meng 1.000 ha, tal 2.500 ha dalam thun 2030, paataom rilo di huyen Châu Thành, Trà Cú saong Cầu Ngang. Bruk pala padai – hadang huu co oh lac hu sa janih brei parilo jien mek tame blaoh nyu daok daong padang angan ndap nda kaya ngak nong hacih sa-at, karo kajap ka bhum palei./.