
Gilac Pasak Daong Jabat karja tinh Long An hadei di 3 thun, amuk Phạm Thị Lũy, Po urang ngak mbang blei salih di Cần Đước, oh tatuak drei dang anak danak dak ngak harak gal brei ddat bahrau. Dahlau cih ngak meng harak, buh tapak blaoh daok cang tapa mbuu ndien, urak ini ba ngak tapak online tuk khin ye taong yaom iek bruk di urang ngak mbang blei salih.
Dalam nan mboh lac, langiu di marat hatai di urang jakar iek daong, pasak daok daong tui manuac AI, daong buh harak meng online jeng nyu drah nyu samar biak lagaih laguai. Kayua hu yau nan, muk Lũy mboh biak sanang hatai jeng ye jie hatai ngak harak gar di labih urang ngak mbang blei salih di drei. Muk Lũy ndom mayai lac:
“Drei mboh ngak harak gar urak ini mbuan sanang lagaih jang dahlau. Dom urang jakar ngak bruk di ini pato kakei bih jih bik jalan, hadei di ini oh cang gilac mai sua tangi tra blaoh daok di sang ngak harak gar payua”.

Tui ong Lưu Hiếu Trung, Phó Akaok Pasak Daong Jabat karja tinh Long An, Pasak daok pataom prein patagok bruk ngak di urang jakar karja dan saong kakei ba rahra ngak tui online, ieik tal ngak hu abih 100% harak gar ganap online dalam tinh. Ong Lưu Hiếu Trung khan brei thau yau nan:
“Khol hulin dak tuk dak daok kham marat pasiam bruk ngak daong bhap bini rahra di urang jakar karja. Tuk bhap bini rahra mai Pasak Daong Jabat karja ye ngak yau habar jeng kura daong tani tanat cambac lac brei juai oh gilac mai sa mbang tra, juai lahik abih tukvak. Mayah mbang camreip buh meng harak gar ye hadei oh cang ngak meng harak ba-ar, tantu ngak meng online”.

Dalam 5 thun mblaoh, Long An hu gam gam chul khang bruk pasalihlek taka so, dak yam dak brei sampurna bruk ngak daong ka bhap bini rahra saong ka urang ngak mbang blei salih. Kayua hu thau kham marat, bhum palei Long An dang akaok bhum Taneran kraong Kuu Long saong bhum kinh te pasak maraong Nagar pachreih urang buh jien tame ngak kong saong iek glang.
Ong Bùi Nguyên Khởi, Phaok Akaok So Ilamu saong ngak Kong tinh Long An brei thau, labik hu brei buh tame pasak dom bruk ngak iek glang padang ha tang ngak kong, pataom prein pan bruk saong iek glang majam khao tin, khik tapak dalam bruk patacei, brei ba bruk yau ye daong bruk jakar. Dalam nan, majam brei khao tin harei nyaom raya hu pambuak brei khao tin tapak trun xa, daong siam lagaih brei ka bruk pasang ngak iek glang. Ong Khởi brei thau lac:
“Kein siam lagaih di gilang kadha di nyu ieu lac hu hadah pandang dalam bruk iek glang karja nagar. Kayua hu yau nan, bhap bini saong dom jabat brei iek tui, iek glang dom bruk ngak di karja ka nyu siam jang. Brei ka dom urang ngak mbang blei salih, gilang kadha di nyu peih tabiak dom janih ngak ka nyu siam ye thau tal harak angan dom baoh sang urang ngak mbang blei salih daok ngak, patui di nan daong yaih ndap nda ngak tabiak, dom bruk ngak hu jalan sampurna cambaic laic jang. Bruk ngak brei padang jeng bruk ka urang ngak mbang blei salih padang ngak bahrau dah krah njauk lagaih jang tui jalan salih lektaka so”.

Tui prein ngak oh padeih padei di dom thun tapa, Long An daok dak yam dak ngak tui akaok mbram jalan padang karja lek taka so, patagok ban riya jak krah, yam tal labik ngak karjar bahrau, pahadah saong jaik taphia.
Salih lek taka so oh sa janih ba mai kein lagaih ka bhap bini rahra, urang ngak mbang blei salih blaoh nyu daok padang labik siam karo brei ka Long An patagok drah samar, khang saong sampurna di dalam jaman lek taka so./.
Viết bình luận