Kreh bilan hajan bilan 7/2025, baoh sang sa-ai Rơ Mah Huệ, daok di palei Dêr Sơ, xa Ia Me, tinh Gia Lai, uan tabuan raok baoh sang bahrau kayua Kongti TNHH MTV Bình Dương (daok dalam Binh ndoan 15) padang alin. Baoh sang praong labaih 50m², hu padeng geh ghang, hu hadom ganing haluk karo, pabung ton kajap, kanaong sang hu ngak meng kriak men hacih. Di palei Dêr Sơ jeng hu veik 16 baoh sang karei hu daong brei abih baoh sang oh daok taik tahak. Binh ndoan 15 hu daong abih tih 100% jien padai padang ka 10 baoh sang di bhum taneh ini.

Sa-ai Rơ Mah Huệ brei thau: “Sang bahrau biak gheh, mat. Meng ini nao drei oh daok duh hatai ka sang danaok veik o, tok caong ngak kong biak siam, kuah katak ka naih jaoy, ngak bruk suai atah haong kongti.

Thuong ta Lê Đức Toàn - Bi thu Ndang uy, Phaok Yam ndok Kongti TNHH MTV Bình Dương brei thau, ngak danak dak “Jum gauk brei abih baoh oh daok taik tahak”, tal ini, labik hu salah blaoh saong jao alin 68 baoh sang. Piah khik kajap tukvak ngak saong khang kajap di sang danaok, kongti hu jakba urang jakar, urang ngak kong saong urang ngak bruk di labik. Dom baoh sang hu daong rilo meng lac urang ngak kong daok ngak bruk di di dom kapul ngak bruk, hu gaok kan kandah, rilo thun daok dalam dom baoh sang oh daok kajap, mbuan jaleih ngak kandah tal urang.

Dalam thun ini, Binh ndoan 15 hu buh pren peih danak dak di grep labik. Taong abih hu 357 baoh sang hu padang bahrau saong pasiam, hu taong abih jien buh tabiak jaik 17 ty dong. Meng nan, yaok rituh baoh sang rah jalan tapen negar Gia Lai hu dom baoh sang kajap khang. Thuong ta Lê Đức Toàn brei thau bruk kham merat di labik dalam bruk ngak danak dak:

“Kapuk urang ngak, urang padang di bhum palei biak kan si duah. Yaom ndap nda tagok glaong, hu tukvak, hu dom ndap nda tagok tal 230% dut haong yaom akaok mati. Piah dom baoh sang hu padang khang kajap, khik kajap ba tame pandar suai atah, khol dahlak hu pambuak haong pakat uy, karja palei ngak bruk haong dom labik pabak ndap nda piah ngak sumu haong jien buh tabiak, khik kajap danak dak hu siam lagaih njauk haong jalan kuhria di Rajaei.”

Gam haong Binh ndoan 15 (Mentri Quoc phong), kapol bol lin bien phong tinh Gia Lai jeng rik pren dalam bruk brei abih baoh sang oh daok taik tahak di tapen negar. Tok hadei njauk sa bilan kuhria meng tuk Mentri Quoc phong peih danak dak pakacah, tal harei 15/4, Bol lin Bien phong tinh hu salah blaoh saong jao 10 baoh sang kajap hu taong abih yaom kaom labaih 800 trieu dong.

Dai ta Trần Tiến Hải, Phaok akaok chi huy di Bo Chi huy Bol lin tinh gam ngak Akaok Chi huy di Mban Chi huy Bol lin Bien phong tinh Gia Lai brei thau, daong mikva padang sang, oh daong dom urang nan hu labik daok kajap, sahanang hatai ngak bruk, bo daok daong patagok hatai gul pataom bol lin - rahra, gam haong gauk khik kajap taneh riya, an ninh di tapen negar.

"Dalam dom thun tapa, khol dahlak biak sangka iek praong asal kadha daong rahra padang sang danaok. Kayua nan khol dahlak ieu da-a hadom gah ngak pahla, bruk rik daong di dom menuac urang, kapul, urang jakar bol lin. Kayua ini lac bruk ngak ka mikva labik tapen negar, pahadar hatai anit ranam, bruk sangka di mikva labik tapen negar bien phong”.

Ngan haong bruk ngak abih tung tian saong hatai thau ka bruk di drei, dom labik bol lin hu rik drap ar, ginum prein, alin ka rahra tapen negar Gia Lai dom baoh sang khang kajap, gam haong nan daong tani tanat raidiuk, paglaong bruk daok dang mbang ngui rahra saong brei kein lagaih piah mikva sahang hatai patagok bruk ngak mbang, uak drei tagok patruh kathaot./.